Read sango Osée 12 Bible Online

Osée 12 - sango bible

Osée 12

¹KOTA GBIA atene: “Azo ti Efraim angoro mbi na tënë ti mvene, azo ti Israel angoro mbi na tënë ti handango ndo. Azo ti Juda angba ti tambula na Nzapa, me ala ngba ti sara na anzapa nde.”

²Pupu aga kobe ti azo ti Efraim, ala yeke tumba peko ti pupu ti To, ti londo na ndaperere ngbii asi na lakui; ala yeke tene mvene mingi mingi si ala yeke sara ngangu na azo. Ala na azo ti Asirii aleke tënë ti ga *ambuki, ala yeke tokua mafuta na azo ti Ezipte.

³KOTA GBIA ayeke na ngbanga na azo ti Juda; lo yeke ga ti kiri peko ti sioni na Jacob ndali ti dutingo ti lo, lo yeke futa lo alingbi na sioni sarango ye ti lo.

⁴So Jacob ade na ya ti mama ti lo, lo mu ndo ti ita ti lo; so lo kono awe, lo tiri na Nzapa.

⁵Lo tiri na mbeni *ange si lo hon ndö ti lo; lo toto si lo voro tere ti lo na ange ni. Jacob atengbi na Nzapa na Betel; na ndo so laa Nzapa atene tënë na e.

⁶KOTA GBIA, Nzapa so ayeke na ndö ti dunia kue; taa iri ti lo so a yeke iri na lo ayeke “KOTA GBIA”.

⁷“Ti mo Jacob, alingbi mo kiri na mbi, Nzapa ti mo. Sara ye na lege ti nzoni be, sara ye na legeni; zia be ti mo lakue ti ku Nzapa ti mo.”

⁸KOTA GBIA atene: “Efraim, mo yeke tongana azo ti Kanaan; mo gbu na maboko ti mo mbeni kilo ti handango na azo; mo ye sarango ye ti nzi.

⁹Mo tene ti mo, mo tene: ‘Taa-tënë, mbi wara mosoro mingi, mbi wara anzoni ye mingi. Me na ya ti aye so kue mbi wara so, zo oko alingbi ti wara sioni wala siokpari daa pepe.’

¹⁰Me ti mbi, ti to nda ni na sese ti Ezipte ngbii asi fadeso, mbi yeke KOTA GBIA, Nzapa ti mo. Fade mbi yeke kiri ti sara si mo lango na gbe ti da ti bongo tongana ti alango so lani mbi na mo, e wara tere so.

¹¹Mbi tene tënë na awayanga-Nzapa, mbi sara si ala baa aye mingi na ya ti mbeni ye tongana bango-li. Na lege ti awayanga-Nzapa, mbi tene tënë na lege ti atoli.

¹²Azo ti Galaad ayeke taa azo ti sarango sioni; mbeni zo ti ala akiri angba pepe. Na Gilgal, ala mu *sandaga ti akoli-bagara gbani gbani; me fadeso agbalaka ti ala ayeke tongana gba ti atêne na yaka.”

¹³Jacob akpe ague na sese ti Mezopotamii ti nduzu, Israel asara kua na mbeni koli titene lo wara wali. Ndali ti wali, lo ga zo ti batango anyama.

¹⁴Me na lege ti mbeni wayanga-Nzapa, KOTA GBIA amu Israel na kodro ti Ezipte asigigi na lo; na lege ti mbeni wayanga-Nzapa laa KOTA GBIA abata lo.

¹⁵Azo ti Efraim asara ye ti songo be mingi na Nzapa. Me mene so ala tuku nga na zongango ndo ti ala, Kota Gbia ti ala ayeke kiri na tënë ni na li ti ala.