Read sango Osée 13 Bible Online

Osée 13 - sango bible

Osée 13

¹Tongana Efraim ayeke tene lani tënë, tënë ti lo ayeke zia mbeto mingi na be ti azo na Israel. Me na lege ti vorongo nzapa *Baal, tënë ati na ndö ti lo si lo kui.

²Ti fadeso, azo ti Efraim angba ti sara siokpari: ala kporo wen si asara na anzapa nde, ala mu wen ti nginza ti ala si na lege ti kode ti ala, ala sara na ayanda. Ye so kue ayeke ye ti maboko ti awakode-kua. Ndali ti anzapa ni, azo ayeke tene: “Azo, ala mu asandaga na anzapa ni!” Azo ayeke su ngbangba ti akete bagara!

³Ndani laa, fade ala yeke ga tongana mbinda ti ndaperere, tongana ngu ti pere ti ndaperere so ayeke hon hongo, tongana pere so pupu amu na ndö ti lakere, ahon na ni yongoro, tongana guru ti wâ so ayeke sigigi na li ti da ahon.

⁴“Mbi laa, mbi yeke *KOTA GBIA, Nzapa ti mo, Israel, ti to nda ni na sese ti Ezipte ngbii asi fadeso. Mo hinga mbeni Nzapa nde pepe, gi mbi oko; mbeni wasongo mo ayeke daa pepe, gi mbi oko.

⁵Mbi, mbi hinga mo na benyama, na sese so ndo-wâ na holengo ndo ayeke daa mingi so.

⁶Gi so mo si na ndo ti tengo pere awe, mo te pere ya ti mo asi. So ya ti mo asi awe, baba ahon ndö ti mo; ndani laa be ti mo agirisa na mbi.

⁷Tongaso mbi ga tongana bamara ndali ti ala; tongana ze so ahonde tere ti lo na tere ti lege si mbi yeke ku ti gbu ala.

⁸Mbi yeke ti na ndö ti ala tongana mama ti *urse so azo agbu amolenge ti lo ahon na ala; mbi yeke suru ya ti kate ti ala. Na ndo so mbi yeke daa, mbi yeke mene ala tongana ti mama ti bamara; anyama ti ngonda ayeke suru ya ti ala kete kete.

⁹“Mo Israel, ye so abuba mo, ayeke ti so mo ke mbi awe, mbi so mbi lingbi fade ti mu maboko na mo so.

¹⁰Tongaso, gbia ti mo ni ayeke na ndo wa titene lo soo mo na kuâ? Na ya ti agbata ti mo kue, azo ti li ni ayeke na ndo wa, ala so lani mo yeke tene tënë ti ala, mo tene: ‘Mu na mbi mbeni gbia na amakonzi’ so?

¹¹Na ya ti ngonzo ti mbi, mbi mu na mo mbeni gbia; na ya ti sioni ngonzo ti mbi, mbi zi lo na maboko ti mo.

¹²“A bata sioni ti azo ti Efraim na mbeni ndo, zo oko alingbi ti zi ni kâ pepe; a zia siokpari ti ala na mbeni ndo si a bata ni batango.

¹³Fade songo ya ti wali so aga nduru ti du ayeke kiri na ndö ti ala; me molenge ni ahinga ndo pepe: so ndembe ti dungo lo alingbi awe, lo ke ti sigigi na ya ti mama ti lo.

¹⁴Mbi KOTA GBIA, azo tongaso, mbi lingbi ti gboto ala na ndo ti akuâ ti sigigi na ala? Mbi lingbi ti soo ala na kuâ? Kuâ, ye so mo yeke fâ azo na ni so ayeke na ndo wa? Ndo ti akuâ, ngangu so mo yeke hunzi azo na ni so ayeke na ndo wa? Fade mbi yeke baa mawa ti Efraim oko pepe.

¹⁵Ataa Efraim awara anzoni ye mingi na popo ti a-ita ti lo, fade pupu ti To ayeke ga, pupu ti KOTA GBIA so alondo na benyama ayeke ga. Pupu ni ayeke sara si li ti ngu ayeke hole, du ti ngu ayeke hole kasakasa. Fade a yeke nzi anzoni ye so kue ayeke na ya ti da ti batango mosoro ti lo.