Read sango Osée 4 Bible Online

Osée 4 - sango bible

Osée 4

¹Azo ti Israel, ala ma tënë ti *KOTA GBIA: KOTA GBIA ayeke na ngbanga na azo ti kodro, ngbanga ti so na ya ti kodro ni, tenengo taa-tënë ayeke daa pepe, ndoye ayeke daa pepe, hingango Nzapa ayeke daa pepe.

²Ye so ahon ndoni na ya ti kodro ni ayeke dengo ba ti mvene, handango zo, fango zo, nzi, gingo wali wala gingo koli ti zo, tukungo mene na peko ti tere, na peko ti tere.

³Ndani laa fade ndo ayeke hole kue na ya ti kodro ni, azo ti kodro ni kue ayeke nge ngengo, ala, na anyama ti ngonda na andeke ti nduzu; ataa asusu ti kota ngu-ingo ayeke hunzi kue.

⁴*KOTA GBIA atene: “Hange! Ayeke nzoni zo oko abi tënë na li ti mba ti lo pepe, zo oko asuku na mba ti lo pepe. Me mo wayango-sandaga laa, mbi yeke bi tënë na li ti mo.

⁵Na kota lâ, fade mo yeke pika gere ti mo ti ti, na bi, mo na wayanga-Nzapa ayeke pika gere ti ala ti ti; mbi yeke sara si mama ti mo akui.

⁶Azo ti mbi ayeke kui, ngbanga ti so ala hinga mbi pepe. So mo ke ti hinga mbi, fade mbi nga, mbi yeke ke mo, mo yeke kiri ti duti wayango-sandaga ti mbi pepe. So be ti mo agirisa na ye so Nzapa ti mo afa, fade be ti mbi nga ayeke girisa na amolenge ti mo.

⁷“Awayango-sandaga kue kue kue asara siokpari so ake mbi; fade mbi yeke sara si nengo ti kua ti ala aga kota ye ti kamene.

⁸Ala yeke te asandaga so azo ti mbi amu ndali ti siokpari ti ala wani. Nilaa nzara ti be ti awayango-sandaga kue ayeke titene azo ti mbi asara asioni ye.

⁹Oko ye so ayeke si na azo ti mbi, ni laa ayeke si na awayango-sandaga. Fade mbi yeke kiri na ala peko ti sioni dutingo ti ala, mbi yeke kiri na ala peko ti sioni sarango ye ti ala.

¹⁰Ala yeke te kobe, me ya ti ala ayeke si pepe; ala yeke sara aye ti ndumba, me ala yeke du amolenge pepe, ngbanga ti so ala ke ti ne KOTA GBIA.

¹¹“Sarango ye ti ndumba na nyongo samba asara si li ti ala atomboka.

¹²Azo ti mbi ayeke hunda yanda ti ala ti keke si nduru keke laa ayeke kiri tënë na ala. Biani, yingo ti sarango ye ti ndumba asara si ala girisa lege. Na sarango ye ti ndumba ni, ala yeke gue yongoro na Nzapa ti ala.

¹³Ala yeke mu *sandaga na li ti akota hoto, ala yeke zö dukani na li ti akete hoto, na gbe ti akeke ti shene, ti peplie na ti terebente; gbe ti de ti akeke ni ayeke pendere mingi! Ndani laa amolenge ti ala ti wali ayeke sara ye ti ndumba si awali ti amolenge ti ala ayeke gi akoli ti amba ti ala.

¹⁴Me fade mbi yeke kiri peko ti sioni na amolenge ti ala ti wali pepe ndali ti sarango ye ti ndumba ti ala, wala mbi yeke kiri peko ti sioni na awali ti amolenge ti ala pepe ndali ti akoli ti amba ti ala so ala yeke gi so. Me mbi yeke kiri peko ti sioni na ala, awayango-sandaga, ngbanga ti so ala wani, ala yeke mu awali-ndumba so, ala yeke hon na ala na mbeni ndo si ala na awali-ndumba ni ayeke te kobe so a mu na sandaga na anzapa. Mbeni mato atene: ‘Mara so ahinga ndo pepe ayeke mara so ati awe.’

¹⁵“Tongana mo Israel, mo sara ye ti ndumba, ayeke nzoni Juda asara gi mara ti sioni ye so pepe. Ala gue na Gilgal pepe, ala gue na Bet-Aven pepe si ala deba yanga ti ala pepe, atene: ‘KOTA GBIA ayeke na fini!’ ”

¹⁶Biani, Israel asara ngangu li tongana mama ti bagara so ake ti tambula. Fadeso, KOTA GBIA alingbi ti sara na azo ti lo tongana ti akete taba so a zia ala na ndo ti tengo pere?

¹⁷Azo ti Efraim abongbi na ayanda; zia ala!

¹⁸So ala nyon samba ahon ndö ti ala awe, ala kiri ti sara gi aye ti ndumba; amakonzi ti ala aye ti sara gi aye ti kamene mingi.

¹⁹Fade pupu ayeke rule ala ti hon na ala si kamene ayeke sara ala ndali ti asandaga so ala yeke mu ni so.