Read sango Osée 9 Bible Online

Osée 9 - sango bible

Osée 9

¹Israel, duti na ngia gbani gbani pepe tongana ti ambeni mara. Biani, mo sara aye ti ndumba si mo gue yongoro na Nzapa ti mo awe; mo ye ti wara futa ti mo ndali ti aye ti ndumba na ndö ti alakere so kue a yeke pika ale ti *ble daa.

²Me ale ti ble so a yeke pika na ndö ti alakere nga na mafuta so a yeke pete na ya ti du ayeke sara si ya ti mo asi pepe; fini vin so mo yeke ku, mo yeke ku ni gbaa.

³Fade azo ti Efraim ayeke ngba na ya ti kodro ti *KOTA GBIA pepe; ala yeke kiri na sese ti Ezipte si na sese ti Asirii, ala yeke te kobe so ayeke *sioni.

⁴Kâ, fade ala yeke tuku vin kete na sese ti mu na *sandaga na KOTA GBIA pepe; sandaga ti ala ni ayeke nzere na be ti lo pepe. Kobe ti ala ayeke duti tongana kobe so azo ayeke te na ngoi ti ye ti vundu; azo so kue ayeke te ni, ala yeke ga *sioni. Kobe ti ala ni ayeke kai nzara ti ala, me ala lingbi ti li na ni na ya ti kota da ti KOTA GBIA pepe.

⁵Na lango ti kota bongbi, na lango ti kota matanga ti KOTA GBIA, fade ala yeke sara tongana nyen?

⁶Baa, ala yeke kpe kodro ti ala so abuba so, Ezipte laa ayeke yamba ala; me gbata ti Manfis ayeke ga ndo ti lungo ala. Fade akeke ti ki ayeke kanga ndö ti mosoro ti ala ti kota nginza, akamba ti ki ayeke kanga ndö ti ada ti lango ti ala.

⁷Ngoi titene Nzapa aga ti kiri na ala peko ti sioni ti ala alingbi awe, ngoi ti futango ala alingbi awe; ayeke nzoni azo ti Israel ahinga ni. Ala yeke tene: “Li ti wayanga-Nzapa so atomboka awe! Zo so ayeke na yingo so ayeke tene tënë kirikiri!” Biani, li ti mbi atomboka ndali ti gba ti sioni ti ala nga ndali ti kota sioni be ti ala.

⁸Zo so ayeke sara sanziri ti azo ti Efraim ayeke mbi wayanga-Nzapa. Mbi yeke nduru na Nzapa ti mbi. Me azo ayeke zia kuku ti gbu na mbi na ndö ti alege so kue mbi yeke hon daa. Ataa na ya ti da ti Nzapa ti mbi, ala yeke sara ngangu na mbi.

⁹Ala linda lindango na ya ti sarango sioni ye tongana ti so ala sara ando na Gibea. Me fade Nzapa ayeke dabe ti lo na sioni ti ala, lo yeke ga ti kiri peko ti sioni na ala ndali ti asiokpari ti ala.

¹⁰KOTA GBIA atene: “Ando, mbi wara Israel tongana nzerengo ale ti *vinye na benyama. Mbi wara akotara ti ala tongana akozo nzoni le ti keke so asigigi na li ti keke ti fige. Me so akotara ti ala asi na Bet-Peor awe, ala mu tere ti ala kue na *Baal, nzapa ti kamene. Nilaa ala ga sioni mingi tongana anzapa so ala ye tënë ti ala so.

¹¹Fadeso, gonda ti azo ti Efraim ayeke huru ti hon tongana ti so ndeke ayeke huru: awali ti ala ayeke kiri ti du pepe, ala yeke kiri ti duti na ngo pepe, ala yeke kiri ti mu ngo pepe.

¹²Ataa ala yeke bata amolenge-koli, mbi yeke kanga lege na ala titene ala kono. Biani, mawa na ala, azo ti Efraim, tongana mbi hon yongoro na tere ti ala!

¹³Efraim, na bango lo so mbi yeke baa lo lani na mbage ti Tir kâ, lo yeke tongana keke so a lu ni na nzoni sese. Me alingbi Efraim amu amolenge ti lo titene a fâ ala.”

¹⁴KOTA GBIA, sara na ala… Fade mo yeke sara na ala nyen? Sara si ngo akiri angba na ya ti ala pepe si me ti ala ahole holengo!

¹⁵“Na Gilgal laa asioni ti ala kue asigigi polele; kâ laa be ti mbi ake ala. Ndali ti asioni sarango ye ti ala, fade mbi yeke tumba ala na da ti mbi, mbi yeke kiri ti ye ala pepe; amakonzi ti ala kue ayeke azo ti ngangu li.

¹⁶A pika Efraim awe; lo yeke tongana keke so agunda ni ahole awe si ayeke kiri ti le pepe. Ataa lo du amolenge, fade mbi yeke sara si amolenge ti ya ti lo so lo ye ala mingi so akui.”

¹⁷Fade Nzapa ti mbi ayeke ke ala, ngbanga ti so ala ma lo pepe. Fade ala yeke tambula kirikiri na popo ti amara nde.