Read sango Joël 2 Bible Online

Joël 2 - sango bible

Joël 2

¹Ala huru didi na ndö ti hoto ti *Sion, ala dekongo ngangu na ndö ti hoto ti mbi so ayeke nde si ayeke nzoni kue so! Ala azo ti kodro, ayeke tere ti ala ado, ngbanga ti so *lango ti KOTA GBIA ayeke ga, lango ni aga nduru awe.

²Lango ni ayeke lango ti vukongo ndo, lango so ndo avuko pitipiti; lango ti ambinda na lango ti vuko mbinda. Baa, agbadola gbani gbani ayeke ga, ala yeke na ngangu, ala yeke tongana vukongo ndo so ayeke mu ndö ti ahoto kue. Ade zo abaa mara ti ye tongaso laoko pepe, zo ayeke kiri ti baa ni laoko pepe, ngbii asi na azo so ayeke du ala gbanda na peko, yongoro kâ.

³Na dawa ti ala, wâ ayeke gbi ye kue, na peko ti ala, menga ti wâ ayeke gbi ye kue. Kozoni si ala ga, sese ayeke tongana yaka ti Eden; na peko ti ala, sese ni aga tongana benyama, ndo so ye kue abuba daa; mbeni ye so ala zia angba ayeke daa pepe.

⁴Ala kpa ambarata; ala yeke kpe loro tongana ambarata ti bira.

⁵Ala yeke huru na ndö ti ahoto si toto ti hurungo ti ala ni ayeke tongana toto ti apusu ti mbarata; tongana toto ti menga ti wâ so ayeke gbi holengo pere. Ala yeke londo ti ga tongana angangu turugu so aleke tere ti ala na molongo ti tiri bira.

⁶Na singo ti ala, kota mbeto ayeke gbu azo; le ti ala kue asanze na mbeto.

⁷Agbadola ni akpe loro tongana angangu zo ti bira; ala huru na ndö ti gbagba tongana aturugu. Zo oko oko atambula gi na dawa ti lo, lo mu mbeni lege nde pepe.

⁸Zo oko apusu mba ti lo pepe; zo oko oko atambula gi na ndö ti lege ti lo. Ala yeke hon hongo, ala kpe ale ti kokora pepe, mbeni ye ti kanga lege na ala ayeke daa pepe.

⁹Ala mu ya ti gbata kue, ala yeke kpe loro na ndö ti agbagba ti bira, ala yeke ko na li ti ada; ala yeke li na ya ti ada na le ti afenetere tongana azo ti nzi.

¹⁰Na singo ti ala, sese ayingi, le ti nduzu ado ngangu; le ti lâ na ti nze avuko pitipiti si atongoro akiri aza pepe.

¹¹Na dawa ti aturugu ti lo, KOTA GBIA asara si azo ama go ti lo. Aturugu so ayeke ma yanga ti lo ayeke gbani gbani si ala yeke na ngangu. Biani, lango ti KOTA GBIA ayeke kota lango mingi, lango so ayeke zia kota mbeto na be ti zo. Zo wa laa alingbi ti kanga be ti lo na ni, zo wa?

¹²So tënë ti yanga ti *KOTA GBIA laa: “Fadeso, ngoi titene ala kiri na mbage ti mbi na be ti ala kue laa; ala ke kobe ti sambela, ala toto, ala dema tere ti ala na mbi!

¹³Ala suru bongo ti ala pepe, me ala suru be ti ala.” Biani, ala kiri na KOTA GBIA, Nzapa ti ala; lo yeke sara nzoni be na zo si lo yeke baa mawa ti zo, lo yeke sara ngonzo hio hio pepe, nzoni be ti lo asi singo. Sioni so lo leke na be ti lo ti sara na zo, lo yeke ke ti sara ni.

¹⁴E hinga pepe, fade lo yeke zia lege ti sara ye so lo leke na be ti lo ti sara. Fade lo yeke sara tufa na ndö ti ala si ala lingbi ti mu *sandaga ti *ble na ti samba na KOTA GBIA, Nzapa ti ala.

¹⁵Ala huru didi na ndö ti hoto ti *Sion, ala mu yanga titene azo azia mbeni lango nde ti ke kobe ti sambela Nzapa; ala iri azo ti bongbi ti voro Nzapa,

¹⁶ala bongbi azo ti kodro, ala iri azo ti bongbi ndali ti Nzapa. Ala bongbi ambakoro, ala bongbi amaseka nga na akete molenge so angba ti nyon me. Ayeke nzoni koli na wali so amu tere fini ni alondo na ya ti kubu ti ala asigigi.

¹⁷Ayeke nzoni awayango-sandaga so ayeke sara kua ti *KOTA GBIA, ala luti na popo ti yanga ti da na gbalaka, ala toto. Ala voro tere ti ala na Nzapa, atene: “KOTA GBIA, baa mawa ti azo ti mo, sara si kamene agbu le ti azo ti mo pepe si amara nde ahe ala pepe. Ngbanga ti nyen si azo alingbi ti tene na popo ti amara nde, atene: ‘Nzapa ti ala ni ayeke na ndo wa?’ ”

¹⁸Yengo so *KOTA GBIA aye na kodro ti lo so agbu be ti lo mingi, lo baa mawa ti azo ti lo.

¹⁹Lo kiri tënë na azo ti lo, lo tene: “Baa, mbi yeke kiri ti mu na ala *ble, fini vin nga na nzoni mafuta. Ala yeke wara ni gbani gbani alingbi na ala. Mbi yeke kiri ti sara si amara nde azia kamene na le ti ala pepe.

²⁰Wato ti ala so alondo na Banga si aga, fade mbi yeke tumba lo yongoro na tere ti ala; mbi yeke tumba lo titene lo gue na ndo so ngu ayeke daa pepe si ye oko ayeke daa pepe. Aturugu so ayeke na dawa ti lo, mbi yeke bi ala na ya ti kota ngu-ingo so ayeke na mbage ti To; aturugu so ayeke na peko ti lo, mbi yeke bi ala na ya ti kota ngu-ingo ti Mediterane na mbage ti Do; fade kuâ ti ala ayeke fun sioni, ayeke fun amu ndo kue. Biani, lo sara akota ye.”

²¹Sese, mo sara mbeto pepe, me mo dodo na ngia, mo duti na ngia, ngbanga ti so KOTA GBIA asara akota ye.

²²Ala anyama ti ngonda, ala sara mbeto pepe; apere ti ngonda ayeke sigigi, akeke ayeke le, akeke ti fige na ayaka ti *vinye ayeke le mingi.

²³Ala azo so ayeke lango na *Sion, ala dodo na ngia, ala duti na ngia ndali ti KOTA GBIA, Nzapa ti ala. Na peko ti buru, lo yeke tokua na ala ngu-Nzapa ti zi ala na ya ti kpale, lo yeke tokua na ala ngu-Nzapa alingbi na angoi ni tongana ti kozoni.

²⁴Fade ya ti agogoro ayeke si singo na ble, akota tawa ayeke si singo na fini vin nga na nzoni mafuta.

²⁵KOTA GBIA atene: “Lani mbi tokua gba ti akete nyama ti bubango ye na tere ti ala si ala te akobe ti ala: angadi, akinda-gozo, akete gbadola na akota gbadola. Fadeso mbi yeke kiri na ala aye so anyama ni abuba na ya ti angu so ahon so.

²⁶Fade ala yeke te kobe, ya ti ala asi, ala yeke sepela KOTA GBIA, Nzapa ti ala, lo so lo sara akota ye ndali ti ala so. Kamene ayeke kiri ti gbu le ti azo ti mbi laoko pepe.

²⁷Tongaso, fade ala yeke hinga atene, mbi yeke na popo ti ala, azo ti Israel, mbi laa mbi yeke KOTA GBIA, Nzapa ti ala; mbeni nzapa nde ayeke daa pepe. Kamene ayeke kiri ti gbu le ti azo ti mbi laoko pepe.”