Read sango Amos 3 Bible Online

Amos 3 - sango bible

Amos 3

¹Ala azo ti Israel, ala azo ti sewa so *KOTA GBIA asara si ala sigigi na Ezipte, ala ma tënë so lo tene na tere ti ala, lo tene:

²“Na popo ti asewa kue ti sese so, gi ala oko laa mbi soro ala. Ndani laa fade mbi yeke hunda na ala titene ala fa na mbi peko ti asioni ye so kue ala sara.”

³Tongana azo use ama tere kozoni pepe, ala lingbi ti tambula na lege gere oko?

⁴Tongana bamara ade ti wara nyama ti te pepe, lo lingbi ti toto na ya ti gbako? Tongana kete bamara ade ti gbu nyama pepe, lo lingbi ti toto na ndo so lo lango daa?

⁵Tongana a zia mbeni kobe na yanga ti kuku pepe, ndeke alingbi ti ti na ya ti kuku ni? Tongana kuku agbu mbeni ye pepe, lo lingbi ti londo na nduzu?

⁶Tongana a huru didi na ya ti mbeni gbata ti fa tënë ti bira, fade mbeto alingbi ti gbu azo pepe? Tongana kpale asi na ya ti mbeni gbata, *KOTA GBIA laa asara ye ni pepe?

⁷Biani, kozo titene Kota Gbia NZAPA asara mbeni ye, lo yeke fa tënë ti be ti lo na azo ti kua ti lo, awayanga-Nzapa.

⁸Bamara ayeke toto, zo wa laa alingbi ti sara mbeto pepe, zo wa? Kota Gbia NZAPA ayeke tene tënë, zo wa laa alingbi ti ke ti tene peko ti tënë ti yanga ti lo, zo wa?

⁹Na ndö ti ayangbo ti gbata ti Asdod, ala dekongo; na ndö ti ayangbo ti Ezipte, ala dekongo, ala tene: “Ala bongbi tere ti ala na ndö ti ahoto ti Samarii, ala baa gba ti wusuwusu so azo ayeke sara na aye ti ngangu so azo ayeke sara na amba ti ala na ndö ti ahoto ni!”

¹⁰“Azo ti Samarii ahinga ti sara ye ti mbirimbiri oko pepe. Ala bongbi na ya ti ayangbo ti ala aye so ala mu na maboko ti azo na ngangu nga na aye so ala nzi nzingo”; so tënë ti yanga ti *KOTA GBIA laa.

¹¹Ndani laa, tënë so Kota Gbia NZAPA atene ayeke so: “Fade awato ayeke ngoro gbata ti Samarii, ala yeke kungbi ngangu gbagba ti mo na sese, ala yeke nzi aye ti ya ti ayangbo ti mo kue.”

¹²Tënë so KOTA GBIA atene ayeke so: “Tongana ti so wabatango-taba ayeke gboto gi gere use wala nduru mê ti taba na yanga ti bamara so agbu mbeni taba, gi mara ti ye so laa ayeke si ande na azo ti Israel so ayeke lango na gbata ti Samarii; azo ti Israel so ayeke lango na ya ti ayongoro ngende, wala na ndö ti apendere gbogbo so, fade a yeke soo gi ambeni oko oko.”

¹³So tënë ti yanga ti Kota Gbia NZAPA laa, lo so lo yeke na ndö ti dunia kue, lo tene: “Ala ma tënë so, ala fa peko ti tënë so lo tene na tere ti *ahale ti Jacob:

¹⁴Na lango so mbi yeke ga na tere ti azo ti Israel ndali ti asioni sarango ye ti ala, gi na lango so laa mbi yeke ga ti buba agbalaka so ayeke na Betel; fade a yeke kungbi adidi ti gbalaka ni si ala yeke ti na sese.

¹⁵Ada ti ala so ala leke ndali ti ngoi ti buru na ada ti ala so ala leke ndali ti ngoi ti ngu-Nzapa, fade mbi yeke kungbi ni kue na sese. Ada so ala sara na apembe ti doli, na akota da ni ayeke tuku kue na sese!” So tënë ti yanga ti KOTA GBIA laa.