Read sango Abdias 1 Bible Online

Abdias 1 - sango bible

Abdias 1

¹So ayeke ye so Abdias abaa na ya ti mbeni ye tongana bango-li. Tënë so Kota Gbia NZAPA atene na ndö ti azo ti mara ti Edom laa. *KOTA GBIA atokua mbeni zo na popo ti amara nde, e ma zo ti tokua ni atene: “Ala londo, e gue, e ti na ndö ti gbata ni! E tiri bira!”

²KOTA GBIA atene: “Edom, fade mbi yeke sara titene mo ga kete na popo ti amara. Azo kue ayeke baa mo tongana mbumbuse ye.

³Baba ti mo so mo yeke sara mingi so ahanda ala awe! Mo yeke lango na popo ti akota têne, mo sara ndo ti lango ti mo na ndo so ayeke na nduzu si mo yeke tene na be ti mo, mo tene: ‘Zo wa laa alingbi ti mu mbi ti bi mbi na sese, zo wa?’

⁴Ataa mo huru na nduzu tongana *ngoalo, ataa mo sara da ti mo kâ na popo ti atongoro, fade mbi yeke mu mo kâ ti bi mo na sese”; so tënë ti yanga ti KOTA GBIA laa.

⁵Tongana azo ti nzi asi na ndo ti mo, wala azo so ayeke gbu ye ti azo na ngangu asi na ndo ti mo na bi, fade ala yeke zia mo kpoo? Ala yeke mu aye alingbi na ala pepe? Tongana azo ti fango ale ti *vinye asi na ndo ti mo, fade ala yeke zia tanga ti ale ti vinye ni?

⁶Biani, azo agi ya ti da ti Ezau kue awe! Mosoro ti lo so lo honde ni so, azo awara ni si ala sigigi na ni awe!

⁷Azo so kue mo na ala aga *ambuki so, ala tumba mo na ya ti kodro ti mo. Azo so mo na ala aye tere mingi so, ala handa mo si ala hon ndö ti mo. Azo so ayeke te lani kobe ti mo so, ala zia kuku na lege ti mo ti gbu na mo. Azo ni ayeke tene: “Lo hinga ndo pepe!”

⁸So tënë ti yanga ti KOTA GBIA laa: Biani, na lango ni so, fade mbi yeke zi azo ti ndara na kodro ti Edom; mbi yeke zi hingango ndo na ndö ti hoto ti Ezau.

⁹Ti mo, gbata ti Teman, fade mbeto ayeke hon ndö ti angangu turugu ti mo. Nilaa fade a yeke fâ akoli kue ti ndö ti hoto ti Ezau.

¹⁰“Ala azo ti Edom, ndali ti ngangu so ala sara ando na a-ita ti ala *ahale ti Jacob, fade kamene ayeke gbu le ti ala si ti ala ayeke hunzi biani biani.

¹¹Na lango so awato agbu aturugu ti a-ita ti ala ti hon na ala, ala yeke lani daa. So lani awande ali na ya ti gbata ti Jérusalem si ala bi mbeni ye ti baa lege so ala lingbi ti kangbi ya ti amosoro ti gbata ni, ala azo ti Edom nga, ala sara ye tongana ti azo ni.

¹²Na lango so aye ti ngangu asi na a-ita ti mo, azo ti Juda, mo Edom, tere ti mo alingbi fade ti nzere pepe. Na lango so a yeke buba kodro ti Juda, mo lingbi fade ti duti na ngia pepe. Na lango so ye ti mawa asi na ala, mo lingbi fade ti zonga ala pepe.

¹³Na lango so aye ti azo ti mbi abuba, mo lingbi fade ti li na ya ti gbata ti ala pepe. Na lango so aye ti azo ti mbi abuba si ye ti vundu asi na ala, taa ti mo ni, tere ti mo alingbi fade ti nzere pepe. Na lango so aye ti azo ti mbi abuba, mo lingbi fade ti ndu mosoro ti ala pepe.

¹⁴Mo lingbi fade ti luti na asangbi-lege pepe titene mo fâ azo so ayeke kpe so. Na lango ti ye ti mawa, tanga ti azo so akpe si angba na fini so, mo lingbi fade ti ka ala na awato pepe.

¹⁵Biani, lango ni aga nduru awe, lango so *KOTA GBIA ayeke fâ ngbanga na li ti amara kue. Ye so mo sara na azo, gi ni laa a yeke sara ande na mo. Fade asioni sarango ye ti mo ayeke kiri na li ti mo wani.”

¹⁶“Lani ala, azo ti Israel, ala nyon kopo ti ngonzo ti mbi na ndö ti hoto ti mbi so ayeke nde si ayeke nzoni kue; legeoko nga, fade amara nde ayeke nyon ni, ala wu tere ti ala pepe. Ala yeke nyon ngbii, ala sule si ala ga tongana azo so a du fade ala pepe.

¹⁷Me azo so akpe si angba na fini, fade ala ayeke honde tere ti ala na ndö ti hoto ti *Sion; hoto ni ayeke kiri ti ga ndo so ayeke nde si ayeke nzoni kue. Fade *ahale ti Jacob ayeke kiri ti mu sese ti ala na maboko ti azo so amu ni lani so.

¹⁸Fade ahale ti Jacob ayeke ga tongana wâ si ahale ti Joseph ayeke ga tongana menga ti wâ. Me ahale ti Ezau ayeke ga tongana holengo pere so a zia wâ daa si agbi kue. Fade mbeni zo oko ti mara ti Ezau ayeke ngba na fini pepe.” *KOTA GBIA laa atene tënë so.

¹⁹Azo ti Juda so ayeke lango na mbage ti Mbongo ayeke mu hoto ti Ezau. Ala so ayeke lango na *Kodro-ti-gbeni ayeke mu sese ti Filistii, sese ti Samarii, sese ti Efraim. Azo ti Benjamin ayeke mu ti ala sese ti Galaad.

²⁰Azo ti Israel so a gbu ala na ngbaa ayeke ga tongana gba ti aturugu si ayeke mu sese so alondo na Kanaan ague ngbii asi na Sarepta. Azo ti Jérusalem so a gbu ala na ngbaa si a gue na ala na Sefarad ayeke mu agbata so ayeke na mbage ti Mbongo.

²¹Azo so azi amba ti ala na gbe ti ngbaa ayeke gue na ndö ti hoto ti Sion titene ala sara komandema na ndö ti azo so ayeke lango na ndö ti hoto ti Ezau. Fade lengo-gbia ayeke ti KOTA GBIA!