Read sango Jonas 4 Bible Online

Jonas 4 - sango bible

Jonas 4

¹Ye ni so anzere na be ti Jonas oko pepe si lo sara ngonzo.

²Lo sambela *KOTA GBIA, lo tene: “Âa! KOTA GBIA, tënë so lani mbi tene na be ti mbi na ndembe so mbi yeke na kodro ti mbi so, ni laa asi so pepe? Mbi hinga lani mbi tene, mo yeke Nzapa so mo yeke sara nzoni be na zo si mo yeke baa mawa ti lo; mo yeke sara ngonzo hio hio pepe si nzoni be ti mo asi singo. Mo yeke lakue nduru ti zia lege ti sioni so mo ye ti sara na zo. Ndani laa, mbi londo lani ti kpe hio ti gue na Tarsis.

³Fadeso, KOTA GBIA, mo zi fini ti mbi! Titene mbi kui, ayeke nzoni ahon titene mbi ngba na fini.”

⁴KOTA GBIA ahunda Jonas, atene: “So mo yeke sara ngonzo so, ayeke na legeni laa?”

⁵Jonas asigigi na ya ti gbata ni ti duti na mbage ti To. Lo sara mbeni kpangba ti duti na gbe ni si lâ asu lo pepe. Lo duti kâ ti baa ye so ayeke si ande na ya ti gbata ni.

⁶KOTA GBIA Nzapa asara si mbeni kete keke asigigi ayo ahon li ti Jonas titene Jonas aduti na gbe ni si lâ asu lo pepe. Nzapa asara tongaso titene be ti Jonas ade. Be ti Jonas anzere ahon ndoni ndali ti kete keke so.

⁷Me lango oko na pekoni, na yanga ti ndaperere, Nzapa atokua mbeni kete kete nyama ti ga ti kpo keke ni si keke ni ahole.

⁸Na pekoni, so lâ asigigi awe, Nzapa asara si mbeni kota pupu ti To so ayeke wâ mingi alondo si ayeke ya ngangu ngangu. Lâ asu Jonas ngangu, angba kete ka lo hon na ndö ti yingo ti lo. Jonas airi kuâ na tere ti lo, lo tene: “Titene mbi kui, ayeke nzoni ahon titene mbi ngba na fini.”

⁹Nzapa atene na Jonas: “So mo yeke sara ngonzo ndali ti keke so, ayeke na legeni laa?” Jonas akiri tënë: “Een, ayeke na legeni so mbi sara ngonzo ngbii si mbi ye ti kui so.”

¹⁰Tongaso KOTA GBIA atene na Jonas: “Ma mbi si! Keke so, mo laa mo sara si asigigi si akono pepe; mo sara nga mbeni kua daa pepe; keke ni asigigi na bi oko si gi na bi oko ahole. Tënë ti keke ni aso be ti mo tongaso ngbanga ti nyen?”

¹¹Ti mo, mo ye fade titene mbi baa mawa ti azo ti Ninive pepe? Ninive, kota gbata so wungo ti azo ti ya ni ahon saki ngbangbo oko na baleuse, azo ni ahinga ti kangbi popo ti ye ti nzoni na ye ti sioni pepe; anyama nga ayeke na ya ni gbani gbani.