Read sango Wungo ti azo 1 Bible Online

Wungo ti azo 1 - sango bible

Wungo ti azo 1

¹Na kozo lango ti use nze ti use ngu ni, na peko ti so azo ti Israel asigigi na kodro ti Ezipte si ala yeke na ya ti benyama ti Sinai, *KOTA GBIA atene tënë na Moïse na ya ti da ti bongo so KOTA GBIA na azo ti lo ayeke wara tere daa. Lo tene na Moïse:

²“Mo na Aaron, ala diko wungo ti bongbi ti azo ti Israel kue na lege ti akete mara ti ala oko oko, na lege ti asewa ti ala oko oko; ala su na mbeti iri ti akoli oko oko kue.

³Ala diko wungo ti akoli so kue ngu ti ala alingbi baleuse na ala so ngu ti ala ahon baleuse; ala so alingbi ti sara kua ti turugu si ala yeke na ya ti bongbi ti aturugu nde nde ti azo ti Israel.

⁴Ayeke nzoni makonzi ti sewa oko, na ya ti mara oko oko amu maboko na ala.

⁵Iri ti azo ni ayeke so: ti mara ti Ruben: Elisur, molenge ti Shedeur;

⁶ti mara ti Siméon: Shelumiel, molenge ti Surishadai:

⁷ti mara ti Juda: Nashon, molenge ti Aminadab;

⁸ti mara ti Isakar: Netaneel, molenge ti Suar;

⁹ti mara ti Zabulon: Eliab, molenge ti Helon;

¹⁰ti mara ti Efraim, molenge ti Joseph: Elishama, molenge ti Amihud; ti mara ti Manase, molenge ti Joseph: Gamliel, molenge ti Pedasur;

¹¹ti mara ti Benjamin: Abidan, molenge ti Gidoni;

¹²ti mara ti Dan: Ahiezer, molenge ti Amishadai;

¹³ti mara ti Aser: Pagiel, molenge ti Okran;

¹⁴ti mara ti Gad: Eliasaf, molenge ti Deuel;

¹⁵ti mara ti Neftali: Ahira, molenge ti Enan.”

¹⁶So ayeke iri ti amakonzi ti amara nde nde so a soro ala, ala yeke nga amakonzi ti abongbi nde nde ti gba ti aturugu ti Israel.

¹⁷Moïse na Aaron amu azo so a iri ala so titene azo ni amu maboko na ala.

¹⁸Na kozo lango ti use nze ni, ala iri azo ti Israel kue ti bongbi tere ti ala na ndo oko. Tongaso azo ti Israel adiko wungo ti ala na lege ti akete mara ti ala oko oko, asewa ti ala oko oko; ala su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse.

¹⁹Moïse adiko wungo ti azo ti Israel na ya ti benyama ti Sinai alingbi na yanga so KOTA GBIA amu na lo.

²⁰Ti *ahale ti Ruben, kozo molenge ti Jacob, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

²¹Wungo ti ala kue ayeke: 46 500.

²²Ti ahale ti Siméon, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

²³Wungo ti ala kue ayeke: 59 300.

²⁴Ti ahale ti Gad, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

²⁵Wungo ti ala kue ayeke: 45 650.

²⁶Ti ahale ti Juda, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

²⁷Wungo ti ala kue ayeke: 74 600.

²⁸Ti ahale ti Isakar, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

²⁹Wungo ti ala kue ayeke: 54 400.

³⁰Ti ahale ti Zabulon, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

³¹Wungo ti ala kue ayeke: 57 400.

³²Ti ahale ti Efraim, molenge ti Joseph, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

³³Wungo ti ala kue ayeke: 40 500.

³⁴Ti ahale ti Manase, molenge ti Joseph, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

³⁵Wungo ti ala kue ayeke: 32 200.

³⁶Ti ahale ti Benjamin, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

³⁷Wungo ti ala kue ayeke: 35 400.

³⁸Ti ahale ti Dan, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

³⁹Wungo ti ala kue ayeke: 62 700.

⁴⁰Ti ahale ti Aser, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

⁴¹Wungo ti ala kue ayeke: 41 500.

⁴²Ti ahale ti Neftali, a diko ala na lege ti kete mara ti ala oko oko, sewa ti ala oko oko; a su na mbeti iri ti akoli oko oko kue, ala so ngu ti ala alingbi baleuse na ala so ngu ti ala ahon baleuse, ala so alingbi ti sara kua ti turugu.

⁴³Wungo ti ala kue ayeke: 53 400.

⁴⁴So ayeke wungo ti azo so Moïse, Aaron nga na amakonzi baleoko na use ti Israel adiko ala laa, makonzi oko na ya ti mara oko oko.

⁴⁵So ayeke wungo ti azo ti Israel so a diko ala na lege ti asewa oko oko laa, ala so ngu ti ala alingbi ngu baleuse na ala so ngu ti ala ahon baleuse, ala so alingbi ti sara kua ti turugu.

⁴⁶Wungo ti ala kue ayeke: 603 550.

⁴⁷Âdu ti azo ti mara ti Lévi, a diko wungo ti ala na popo ti tanga ti azo ti mara ti Israel pepe.

⁴⁸*KOTA GBIA atene lani na Moïse:

⁴⁹“Mo diko wungo ti azo ti mara ti Lévi pepe, mo diko ala na popo ti azo ti Israel pepe.

⁵⁰Fade mo yeke mu na azo ti mara ti Lévi kua ti batango da so a zia nde ndali ti Nzapa, da so a yeke bata atêne so a su atënë ti *mbuki na le ni nga na akungba ti ya ti da ni kue. Ala yeke yo da ni na akungba ti ya ni kue, ala yeke sara kua na ya ti da ni si ala yeke sara bâbâ ti ala angoro da ni kue.

⁵¹Tongana ala londo ti gue na mbeni ndo, azo ti mara ti Lévi laa ayeke zi da ni; ndo so ala yeke luti daa ti sara bâbâ ti ala, azo ti mara ti Lévi laa ayeke kiri ti leke da ni. Tongana mbeni zo nde aga nduru na tere ti da ni, fade a yeke fâ lo.

⁵²Zo ti Israel oko oko ayeke duti na ya ti bâbâ ti lo, zo oko oko na tere ti bendere ti mara ti lo nga na ya ti bongbi ti aturugu ti lo.

⁵³Ti azo ti mara ti Lévi, ala yeke sara bâbâ ti ala angoro da so a zia nde ndali ti Nzapa. Tongaso si ngonzo ti KOTA GBIA ati na ndö ti bongbi ti azo ti Israel pepe. Kua ti azo ti mara ti Lévi ayeke ti sara akua kue ti da ni.”

⁵⁴Tongaso azo ti Israel asara ye alingbi gi na yanga so KOTA GBIA amu na Moïse.