Read sango Wungo ti azo 11 Bible Online

Wungo ti azo 11 - sango bible

Wungo ti azo 11

¹Mbeni lâ, azo ti Israel adema tere ti ala mingi na *KOTA GBIA; so KOTA GBIA ama tënë ni, lo sara ngonzo mingi, lo tokua mbeni wâ na popo ti ala si wâ ni agbi mbeni mbage ti yanga ti bâbâ ni.

²Azo ti Israel adekongo na Moïse, lo sambela KOTA GBIA si wâ ni amingo.

³A di iri ti ndo ni so Tabera, ngbanga ti so KOTA GBIA atokua wâ na popo ti azo ti Israel.

⁴Mbeni lâ, aga-gango so ayeke na popo ti azo ti Israel asara nzara ti te kasa ti nyama. Azo ti Israel nga ato nda ti dema tere ti ala, atene: “Zo wa laa ayeke mu na e kasa ti nyama ti tengo ni?

⁵E dabe ti e na asusu so e yeke te lani senge senge na Ezipte so; e yeke te nga apendere kugbe ti kasa, akaoya, apoaro, onyon, na lai!

⁶Me fadeso, go ti e ahole kue awe, mbeni ye oko ayeke daa pepe; tengo *mane afun sen awe!”

⁷Andaa mane ni akpa lengo ti pere so iri ni koriandre, avuru vurungo tongana ngu ti keke ti bedelium.

⁸Azo ti Israel akangbi tere ti ala nde nde nde ti ro mane ni; na pekoni, ala yeke nika ni na ndö ti têne, wala ala yeke pika ni na ya ti kpu, ala yeke to ni na ya ti tawa si aga tongana kanda. Nzerengo ni akpa nzerengo ti gatoo so a sara na mafuta.

⁹Na bi, na ndembe so ngu ti pere ayeke tuku na ndö ti bâbâ, gi na oko ndembe ni, mane ayeke tuku nga.

¹⁰Moïse ama toto ti azo ti Israel so abongbi na lege ti akete mara ti ala, asewa ti ala na yanga ti ada ti bongo ti ala. Ngonzo ti KOTA GBIA alondo tongana wâ, tënë ni aso be ti Moïse mingi.

¹¹Moïse atene na KOTA GBIA: “Mo sara sioni na mbi, zo ti kua ti mo, ngbanga ti nyen? Mo ke ti sara nzoni be na mbi si mo zia kungba ti azo so kue na ndö ti mbi ngbanga ti nyen?

¹²Mbi laa, mbi mu ngo ti azo so kue? Mbi laa mbi du ala? Si mo tene na mbi: yo ala tongana ti so mama ti molenge ayeke yo kete molenge ti lo ti mu me na lo; mo yo ala ngbii asi na sese so mbi mu na akotara ti ala na lege ti zendo so.

¹³Mbi yeke wara kasa ti nyama na ndo wa ti mu na azo so kue so? Ala yeke toto na tere ti mbi si ala yeke tene: ‘Mu na e kasa ti nyama, e te!’

¹⁴Mbi oko, mbi lingbi ti yo azo so kue pepe. Ala hon ndö ti mbi awe!

¹⁵Tongana mo ye ti sara na mbi tongaso, ayeke nzoni mo fâ mbi, tongana mo ye ti sara nzoni be na mbi, alingbi mbi baa ye ti mawa pepe so asi na mbi.”

¹⁶KOTA GBIA akiri tënë na Moïse: “Mo bongbi na mbi azo balembarambara na popo ti *akangba ti Israel, ala so mo hinga, mo tene, ala yeke akangba nga na azo so ayeke baa ndo na ndö ti azo ti Israel. Mo ga na ala kue na ya ti da so mbi na azo ti mbi, e yeke wara tere daa. Mo na ala kue ayeke luti na nduzu na dawa ti mbi.

¹⁷Mbi yeke zu ti tene tënë na mo. Mbi yeke zi mbeni yingo so mbi mu na mo so kete ti kangbi na ala si ala lingbi ti mu maboko na mo, tongaso si gi mo oko laa mo yeke yo azo ni so pepe.

¹⁸Ti azo ni, tene na ala, mo tene: ‘Ayeke nzoni ala zia tere ti ala nde ndali ti Nzapa ti ku na lango ti kekereke. Fade ala yeke te kasa ti nyama, ngbanga ti so ala toto na dawa ti KOTA GBIA, ala tene: Zo wa laa ayeke mu na e kasa ti nyama titene e te, zo wa? E duti lani nzoni na Ezipte. Fade KOTA GBIA ayeke mu na ala kasa ti nyama titene ala te.

¹⁹Ala yeke te ni gi ndali ti lango oko, use, oku, baleoko, wala lango baleuse pepe.

²⁰Me na ya ti nze oko kue, ala yeke te ni ngbii ayeke sigigi na du ti hon ti ala, nzara ni ayeke hunzi na be ti ala. Ye ni ayeke si na ala tongaso, ngbanga ti so ala ke KOTA GBIA so ayeke na popo ti ala si ala toto na dawa ti lo, ala tene: E sigigi na Ezipte ngbanga ti nyen?’ ”

²¹Moïse akiri atene: “Azo so mbi yeke na popo ti ala so, wungo ti akoli kue ayeke saki ngbangbo omene si mo tene ti mo, mo tene, mo yeke mu kasa ti nyama na ala ti te na ya ti nze oko kue!

²²Ataa e fâ ataba, angasa nga na abagara kue, ayeke lingbi ala kue? Ataa e gbu asusu kue ti ya ti kota ngu-ingo ndali ti ala, fade ayeke lingbi ala kue?”

²³KOTA GBIA akiri tënë na Moïse: “Ngangu ti mbi alingbi ti sara ye tongaso pepe? Mo ku, mo baa wala tënë so mbi tene na mo ayeke ga taa-tënë wala ayeke ga taa-tënë pepe!”

²⁴Moïse asigigi si lo tene peko ti yanga ti *KOTA GBIA na azo ti Israel. Lo bongbi *akangba balembarambara ti azo ti Israel, lo zia ala, ala luti angoro da ti bongo so KOTA GBIA na azo ti lo ayeke wara tere daa.

²⁵KOTA GBIA azu na ya ti ngbongboro mbinda si lo tene tënë na Moïse. Lo zi mbeni yingo so ayeke na ndö ti Moïse so kete si lo kangbi ni na akangba balembarambara. Gi so yingo ni aduti na ndö ti ala awe, ala to nda ti tene tënë tongana awayanga-Nzapa, me na pekoni, ala ngba ti sara ni pepe.

²⁶Ambeni koli use angba na ya ti bâbâ ni; iri ti mbeni ayeke Eldad, iri ti mbeni ayeke Medad. Yingo ni aga nga na ndö ti ala; iri ti ala ayeke na popo ti akangba balembarambara, me ala gue ti ala na da ti bongo ni pepe. Ala nga ato nda ti tene tënë tongana awayanga-Nzapa na ya ti bâbâ ni.

²⁷Mbeni maseka-koli akpe ague, atene na Moïse: “Baa, Eldad na Medad ayeke tene tënë tongana awayanga-Nzapa na ya ti bâbâ kâ!”

²⁸Josué, molenge ti Nune ayeke sara kua na gbe ti Moïse, ngbene ye so lo de molenge. Josué adekongo na Moïse, atene: “Babâ, kanga lege na ala!”

²⁹Moïse akiri tënë na lo: “Mo sara mbanda ndali ti mbi? Tongana KOTA GBIA akangbi yingo ti lo na azo ti Israel kue titene ala ga awayanga-Nzapa, ka ayeke nzoni mingi!”

³⁰Na pekoni, Moïse na akangba ti Israel akiri na ya ti bâbâ.

³¹*KOTA GBIA atokua mbeni pupu so alondo na mbage ti kota ngu-ingo si amu adodoro atuku ala na ya ti bâbâ, angoro ni kue. Adodoro ni ayeke na ndö ti tere, na ndö ti tere ayo metere oko si ala mu ndo na tere ti bâbâ ni ague ngbii alingbi na tambula ti lango oko.

³²Na lango ni so, ti londo na ndaperere ngbii asi na lakui, na bi kue nga na ndade ni, azo aro adodoro. Zo so aro ni kete na popo ti ala, aro kilo saki saki. Ala gbara ni na le ti lâ si angoro bâbâ ni kue.

³³Me gi so azo ni angba ti te kasa ti andeke ni, ngonzo ti KOTA GBIA alondo na tere ti ala si lo bi mbeni kobela ti bubango kodro na tere ti ala.

³⁴Nilaa, adi iri ti ndo ni so Kibrot-Taava. Biani kâ laa, a lu azo so asara nzara ti tengo kasa ti nyama mingi so.

³⁵Azo ti Israel alondo na Kibrot-Taava si ala gue na Haserot; kâ laa ala sara bâbâ ti ala.