Read sango Wungo ti azo 15 Bible Online

Wungo ti azo 15 - sango bible

Wungo ti azo 15

¹*KOTA GBIA atene na Moïse:

²Tene na azo ti Israel, mo tene: “Tongana ala si ande na kodro so mbi yeke mu na ala, ndo so ala yeke sara kodro daa,

³na ndembe so ala yeke ya *sandaga na KOTA GBIA, ataa sandaga so a yeke gbi ni kue na wâ, ataa sandaga ndali ti zendo so ala mu, wala sandaga so ala mu na be ti ala wani, wala sandaga so ala yeke mu na lango ti sarango amatanga ti ala, ala yeke soro bagara, ngasa wala taba ndali ti asandaga ni. So laa fion ni ayeke nzere na KOTA GBIA.

⁴Zo so ayeke ga na sandaga ti lo na KOTA GBIA, lo yeke mu nga kilo ota ti farini so a gbu ya ni na litere oko na ndambo ti mafuta,

⁵lo yeke ga nga na sandaga ti samba; lo yeke mu litere oko na ndambo ti vin ndali ti sandaga so a yeke gbi ni kue na wâ wala sandaga ti beoko. Aye so kue, lo yeke mu ni ndali ti kete taba oko.

⁶Âdu ti sandaga ti koli-taba, ala yeke mu kilo omene ti farini so a gbu ya ni na litere use ti mafuta,

⁷ala yeke mu nga litere use ti vin ndali ti sandaga ti samba. So laa fion ni ayeke nzere na KOTA GBIA.

⁸Âdu ti koli-bagara so ala yeke mu na sandaga so a yeke gbi ni kue na wâ wala na senge sandaga ndali ti zendo so ala mu wala sandaga ti beoko,

⁹ala yeke mu kilo gumbaya ti farini so a gbu ya ni na litere ota ti mafuta ti zia na ndö ni.

¹⁰Ala yeke mu nga litere ota ti vin ndali ti sandaga ti samba. So laa fion ni anzere na KOTA GBIA.

¹¹“Ala yeke sara tongaso ndali ti koli-bagara, koli-taba, kete taba wala kete ngasa.

¹²Ataa wungo ti anyama ni ayeke oke, ala yeke sara gi tongaso ndali ti nyama oko oko.

¹³Amolenge ti kodro so kue aye ti mu sandaga so fion ni anzere na KOTA GBIA, fade ala yeke sara ye alingbi na andia so.

¹⁴Âdu ti awande so aduti na popo ti ala aninga awe, tongana ala ye ti mu sandaga so fion ni anzere na KOTA GBIA, fade ala yeke sara ye alingbi na oko andia so.

¹⁵Ndia ni ayeke ndali ti bongbi ti azo kue, ndali ti azo ti Israel, ndali ti awande; ndia ni ayeke ngba kpu na kpu ndali ti *ahale ti ala so ayeke ga ande na peko. Ndia ni ayeke ngba kpu na kpu ndali ti ala, nga ndali awande so asara kodro na popo ti ala.

¹⁶Gi oko ndia so na oko mbela so laa ayeke ndali ti ala nga ndali ti awande so asara kodro na popo ti ala.”

¹⁷*KOTA GBIA atene na Moïse:

¹⁸Tene na azo ti Israel, mo tene: “Tongana ala si ande na kodro so mbi yeke gue na ala daa,

¹⁹na ndembe so ala yeke te akobe ti kodro ni, ayeke nzoni ala mu mbeni mbage ni na mbi.

²⁰Tongana ala mu farini, ala gbu ya ni ti zö na mapa, ayeke nzoni ala zi akozo mapa ni ti mu na mbi na sandaga tongana ti so ala yeke zi akozo le ti kobe so ala pe ya ni na ndö ti lakere ti mu na mbi so.

²¹Fade ala yeke mu na mbi KOTA GBIA, akozo mapa so ala yeke zö ni. Ndia so ayeke nga ndali ti ala na *ahale ti ala so ayeke ga ande na peko.”

²²Tongana ala sara mbeni ye alingbi pepe na ambeni tënë ti ndia so *KOTA GBIA amu na Moïse, me ala sara ni na mbana ti be ti ala pepe,

²³so ti tene andia so KOTA GBIA afa na ala na lege ti Moïse, ti londo na ngoi so KOTA GBIA afa ni na ala ngbii asi na *ahale ti ala,

²⁴tongana ala sara sioni ni na mbana ti be ti ala pepe si bongbi ti azo ahinga tënë ni pepe, fade bongbi ti azo ni kue ayeke mu koli-bagara na *sandaga so a yeke gbi ni kue na wâ titene fion ni anzere na KOTA GBIA. Bongbi ti azo ni ayeke mu sandaga ti farini nga na sandaga ti samba; ala yeke mu nga koli-ngasa na sandaga ndali ti zingo siokpari na li ti zo.

²⁵Fade wayango-sandaga ayeke sara ye so afa atene, Nzapa azi siokpari na li ti bongbi ti azo ti Israel kue. Tongaso Nzapa azi siokpari ni awe. Biani, ala sara sioni ni na mbana ti be ti ala pepe, nilaa ala mu sandaga so a yeke gbi ni kue na wâ nga na sandaga ndali ti zingo siokpari na li ti zo.

²⁶Fade KOTA GBIA ayeke zi siokpari na li ti bongbi ti azo ti Israel kue nga na li ti awande so asara kodro na popo ti ala, ngbanga ti so ala kue asara siokpari ni, me na mbana ti be ti ala pepe.

²⁷“Tongana zo oko laa asara siokpari ni, me na mbana ti be ti lo pepe, fade lo yeke mu mama ti ngasa ti ngu oko na sandaga ndali ti zingo siokpari na li ti zo.

²⁸Na dawa ti KOTA GBIA, fade wayango-sandaga ayeke sara ye so afa atene, Nzapa azi siokpari na li ti lo ndali ti siokpari so zo ni asara, me na mbana ti be ti lo pepe. Tongaso Nzapa azi siokpari ni awe.

²⁹Oko ndia so ayeke ndali ti zo so asara siokpari, me na mbana ti be ti lo pepe; ayeke nga ndali ti azo ti Israel wala awande so asara kodro na popo ti ala.”

³⁰“Me tongana mbeni zo ti Israel, wala mbeni wande asara siokpari gi na mbana ti be ti lo, andaa lo zonga KOTA GBIA awe. Fade a yeke tumba lo na ya ti bongbi ti azo ti lo.

³¹Fade tënë ti tumbango lo angba na li ti lo wani, ngbanga ti so lo ke tënë ti KOTA GBIA si lo sara ye na lege ti ambela ti lo pepe.”

³²Na ngoi so azo ti Israel angba na ya ti benyama, ala wara mbeni koli so ayeke ro keke ti wâ na *lango ti wungo tere.

³³Ala so awara lo na rongo keke ti wâ ni, amu lo ague na lo na dawa ti Moïse, Aaron nga na bongbi ti azo ni kue.

³⁴Ala bata lo na mbeni ndo nde, ngbanga ti so ala de ti hinga ye so ala lingbi ti sara na lo pepe.

³⁵*KOTA GBIA atene na Moïse: “Alingbi ala fâ koli so! Bongbi ti azo ni kue amu lo, asigigi na lo na ya ti bâbâ, ala bo lo na têne.”

³⁶Bongbi ti azo ni asigigi na lo na ya ti bâbâ ni, ala bo lo na têne si lo kui alingbi na yanga so KOTA GBIA amu na Moïse.

³⁷*KOTA GBIA atene na Moïse:

³⁸“Tene na azo ti Israel, mo tene: Ala na *ahale ti ala, ala leke mbeni kamba na yanga ti bongo ti ala, ala zia nga kamba ti bongo so nzoroko ni akpa le ti nduzu daa.

³⁹Tongana ala yeke baa akamba ti yanga ti bongo ti ala ni, fade ala yeke dabe ti ala na atënë ti yanga ti KOTA GBIA kue, ala yeke sara ye alingbi na ni; tongaso si be ti ala wala le ti ala ahanda ala pepe ti voro ayanda.

⁴⁰Fade ala yeke sara ye alingbi na atënë ti yanga ti mbi kue, tongaso ala yeke fa atene, ala yeke azo ti mbi.

⁴¹Mbi yeke KOTA GBIA Nzapa ti ala; mbi laa mbi sara si ala sigigi na kodro ti Ezipte titene mbi duti Nzapa ti ala. Mbi yeke KOTA GBIA Nzapa ti ala.”