Read sango Wungo ti azo 16 Bible Online

Wungo ti azo 16 - sango bible

Wungo ti azo 16

¹Kore, molenge ti Isar, zo ti kete mara ti Kehat, zo ti mara ti Lévi, lo mu na tere ti lo Datan na Abiram, amolenge ti Eliab nga na On, molenge ti Pelet; ala yeke azo ti mara ti Ruben.

²Ala londo ti ke Moïse, ala na ambeni zo ti Israel ngbangbo use na baleoku, amakonzi ti bongbi ti azo ni, azo so a soro ala ti gue na ya ti kota bongbi, azo so iri ti ala awu mingi.

³Ala kue atomboka na tere ti Moïse na Aaron si ala tene: “Ye ni afun sen awe! Azo ti Israel kue ayeke azo so *KOTA GBIA azia ala nde ndali ti lo; KOTA GBIA ayeke nga na popo ti e kue. Ngbanga ti nyen si ala mu tere ti ala tongana azo so ayeke na ndö ti bongbi ti azo ti KOTA GBIA kue so?”

⁴So Moïse ama tënë so, lo ti, lo kpo li ti lo na sese.

⁵Na pekoni, lo tene na Kore na azo so amu peko ti lo so, atene: “Kekereke na ndaperere, fade KOTA GBIA ayeke fa zo so ayeke ti lo, zo so lo zia lo nde ndali ti lo, zo so lo yeda na lo ti ga nduru na lo. Zo so KOTA GBIA asoro lo, fade lo yeke zia lege na zo ni ti ga nduru lo.

⁶Kore, mo na azo ti mo, ala sara tongaso: ala mu akete ta ti zongo na dukani.

⁷Kekereke, ala zia ale ti wâ daa si ala tuku dukani na ndö ni na dawa ti KOTA GBIA. Zo so KOTA GBIA ayeke soro lo, lo laa KOTA GBIA azia lo nde ndali ti lo. Ala azo ti mara ti Lévi, ti ala ni afun sen awe!”

⁸Moïse akiri atene na Kore: “Ala, azo ti mara ti Lévi, ala ma mbi si!

⁹KOTA GBIA, Nzapa ti Israel asoro ala na popo ti azo ti Israel kue, lo zia lege na ala ti ga nduru na lo, ti sara kua ti da ti lo nga ti luti na dawa ti bongbi ti azo ti Israel ti sara kua ndali ti ala. So kue alingbi na ala pepe?

¹⁰Kore, mo na a-ita ti mo, azo ti mara ti Lévi kue, KOTA GBIA azia lege na ala titene ala ga nduru na lo. Na ndö ni kue, ala kiri ayeke hunda kua ti wayango-sandaga!

¹¹Tongaso, mo na azo so amu peko ti mo, ala kasa gi Aaron pepe, me KOTA GBIA laa ala ma tere ti ke lo.”

¹²Na pekoni, Moïse atokua mbeni zo ti iri Datan na Abiram, amolenge ti Eliab. Me ala kiri tënë, atene: “E yeke gue pepe!

¹³So mo mu e, mo sigigi na e na ya ti *kodro so ngu ti me ti bagara na mafuta ti wotoro asi singo daa titene e kui na ya ti benyama so, so alingbi na mo pepe? Na ndö ni kue, mo ye ti sara komandema na ndö ti e?

¹⁴Kodro so ngu ti me ti bagara na mafuta ti wotoro asi singo daa laa mo ga na e daa so biani pepe! Ayaka na ayaka ti *vinye so mo tene tënë ti mungo ni na e so ayeke na ndo wa? Mo baa ti mo, mo tene e yeke awaziba? E yeke gue pepe!”

¹⁵Ngonzo agbu Moïse ngangu mingi si lo tene na KOTA GBIA: “Yeda na *sandaga ti ala pepe! Laoko mbi mu ye ti ala pepe, ataa mbeni lele ti ala. Mbi sara mbana na zo oko na popo ti ala pepe!”

¹⁶Moïse atene na Kore: “Kekereke, mo na azo so amu peko ti mo, ala ga aluti na dawa ti *KOTA GBIA; Aaron nga ayeke ga.

¹⁷Ayeke nzoni zo oko oko ti azo ti mo ngbangbo use na baleoku amu kete ta ti lo ti zongo na dukani, lo zia dukani daa si lo ga lo luti na dawa ti KOTA GBIA. Fade mo na Aaron, ala nga ayeke sara tongaso.”

¹⁸Kore na azo so amu peko ti lo, zo oko oko amu kete ta ti lo ti zongo na dukani, lo zia ale ti wâ daa, lo tuku dukani na ndö ni si ala ga aluti na yanga ti da ti bongo so KOTA GBIA na azo ti lo ayeke wara tere daa. Moïse na Aaron asara nga tongaso.

¹⁹Kore abongbi azo ti Israel kue titene ala ke Moïse na Aaron; lo bongbi ala na yanga ti da ti bongo so KOTA GBIA na azo ti lo ayeke wara tere daa. Tongaso gonda ti KOTA GBIA asi na bongbi ti azo ni kue

²⁰si KOTA GBIA atene na Moïse na Aaron:

²¹“Ala londo na popo ti azo ni ahon, mbi yeke hunzi ala kue fafadeso.”

²²Moïse na Aaron ati akpo li ti ala na sese si atene: “O Nzapa, mo so mo mu fini na azo na anyama kue, fade mo yeke sara ngonzo na tere ti bongbi ti azo kue ndali ti siokpari ti zo oko?”

²³KOTA GBIA akiri tënë na Moïse:

²⁴“Tene na bongbi ti azo ni ti hon yongoro na tere ti da ti Kore, ti Datan na ti Abiram.”

²⁵Moïse ague, awara Datan na Abiram; *akangba ti azo ti Israel amu peko ti lo.

²⁶Lo tene na azo ti Israel, lo tene: “Ala hon yongoro na tere ti ada ti bongo ti azo ti sioni so; ala mu mbeni ye ti azo ni so oko pepe, ngbanga ti ala kui ndali ti siokpari ti azo ni.”

²⁷Tongaso azo ti Israel ahon yongoro na tere ti ada ti bongo ti Kore, ti Datan na ti Abiram. Datan na Abiram asigigi aluti na yanga ti ada ti ala, ala na awali ti ala, na amolenge ti ala nga na atara ti ala.

²⁸Moïse atene: “Fade ala hinga atene, KOTA GBIA laa atokua mbi ti sara aye so kue. Mbi sara aye na li ti mbi wani pepe.

²⁹Tongana azo so akui senge kuâ tongana ti azo kue, tongana ye so ayeke si na azo kue laa asi na ala, andaa KOTA GBIA laa atokua mbi pepe.

³⁰Me tongana KOTA GBIA asara mbeni ye ti kpene si sese azi yanga ti lo ti mene ala na aye ti ala kue, tongana ala zu na ndo ti akuâ, le ti ala ngaan, fade ala yeke hinga atene, azo so ahe KOTA GBIA awe.”

³¹Gi so tënë ni angba ngbango na yanga ti lo, sese asuru na gbe ti Datan na Abiram.

³²Sese ni azi yanga ti lo si amene ala, na asewa ti ala kue nga na azo ti Kore na aye ti ala kue.

³³Azo ni azu na ndo ti akuâ, le ti ala ngaan si sese akanga na ndö ti ala kue. Ala yeke na popo ti azo ti Israel mbeni pepe.

³⁴Azo ti Israel so kue ayeke lango nduru na ala ama dekongo ti azo ni si ala tene: “E kpe si sese amene e pepe!”

³⁵KOTA GBIA atokua mbeni wâ si agbi azo ngbangbo use na baleoku so ayeke zö dukani ti ala.