Read sango Wungo ti azo 17 Bible Online

Wungo ti azo 17 - sango bible

Wungo ti azo 17

¹*KOTA GBIA atene na Moïse:

²“Tene na wayango-sandaga Elazar, molenge ti Aaron ti ro na ya ti wâ ni akete ta ti zongo na dukani, lo tuku ale ti wâ ni yongoro, ngbanga ti so a zia akete ta ni nde ndali ti Nzapa.

³Akete ta ni ayeke ti azo so akui ndali ti siokpari ti ala. Ayeke nzoni ala gue, apika ni titene ala leke na kpangbara le ti wen ti kanga na ndö ti gbalaka. A zia akete ta ni na dawa ti KOTA GBIA si aga mbeni ye so ayeke nde ndali ti lo. Fade ayeke ga mbeni ye ti gbotongo mê ti azo ti Israel.”

⁴Wayango-sandaga Elazar amu akete ta ti bengba wen ti zongo na dukani ti azo so wâ agbi ala so, a pika ni titene a leke na akpangbara le ti wen ti kanga na ndö ti gbalaka.

⁵Ye ni aga mbeni ye ti dango be ndali ti azo ti Israel, tongaso si mbeni senge zo so lo yeke *hale ti Aaron pepe aga ti zö dukani pepe na dawa ti KOTA GBIA. Zo so asara mara ti ye tongaso, lo yeke kui mara ti kuâ ti Kore na azo ti lo alingbi na tënë so KOTA GBIA atene na Moïse.

⁶Na ndade ni, bongbi ti azo ti Israel kue ato nda ti kasa Moïse na Aaron. Ala tene: “Ala fâ azo ti *KOTA GBIA awe!”

⁷Na ndembe so bongbi ti azo ti Israel kue atomboka na tere ti Moïse na Aaron, ala baa ti ala ndo na mbage ti da ti bongo so KOTA GBIA na azo ti lo ayeke wara tere daa. Hio tongaso, mbinda amu ndö ti da ni kue si ala baa gonda ti KOTA GBIA.

⁸Moïse na Aaron ague, aluti na yanga ti da ti bongo so KOTA GBIA na azo ti lo ayeke wara tere daa.

⁹KOTA GBIA atene na Moïse:

¹⁰“Ala londo na popo ti azo ni ahon, mbi yeke hunzi ala kue fafadeso.” Moïse na Aaron ati, ala kpo li ti ala na sese.

¹¹Na pekoni, Moïse atene na Aaron: “Mu kete ta ti mo ti zongo na dukani, mo zia ale ti wâ ti ndö ti gbalaka daa, mo tuku dukani ni na ndö ni; mo gue hio na mbage ti bongbi ti azo ni. Mo sara ye so afa atene, KOTA GBIA azi siokpari na li ti ala awe. Biani, ngonzo ti KOTA GBIA alondo awe, kobela ti bubango kodro ato nda ni awe.”

¹²Aaron amu kete ta ti zongo na dukani tongana ti so Moïse atene na lo. Lo kpe hio, lo gue na popo ti azo ni; andaa kobela ti bubango kodro ato nda ti fango ala awe. Aaron azö dukani ni si lo sara ye so afa atene, KOTA GBIA azi siokpari na li ti ala awe.

¹³Lo gue, lo luti na popo ti azo so akui awe, na ala so angba na fini. Kobela ti bubango kodro ni akai.

¹⁴Wungo ti azo so akui ayeke saki baleoko na osio na ngbangbo mbarambara; a diko azo ti Kore so akui so na popo ti ala pepe.

¹⁵So kobela ti bubango kodro akai awe, Aaron akiri na tere ti Moïse na yanga ti da ti bongo so KOTA GBIA na azo ti lo ayeke wara tere daa.

¹⁶*KOTA GBIA atene na Moïse:

¹⁷“Tene na azo ti Israel titene mara oko oko aga na mo mbeni nduru keke. Makonzi ti mara oko oko kue aga na mo nduru keke oko, so ti tene nduru keke baleoko na use. Mo yeke su iri ti mara oko oko na ndö ti keke ti lo wani.

¹⁸Mo yeke su iri ti Aaron na ndö ti nduru keke ti azo ti mara ti Lévi. Fade makonzi ti mara oko oko ayeke ga na nduru keke oko.

¹⁹Mo yeke zia anduru keke ni na ya ti da ti bongo so KOTA GBIA na azo ti lo ayeke wara tere daa, na dawa ti sanduku so a zia na ya ni atêne so a su atënë ti mbuki na le ni, ndo so mbi na ala, e yeke wara tere daa.

²⁰Zo so akugbe ayeke sigigi na tere ti nduru keke ti lo, andaa lo laa mbi soro lo. Tongaso mbi yeke sara titene atënë ti azo ti Israel akai na mê ti mbi, atënë so ala yeke kasa ala na ni so.”

²¹Moïse atene tënë ni na azo ti Israel. Tongaso amakonzi ti ala oko oko kue amu nduru keke na lo, nduru keke oko ndali ti mara oko, nduru keke oko ndali ti mara oko; so ti tene nduru keke baleoko na use. Nduru keke ti Aaron ayeke na popo ti anduru keke ti ala.

²²Moïse azia anduru keke ni na dawa ti KOTA GBIA, na ya ti da so ala zia sanduku so a zia na ya ni atêne so a su atënë ti *mbuki na le ni.

²³Na ndade ni, so Moïse ali na ya ti da so ala zia sanduku daa, lo baa nduru keke ti Aaron, zo ti mara ti Lévi. Kugbe ato nda ti sigigi na tere ni, akongo nga asigigi na tere ni, ale ti keke ni asigigi daa si ale ti keke ni abe.

²⁴Moïse aro anduru keke ni kue na dawa ti KOTA GBIA asigigi na ni; lo fa ni na azo ti Israel, ala kue abaa ni si zo oko oko akiri amu nduru keke ti lo.

²⁵KOTA GBIA atene na Moïse: “Kiri na nduru keke ti Aaron, mo zia ni na dawa ti sanduku so a zia na ya ni atêne so a su atënë ti mbuki na le ni; a bata ni titene aga ye ti dango be ndali ti azo ti ngangu li so. Tongaso, mo kanga lege na ala ti kasa mbi si fade ala kui pepe.”

²⁶Moïse asara aye ni kue alingbi na yanga so KOTA GBIA amu na lo.

²⁷Azo ti Israel atene na Moïse: “Mo baa, e yeke kui! E kue, e kui awe!

²⁸Zo so kue ayeke ga nduru na tere ti da ti *KOTA GBIA ayeke kui. Fade e kue, e yeke kui tongaso?”