Read sango Wungo ti azo 2 Bible Online

Wungo ti azo 2 - sango bible

Wungo ti azo 2

¹*KOTA GBIA atene na Moïse na Aaron:

²“Fade zo ti Israel oko oko ayeke sara bâbâ ti lo na popo ti aturugu ti sewa ti lo, nduru na tere ti bendere ti mara ti lo. Ayeke nzoni bâbâ ni ayo kete na da ti bongo so KOTA GBIA na azo ti lo ayeke wara tere daa si bâbâ ni angoro nga da ni kue.

³“Ala so ayeke sara bâbâ ti ala na mbage ti To, ndo so lâ ayeke londo daa, ayeke duti aturugu ti mara ti Juda na tere ti bendere ti ala. Makonzi ti aturugu ti ala ayeke Nashon, molenge ti Aminadab.

⁴Wungo ti aturugu ti lo kue ayeke: 74 600.

⁵Azo ti mara ti Isakar ayeke sara bâbâ ti ala na tere ti azo ti mara ti Juda. Makonzi ti aturugu ti ala ayeke Netaneel, molenge ti Suar.

⁶Wungo ti aturugu ti ala ayeke: 54 400.

⁷Na pekoni ayeke azo ti mara ti Zabulon. Makonzi ti aturugu ti ala ayeke Eliab, molenge ti Helon.

⁸Wungo ti aturugu ti ala ayeke: 57 400.

⁹Wungo ti aturugu ti mara ti Juda, ti Isakar nga na ti Zabulon kue ayeke: 186 400. Ala laa ayeke mu li ti tambula ni.

¹⁰“Na mbage ti Mbongo ayeke duti aturugu ti azo ti mara ti Ruben. Ala yeke sara bâbâ ti ala na tere ti bendere ti mara ti ala. Makonzi ti aturugu ti ala ayeke Elisur, molenge ti Shedeur.

¹¹Wungo ti aturugu ti ala ayeke: 46 500.

¹²Azo ti mara ti Siméon ayeke sara bâbâ ti ala na tere ti azo ti mara ti Ruben. Makonzi ti aturugu ti ala ayeke Shelumiel, molenge ti Surishadai.

¹³Wungo ti aturugu ti ala ayeke: 59 300.

¹⁴Na pekoni ayeke azo ti mara ti Gad, makonzi ti aturugu ti ala ayeke Eliasaf, molenge ti Deuel.

¹⁵Wungo ti aturugu ti ala ayeke: 45 650.

¹⁶Wungo ti aturugu ti mara ti Ruben, ti Siméon nga na ti Gad kue ayeke: 151 450. Ala laa ayeke use bongbi ti tambula ni.

¹⁷“Na pekoni, fade *ahale ti Lévi ayeke yo da ti bongo so KOTA GBIA na azo ti lo ayeke wara tere daa ti gue na ni. Ayeke nzoni azo ti mara ti Lévi atambula na popo ti abongbi use ti aturugu so ahon na li ni nga na abongbi use ti aturugu so ayeke ga na pekoni. Fade ala yeke hon na molongo na molongo, zo oko oko atambula nduru na tere ti bendere ti kete mara ti lo.

¹⁸“Na mbage ti Do, ayeke duti aturugu ti azo ti mara ti Efraim. Ala yeke sara bâbâ ti ala na tere ti bendere ti mara ti ala. Makonzi ti aturugu ti ala ayeke Elishama, molenge ti Amihud.

¹⁹Wungo ti aturugu ti ala ayeke: 40 500.

²⁰Azo ti mara ti Manase ayeke sara bâbâ ti ala na tere ti azo ti mara ti Efraim. Makonzi ti aturugu ti ala ayeke Gamliel, molenge ti Pedasur.

²¹Wungo ti aturugu ti ala ayeke: 32 200.

²²Na pekoni ayeke azo ti mara ti Benjamin. Makonzi ti aturugu ti ala ayeke Abidan, molenge ti Gidoni.

²³Wungo ti aturugu ti ala ayeke: 35 400.

²⁴Bongbi ti aturugu ti mara ti Efraim, ti Manase nga na ti Benjamin kue ayeke: 108 100. Ala laa ayeke tambula na peko ti azo ti mara ti Lévi.

²⁵“Na mbage ti Banga, ayeke duti aturugu ti azo ti mara ti Dan. Ala yeke sara bâbâ ti ala na tere ti bendere ti mara ti ala. Makonzi ti aturugu ti ala ayeke Ahiezer, molenge ti Amishadai.

²⁶Wungo ti aturugu ti ala ayeke: 62 700.

²⁷Azo ti mara ti Aser ayeke sara bâbâ ti ala na tere ti azo ti mara ti Dan. Makonzi ti aturugu ti ala ayeke Pagiel, molenge ti Okran.

²⁸Wungo ti aturugu ti ala ayeke: 41 500.

²⁹Na pekoni ayeke azo ti mara ti Neftali. Makonzi ti aturugu ti ala ayeke Ahira, molenge ti Enan.

³⁰Wungo ti aturugu ti ala ayeke: 53 400.

³¹Bongbi ti aturugu ti mara ti Dan, ti Aser nga na ti Neftali kue ayeke: 157 600. Ala laa ayeke tanga ti azo na ya ti tambula ni. “Zo oko oko atambula nduru na tere ti bendere ti mara ti lo.”

³²Azo ti Israel so kue a diko wungo ti ala na lege ti sewa ti ala oko oko, na lege ti bongbi ti aturugu ti ala oko oko ayeke: 603 550.

³³A diko wungo ti azo ti mara ti Lévi na popo ti azo ti Israel pepe, alingbi na yanga so KOTA GBIA amu na Moïse.

³⁴Azo ti Israel asara aye ni kue alingbi gi na yanga so KOTA GBIA amu na Moïse. Ala sara bâbâ ti ala na tere ti bendere ti abongbi ti aturugu ti ala oko oko si ala londo ti gue na molongo na molongo, na lege ti kete mara oko oko nga na lege ti sewa oko oko.