Read sango Wungo ti azo 20 Bible Online

Wungo ti azo 20 - sango bible

Wungo ti azo 20

¹Na ya ti kozo nze ti ngu ni so, bongbi ti azo ti Israel kue asi na ya ti benyama ti Zin. Ala leke bâbâ ti ala na Kades; gi na ndo ni so laa Miriam akui si a lu lo kâ.

²So ngu ayeke daa pepe ndali ti bongbi ti azo ti Israel, ala tomboka na tere ti Moïse na Aaron.

³Azo ni abi tënë na li ti Moïse si ala tene: “Tongana e na a-ita ti e, e kui lani oko na peko ti pika ti *KOTA GBIA, ka ayeke nzoni mingi.

⁴Ngbanga ti nyen laa ala ga na bongbi ti azo ti KOTA GBIA na ya ti benyama titene e na anyama ti e kue, e kui so?

⁵Ngbanga ti nyen laa ala mu e na Ezipte ti ga na e na sioni ndo so zo alingbi ti lu ye daa pepe so? Zo alingbi ti fâ yaka daa pepe, ataa fige, ataa *vinye, ataa grenade. Ngu ti nyongo ni oko ayeke daa pepe!”

⁶Moïse na Aaron ahon yongoro na tere ti bongbi ti azo ti Israel, ala gue na yanga ti da ti bongo so KOTA GBIA na azo ti lo ayeke wara tere daa. Kâ, ala ti akpo li ti ala na sese si gonda ti KOTA GBIA asi na ala.

⁷KOTA GBIA atene na Moïse:

⁸“Mu nduru keke ti mo, mo na ita ti mo Aaron, ala bongbi azo ti Israel kue na ndo oko. Na dawa ti azo ni, ala tene tënë na têne so si fade têne ni ayeke mu ngu na ala. Mo sara titene ngu asigigi na ya ti têne ni si bongbi ti azo ti Israel anyon ni, ala, na anyama ti ala.”

⁹Moïse ague ti gi nduru keke ti lo na da ti KOTA GBIA, alingbi na yanga so KOTA GBIA amu na lo.

¹⁰Moïse na Aaron abongbi azo ti Israel na dawa ti têne ni. Moïse atene na ala: “Ala ma mbi si, ala azo ti ngangu li so! E lingbi ti sara si ngu asigigi na ya ti têne so ndali ti ala biani?”

¹¹Moïse ayo maboko ti lo na nduzu, lo pika têne ni na nduru keke ti lo fani use. Mo ye ti baa, ngu asigigi gbani gbani na ya ti têne ni, bongbi ti azo ni anyon, ala na anyama ti ala.

¹²Me KOTA GBIA atene na Moïse na Aaron: “Na sarango ye tongaso, ala zia be ti ala na ndö ti mbi KOTA GBIA pepe, ala fa na azo ti Israel pepe so mbi yeke nde si mbi yeke nzoni kue. Ndali ni, ala yeke gue na bongbi ti azo ni pepe na kodro so mbi mu na ala.”

¹³So ayeke tënë ti ngu ti Meriba; ngu so azo ti Israel apapa na KOTA GBIA ndali ni si lo fa na ala so lo yeke nde si lo yeke nzoni kue.

¹⁴Moïse atokua azo na ndo ti gbia ti Edom atene: “Mo ma tënë so a-ita ti mo, azo ti Israel atene: Aye ti ngangu nde nde asi na e, mo hinga tënë ni kue awe.

¹⁵Akotara ti e ague ando na Ezipte, azo ti e aninga kâ ngu mingi. Me azo ti Ezipte asara e pasi, e na akotara ti e.

¹⁶E dekongo na *KOTA GBIA, lo ma e si lo tokua mbeni *ange ti lo ti sigigi na e na Ezipte. E yeke fadeso na Kades, gbata so ayeke na katikati ti sese ti mo.

¹⁷E gbu gere ti mo, mo zia e, e hon na ya ti kodro ti mo! Fade e yeke hon na ya ti ayaka wala ayaka ti *vinye pepe, e yeke nyon nga ngu ti du ti ngu pepe. E yeke mu gi kota lege, e yeke hon mbage na mbage pepe ngbii e hon ya ti sese ti mo.”

¹⁸Me gbia ti Edom akiri tënë, atene: “Ala yeke hon na ya ti kodro ti mbi pepe. Tongana ala hon, mbi yeke sara bira na ala!”

¹⁹Azo ti Israel akiri atene na lo: “E yeke mu gi kota lege. Tongana e na anyama ti e, e nyon ngu ti mo, fade e yeke futa ni futango. Ye so e hunda na mo ayeke titene mo zia e, e hon na ya ti kodro ti mo.”

²⁰Gbia ti Edom akiri tënë: “Ala yeke hon pepe!” Azo ti Edom amu angangu turugu ti ala gbani gbani ti gue ti tengbi na azo ti Israel.

²¹Tongaso, azo ti Edom ake ti zia lege na azo ti Israel ti hon na ya ti kodro ti ala si azo ti Israel amu mbeni lege nde.

²²Bongbi ti azo ti Israel kue alondo na Kades, ala gue, asi na hoto ti Hor.

²³Na hoto ti Hor, so ti tene na katikati ti Edom, *KOTA GBIA atene tënë na Moïse na Aaron:

²⁴“Aaron aga nduru ti kui, ti gue na peko ti akotara ti lo. Fade lo yeke li pepe na ya ti kodro so mbi mu na azo ti Israel, ngbanga ti so ala ke ti ma yanga ti mbi na ngu ti Meriba.

²⁵Moïse, mo mu Aaron, lo na molenge ti lo Elazar, mo gue na ala na li ti hoto ti Hor.

²⁶Mo zi bongo na tere ti Aaron, mo yu ni na Elazar, molenge ti lo. Fade Aaron ayeke kui kâ si lo yeke gue na peko ti akotara ti lo.”

²⁷Moïse asara ye ni alingbi na yanga so KOTA GBIA amu na lo. Na dawa ti bongbi ti azo ti Israel kue, ala gue na li ti hoto ti Hor.

²⁸Moïse azi bongo ti Aaron na tere ti lo si lo yu na Elazar. Aaron akui gi na li ti hoto ni so. Na pekoni, Moïse na Elazar alondo na li ti hoto ni si ala zu.

²⁹Bongbi ti azo ti Israel kue abaa so Aaron akui awe, ala sara mua ti lo na ya ti lango baleota.