Read sango Wungo ti azo 21 Bible Online

Wungo ti azo 21 - sango bible

Wungo ti azo 21

¹Gbia ti gbata ti Arad ayeke zo ti mara ti Kanaan, lo yeke lango na sese ti Negev; lo ma a tene, azo ti Israel amu lege ti Atarim; lo gue, lo tiri bira na ala si lo gbu ambeni na peko ti bira ni.

²Tongaso, azo ti Israel adeba yanga ti ala na *KOTA GBIA, ala tene: “Tongana mo zia azo so na maboko ti e, fade e yeke buba agbata ni biani biani si aga ti mo, KOTA GBIA.”

³KOTA GBIA ayeda na tënë ti azo ti Israel si lo zia azo ti Kanaan na maboko ti ala. Azo ti Israel afâ ala kue kue kue si abuba agbata ti ala biani biani. Ala di iri ti ndo ni so Horma.

⁴Azo ti Israel alondo na hoto ti Hor, ala mu lege ti kota ngu-ingo ti Asosongo, ala ngoro kodro ti Edom. Me na lege, be ti azo ni awoko kue.

⁵Ala to nda ti kasa Nzapa nga na Moïse, ala tene: “Ngbanga ti nyen si ala mu e na kodro ti Ezipte, ala ga na e ge titene e kui na ya ti benyama so? Ataa mapa wala ngu ayeke ge pepe; tengo *mane, buba kobe so, afun sen na hon ti e awe!”

⁶Tongaso KOTA GBIA atokua angbo so ngu ti yanga ti ala ayeke fâ zo fango si angbo ni ade ala. Azo ti Israel akui gbani gbani.

⁷Tanga ti azo ti Israel ague, awara Moïse si atene na lo: “E sara siokpari, e kasa KOTA GBIA, e kasa nga mo! Toto na KOTA GBIA titene lo zi angbo so yongoro na tere ti e.” Moïse atoto na KOTA GBIA ndali ti azo ti Israel.

⁸KOTA GBIA atene na Moïse: “Mo mu bengba wen, mo leke na mbeni ngbo, mo zia lo na ndö ti mbeni yongoro keke na nduzu. Zo so kue ngbo ayeke te lo si lo baa ndo na mbage ti ngbo ti bengba wen ni, fade lo yeke kui pepe.”

⁹Moïse aleke ngbo ni na bengba wen, lo kanga ni na ndö ti keke na nduzu. Tongana ngbo ate mbeni zo si zo ni abaa ndo na mbage ti ngbo ti bengba wen ni, lo yeke kui pepe.

¹⁰Azo ti Israel alondo, ala sara bâbâ ti ala na Obot.

¹¹Na pekoni, ala londo na Obot, ala gue, asara bâbâ ti ala na Ye-Abarim na ya ti benyama so abaa le na sese ti Moab na mbage ti To.

¹²Ala londo na ndo so, ala gue, asara bâbâ ti ala na tere ti ngu ti Zered.

¹³Ala londo na ndo so, ala fâ ngu ti Arnon si ala sara bâbâ ti ala kâ. Ngu ti Arnon ni alondo na kodro ti Amori asua ahon na ya ti benyama, ngu ni ayeke katikati ti sese ti Moab na ti Amori.

¹⁴Ndani laa, a su tënë ni na ya ti Buku ti Abira ti *KOTA GBIA, atene: “…Vaheb so ayeke na Sufa, lo na akete ngu ti lo nga na Arnon,

¹⁵na akete ngu ti lo so asua ahon na mbage ti gbata ti Ar si ayeke katikati ti sese ti Moab…”

¹⁶Ala londo na ndo so si ala gue na ndo so iri ni “Du-ti-ngu”. Kâ, KOTA GBIA amu yanga na Moïse, atene: “Mo bongbi azo ti Israel, mbi yeke mu ngu na ala.”

¹⁷Ndani laa, azo ti Israel ato nda ti he bia so atene: “Ayeke nzoni ngu asigigi na ya ti du ti ngu! E pika sako na li ti lo!

¹⁸Du ti ngu so amakonzi azi ni so, akota zo ti kodro akoro ni, ala kono ya ni na keke ti komandema ti ala!” Ala londo na benyama ni, ala gue na Matana,

¹⁹na pekoni, ala si na Nahaliel nga na Bamot.

²⁰Ala londo na Bamot, ala si na popo-hoto so ague na sese ti Moab; popo-hoto ni ague ngbii asi na hoto ti Pisga, ndo so zo alingbi ti baa benyama ni kue.

²¹Azo ti Israel atokua azo ti gue ti tene na Sihon, gbia ti azo ti Amori, atene:

²²“Mo zia e, e hon na ya ti kodro ti mo, fade e yeke hon na ya ti ayaka wala ayaka ti *vinye pepe, e yeke nyon nga ngu ti du ti ngu pepe. E yeke mu gi kota lege ngbii e hon na ya ti sese ti mo.”

²³Me Sihon ake ti zia lege na azo ti Israel ti hon na ya ti sese ti lo; lo bongbi aturugu ti lo kue si lo gue ti tengbi azo ti Israel na ya ti benyama. Lo gue na gbata ti Yahas si lo tiri bira na azo ti Israel.

²⁴Azo ti Israel ahon ndö ti lo na bira ni. Ala mu kodro ti lo kue, ti londo na ngu ti Arnon ngbii asi na ngu ti Yabok, akiri ague ngbii asi na katikati ti sese ti azo ti mara ti Amori. Biani, a sara ngangu gbagba na katikati ti sese ti azo ti Amori ni.

²⁵Azo ti Israel amu agbata ti azo ti Amori kue, ala mu nga gbata ti Heshebon na akete kodro so kue ayeke na tere ni si ala sara kodro kâ.

²⁶Heshebon ayeke lani li-kodro ti Sihon, gbia ti azo ti mara ti Amori. Andaa Sihon atiri bira na kozo gbia ti Moab si lo mu akodro ti lo kue ngbii asi na ngu ti Arnon.

²⁷Ndani laa azo ti lekengo abia atene: “Ala ga na Heshebon! Ala kiri aleke gbata ti gbia Sihon, ala kiri asara ni!

²⁸Wâ asigigi na gbata ti Heshebon, menga ti wâ asigigi na gbata ti gbia Sihon; wâ agbi gbata ti Ar so ayeke na sese ti Moab, agbi akota zo ti ndö ti akete hoto so ayeke na tere ti ngu ti Arnon.

²⁹Mawa na ala, azo ti Moab! Ti ala ahunzi awe, azo ti vorongo Kemosh! Akoli so angba na fini, na awali, ala kue, a gbu ala na peko ti bira si a zia ala na maboko ti Sihon, gbia ti azo ti mara ti Amori.

³⁰E kpo azo ni na ale ti kokora ti e; fadeso gbata ti Heshebon abuba awe. Ti londo na Heshebon ngbii asi na Dibon, ye kue abuba awe. E buba ndo kue kue kue awe, ti londo na Nofa ngbii asi na Medeba, kota wâ agbi ye ngbii asi na Medeba.”

³¹Lege so azo ti Israel asara kodro na sese ti azo ti Amori laa.

³²Moïse atokua azo ti *bembengo ndo ti baa ya ti gbata ti Yazer. Na pekoni, azo ti Israel amu akodro so ayeke na tere ni. Ala tumba azo ti mara ti Amori so aduti lani kâ.

³³Na pekoni, azo ti Israel amu mbeni lege nde, ala mu lege so ague na mbage ti Bashan. Og, gbia ti Bashan amu aturugu ti lo kue, lo gue ti tengbi na azo ti Israel, ti tiri bira na ala na gbata ti Edrei.

³⁴KOTA GBIA atene na Moïse: “Mo sara mbeto ti lo pepe! Mbi zia Og na maboko ti mo awe, lo na aturugu ti lo, na kodro ti lo kue. Fade mo yeke sara na lo gi ye so mo sara na Sihon, gbia ti azo ti mara ti Amori, so aduti na gbata ti Heshebon.”

³⁵Azo ti Israel ahon ndö ti Og na bira ni, lo na amolenge ti lo ti koli nga na aturugu ti lo kue; ala zia mbeni zo angba na fini pepe si ala mu sese ti lo.