Read sango Wungo ti azo 22 Bible Online

Wungo ti azo 22 - sango bible

Wungo ti azo 22

¹Azo ti Israel ague, asara bâbâ ti ala na lando ti Moab, na mbage ti ngu ti Jourdain so abaa le na gbata ti Jéricho.

²Balak, molenge ti Sipor abaa ye so kue azo ti Israel asara na azo ti mara ti Amori.

³Mbeto agbu azo ti Moab mingi na dawa ti azo ti Israel, ngbanga ti so ala wu mingi. Kota mbeto ahon ndö ti ala na bango ala.

⁴Azo ti Moab atene na *akangba ti Madian: “Fadeso, gba ti azo so ayeke ga ti te aye so kue ayeke na tere ti e tongana ti so abagara ayeke te pere ti ngonda kue.” Andaa na ngoi ni so Balak, molenge ti Sipor ayeke gbia ti Moab.

⁵Balak atokua azo na Balaam, molenge ti Beor titene lo ga. Balaam ayeke lango na Petor, kodro so a du lo daa; Petor ayeke na tere ti *bale ti Efrate. Tokua ni atene tongaso: “Mbeni mara ti azo asigigi na Ezipte, ala mu ya ti kodro ni kue. Ala laa asara bâbâ ti ala na dawa ti mbi so!

⁶Mbi gbu gere ti mo, ga, mo deba ala na mbi, ngbanga ti so ngangu ti ala ahon ti mbi. Tongana mo ga, gbaa mbi lingbi ti hon ndö ti ala na bira si mbi tumba ala na ya ti kodro ni. Mbi hinga, mbi tene, zo so mo sara tufa na ndö ti lo, tufa ayeke ga na ndö ti lo; me zo so mo deba lo, deba ayeke ga na ndö ti lo.”

⁷Azo ti tokua ni, akangba ti Moab na ti Madian ague, amu ambeni ye na maboko ti ala ti futa na zo ti bango nda ti aye ni. Ala gue, asi na ndo ti Balaam si ala tene na lo peko ti tokua ti Balak.

⁸Balaam atene na ala: “Ala lango na ndo so. Kekereke, fade mbi yeke kiri tënë na ala alingbi na tënë so *KOTA GBIA ayeke tene na mbi.” Tongaso amakonzi ti sese ti Moab alango na ndo ti Balaam.

⁹Nzapa asi na Balaam si ahunda lo, atene: “Azo wa laa ayeke na ndo ti mo so?”

¹⁰Balaam akiri tënë na lo: “Balak, molenge ti Sipor, gbia ti Moab atokua azo so ti tene na mbi, atene:

¹¹‘Mbeni mara ti azo asigigi na Ezipte, ala mu ya ti kodro ni kue. Tongaso mo ga, mo deba ala na mbi. Gbaa mbi lingbi ti hon ndö ti ala na bira si mbi tumba ala na ya ti kodro ni.’ ”

¹²Me Nzapa atene na Balaam: “Mo na ala ague pepe! Fade mo yeke deba azo ti mara so pepe, ngbanga ti so mbi sara tufa ma ndö ti ala awe.”

¹³Na ndaperere, Balaam alondo si lo tene na amakonzi so Balak atokua ala so, atene: “Ala kiri na kodro ti ala, ngbanga ti so KOTA GBIA ake titene mbi na ala e gue.”

¹⁴Amakonzi ti sese ti Moab ni alondo, ala kiri na tere ti Balak si ala tene na lo: “Balaam ake titene e na lo, e ga.”

¹⁵Balak akiri atokua ambeni makonzi so awu mingi si ala ne ahon ala ti kozoni.

¹⁶Ala gue, awara Balaam si ala tene na lo: “Tënë so Balak, molenge ti Sipor atene ayeke so: Mbi gbu gere ti mo, mo ke pepe ti ga na ndo ti mbi!

¹⁷Fade mbi yeke mu gba ti aye na mo, ye so kue mo yeke hunda na mbi, mbi yeke sara na mo. Mbi gbu gere ti mo, ga, mo deba azo so na mbi!”

¹⁸Me Balaam akiri tënë na awatokua ti Balak, atene: “Ataa Balak amu fade na mbi nginza na lôro asi ya ti yangbo ti lo ti gbia kue, mbi lingbi ti sara ye nde pepe na yanga so KOTA GBIA, Nzapa ti mbi amu.

¹⁹Ala nga, ala lango na ndo so; mbi ye ti hinga tënë so KOTA GBIA ayeke kiri ti tene na mbi.”

²⁰Na bi, Nzapa asi na Balaam si atene na lo: “Tongana azo so aga ti iri mo, mo na ala ague. Me mo sara gi ye so mbi yeke tene na mo.”

²¹Na ndaperere, Balaam alondo, lo leke mama ti lele ti lo si lo na amakonzi ti sese ti Moab ague.

²²Hongo ti Balaam ni azia ngonzo na be ti Nzapa. Balaam ayeke tambula na ndö ti mama ti lele, azo ti kua ti lo use amu peko ti lo. *Ange ti *KOTA GBIA aga aluti na ndö ti lege ti kanga lege na lo.

²³Mama ti lele ni abaa ange ti KOTA GBIA so aluti na ndö ti lege, yongoro zeme so a gboto na ya ti bozo ni ayeke na maboko ti lo. Mama ti lele ni azia lege si lo fâ na ya ti ayaka ti hon. Balaam apika lo ti kiri lo na ndö ti lege.

²⁴Ange ti KOTA GBIA ague, aluti na ndö ti mbeni lege so akono pepe si ahon na popo ti agbagba use ti yaka ti *vinye.

²⁵Mama ti lele ni abaa ange ni. Lo gue nduru na tere ti gbagba ni si lo pete gere ti Balaam na tere ti gbagba ni. Balaam akiri apika lo.

²⁶Ange ti KOTA GBIA akiri ahon na dawa ti ala, lo gue, lo luti na ndö ti mbeni kete lege; mbeni ndo titene zo ahon mbage na mbage ayeke daa pepe.

²⁷Mama ti lele ni abaa ange ti KOTA GBIA, lo lango na sese na gbe ti Balaam. Ngonzo agbu Balaam si lo pika mama ti lele ni na keke.

²⁸KOTA GBIA asara si mama ti lele ni atene tënë si lo tene na Balaam: “Nyen laa mbi sara na mo si mo pika mbi fani ota so?”

²⁹Balaam akiri tënë na mama ti lele ni, atene: “Mo sara mbana na mbi! Tongana mbeni yongoro zeme ayeke fade na maboko ti mbi, ka mbi fâ mo na ndo so biani!”

³⁰Mama ti lele ni atene na Balaam: “Mbi yeke lele ti mo pepe? Mo yeke tambula na ndö ti mbi lakue pepe? Laoko mbi sara ye tongaso na mo awe?” Balaam atene: “Ên-en!”

³¹Tongaso KOTA GBIA azi le ti Balaam si lo baa ange ti KOTA GBIA so aluti na ndö ti lege, yongoro zeme so a gboto na ya ti bozo ni ayeke na maboko ti lo. Balaam akuku akpo li ti lo na sese.

³²Ange ti KOTA GBIA atene na lo: “Mo pika mama ti lele ti mo fani ota ngbanga ti nyen? Mbi laa, mbi ga, mbi kanga lege na mo, ngbanga ti so mbi baa so tambula ni ayeke gue na mo ti wara sioni.

³³Mama ti lele ni abaa mbi si lo kpe mbi fani ota. Tongana lo kpe mbi fade pepe, ka mbi fâ mo na ndo so biani; me ti lele ni, mbi zia lo na fini.”

³⁴Balaam atene na ange ti KOTA GBIA: “Mbi sara siokpari awe, ngbanga ti so mbi hinga pepe, mbi tene, mo laa mo luti na dawa ti mbi na ndö ti lege so. Fadeso, tongana tënë ti tambula ni anzere na be ti mo pepe, mbi yeke kiri ti mbi na kodro.”

³⁵Me ange ti KOTA GBIA atene na lo: “Ên-en, mo na azo so ague! Me fade mo tene gi tënë so mbi yeke tene na mo.” Tongaso Balaam amu peko ti amakonzi ti Balak si ala gue.

³⁶So Balak ama a tene, Balaam ayeke na lege ti gango ni, lo gue ti wara lo na lege, na gbata ti Ar so ayeke na sese ti Moab, na katikati ti kodro ti lo, na tere ti ngu ti Arnon.

³⁷Balak ahunda Balaam, atene: “Kozoni, mbi tokua azo ti iri mo ti ga. Ngbanga ti nyen si mo ga hio pepe so? Mo baa mo tene, mbi lingbi ti mu gba ti anzoni ye na mo pepe?”

³⁸Balaam akiri tënë na Balak: “Baa, mbi laa, mbi ga awe so! Fadeso, tënë ti nyen laa mbi lingbi ti tene, nyen? Gi tënë so Nzapa ayeke zia na yanga ti mbi laa mbi yeke tene.”

³⁹Balaam na Balak ague, asi na Kiriat-Husot.

⁴⁰Balak afâ abagara na ataba ti mu na *sandaga. Lo tokua ambeni nyama ti sandaga ni na Balaam nga na amakonzi so amu peko ti lo.

⁴¹Na ndaperere, Balak amu Balaam si lo na lo ague na Bamot-Baal. Kâ, zo alingbi ti baa mbeni mbage ti azo ti Israel.