Read sango Wungo ti azo 24 Bible Online

Wungo ti azo 24 - sango bible

Wungo ti azo 24

¹So Balaam ahinga atene, *KOTA GBIA aye gi ti sara tufa na ndö ti azo ti Israel, lo kiri lo hon na mbeni ndo pepe ti gi nda ti aye tongana ti kozo. Me lo zia le ti lo na mbage ti benyama.

²Balaam ayo le ti lo na nduzu si lo baa azo ti Israel asara bâbâ ti ala mara na mara. Yingo ti Nzapa aga na ndö ti lo.

³Balaam adiko bia so, lo tene: “Baa, tënë so mbi ye ti tene laa, mbi Balaam, molenge ti Beor, mbi, zo so le ti lo azi.

⁴Baa, tënë so mbi ye ti tene laa, mbi, zo so ama tënë ti Nzapa, zo so abaa ye so lo so ngangu ti lo ahon angangu kue afa na ya ti mbeni ye tongana bango-li; mbi, zo so ati na sese si le ti lo azi.

⁵Ala, *ahale ti Jacob, so pendere da ti bongo na ala! Ala, azo ti Israel, so pendere da na ala!

⁶Ada ni amu ndo kue si ayeke tongana angu so ayeke sua suango, ala yeke tongana apendere yaka ti tere ti *bale; ala yeke tongana aloes so KOTA GBIA alu ni wala keke ti sedre so ayeke na tere ti ngu.

⁷Ada ti ala ni ayeke tongana ngu ti ya ti du; ngu ni asuku si ayeke mu ngu na akobe ti yaka. Fade gbia ti azo ti Israel ayeke hon ndö ti gbia Agag, kodro-gbia ti Israel ayeke gue guengo na nduzu na ngangu.

⁸Nzapa asara si azo ti Israel asigigi na Ezipte; lo yeke na kota ngangu tongana ti ngbä. Ala yeke sara sana na amara so asara bira na ala, ala yeke kungbi abio ti awato ti ala, ala yeke koro awato ni na ale ti kokora.

⁹Ala yeke kuku, ala yeke lango na sese tongana bamara, tongana mama ti bamara. Zo wa laa alingbi ti tene na ala ti londo, zo wa? Azo ti Israel, tufa aga na ndö ti zo so ayeke sara tufa na ndö ti ala; deba aga na ndö ti zo so ayeke deba ala!”

¹⁰Ngonzo agbu Balak na tere ti Balaam. Lo pika maboko ti lo na ngonzo si lo tene na Balaam: “Mbi iri mo titene mo ga, mo deba awato ti mbi, me fani ota laa mo kiri mo sara tufa na ndö ti ala!

¹¹So ye ni aga tongaso so, londo mo kiri na kodro ti mo! Mbi tene lani, mbi tene, fade mbi yeke mu gba ti anzoni ye na mo; me KOTA GBIA agbanzi mo na ni awe!”

¹²Balaam akiri tënë na Balak, atene: “Azo so lani mo tokua ala na mbi so, mbi tene na ala mbirimbiri, mbi tene:

¹³‘Ataa Balak amu na mbi nginza na lôro asi yangbo ti lo singo, mbi lingbi ti sara mbeni ye nde pepe na yanga so *KOTA GBIA amu. Gi tënë so KOTA GBIA atene na mbi laa mbi yeke tene.’

¹⁴Fadeso, mbi yeke kiri na kodro ti mbi. Ga, mbi fa na mo kozoni ye so azo ti Israel ayeke sara ande na azo ti kodro ti mo na ya ti alango so ayeke ga.”

¹⁵Tongaso Balaam adiko bia so, lo tene: “Baa, tënë so mbi ye ti tene laa, mbi Balaam, molenge ti Beor, mbi, zo so le ti lo azi.

¹⁶Baa tënë so mbi ye ti tene laa, mbi, zo so ama tënë ti Nzapa, zo so ahinga ndara ti Nzapa so ayeke na yayu kâ na ndö ti aye kue, zo so abaa ye so lo so ngangu ti lo ahon angangu kue afa na ya ti mbeni ye tongana bango-li; mbi, zo so ati na sese si le ti lo azi.

¹⁷Mbi baa ye so ayeke si gbanda, ye ni ayeke si fadeso pepe. Mbi baa mbeni ye so ayeke si ande, ye ni ayeke si fafadeso pepe. Mbeni tongoro ayeke sigigi na popo ti *ahale ti Jacob, mbeni gbia ayeke baa gigi na popo ti azo ti Israel. Lo yeke pika azo ti mara ti Moab na keke ti lo ti gbia, lo yeke pika abio ti li ti azo ti mara ti Set.

¹⁸Fade lo yeke mu Seir na bira, kodro ti azo ti mara ti Edom so ayeke awato ti lo. Fade azo ti Israel ayeke hon ndö ti ala.

¹⁹Gbia so ayeke baa gigi na popo ti azo ti Israel so, lo yeke sara komandema na ndö ti awato ti lo; lo yeke hunzi tanga ti azo so angba na ya ti agbata.”

²⁰Na pekoni, Balaam abaa azo ti mara ti Amalek si lo diko bia so, lo tene: “Mara ti Amalek ayeke kozo ti amara kue; me fade dunia ti ala ayeke buba biani biani.”

²¹Na pekoni, Balaam abaa azo ti mara ti Keni si lo diko bia so, lo tene: “Ala, azo ti mara ti Keni, ala yeke duti na siriri na ya ti kodro ti ala tongana da ti ndeke so a zia na ndö ti mbeni kota têne.

²²Me fade wâ ayeke gbi ada ti ala kue, fade azo ti mara ti Asirii ayeke gbu ala na ngbaa.”

²³Ti hunzi na ni, Balaam adiko bia so, lo tene: “Ae azo! Tongana Nzapa ayeke londo ti sara ye, zo wa laa alingbi ti ngba na fini, zo wa?

²⁴Amangboko alondo na mbage ti zoa ti Shipre ti ga. Azo ayeke sara ngangu na azo ti mara ti Asirii nga na azo ti mara ti Eber. Ataa azo ti mara ti Eber ni kue, gigi ti ala ayeke gue ande ti buba.”

²⁵Na peko ti atënë so, Balaam alondo ti kiri na kodro ti lo. Balak amu nga lege ti lo ti hon.