Read sango Wungo ti azo 27 Bible Online

Wungo ti azo 27 - sango bible

Wungo ti azo 27

¹Mala, Noa, Hogla, Milka na Tirsa ayeke amolenge ti Selofad ti wali; Selofad ayeke zo ti kete mara ti Manase. Joseph laa adu Manase; Manase adu Makir; Makir adu Galaad; Galaad adu Hefer; Hefer adu Selofad. Mbeni lâ, awali oku so aga,

²ala luti na dawa ti Moïse, na dawa ti wayango-sandaga Elazar, ti amakonzi ti azo ti Israel nga na dawa ti bongbi ti azo ti Israel kue, na yanga ti da ti bongo so *KOTA GBIA na azo ti lo ayeke wara tere daa. Awali ni atene:

³“Babâ ti e akui na ya ti benyama. Lo yeke lani na popo ti azo ti Kore pepe so ama tere ti ke KOTA GBIA so; me lo kui ndali ti siokpari ti lo. Lo du molenge-koli pepe.

⁴Fade iri ti babâ ti e ayeke girisa na ya ti kete mara ti lo, ngbanga ti so lo du molenge-koli pepe? Mu na e mbeni mbage ti sese ti lo titene aga ti e tongana ti so a-ita ti babâ ti e awara nga ti ala so.”

⁵Moïse aga na tënë ti ala na dawa ti *KOTA GBIA.

⁶KOTA GBIA atene na lo:

⁷“Tënë ti amolenge ti Selofad ti wali ayeke na legeni. Fade mo yeke mu mbeni mbage ti sese ni na ala titene aga ti ala tongana ti so a-ita ti babâ ti ala awara ti ala so. So babâ ti ala akui awe so, mo mu na ala sese ni titene aga ti ala.

⁸Na pekoni, fade mo tene na azo ti Israel, mo tene: ‘Tongana mbeni koli adu molenge-koli pepe si lo kui, alingbi ala mu sese ti lo na molenge ti lo ti wali titene aga ti lo.

⁹Tongana koli ni ayeke na molenge-wali pepe, fade ala yeke mu sese ti lo na a-ita ti lo ti koli.

¹⁰Tongana koli ni ayeke na a-ita ti koli pepe, fade ala yeke mu sese ti lo ni na a-ita ti babâ ti lo ti koli.

¹¹Tongana babâ ti lo ayeke na a-ita pepe, fade ala yeke mu sese ti lo ni na mbeni zo ti sewa ti lo so popo ni ayo pepe, sewa ni ayeke mu sese ni titene aga ti lo.’ Tënë so ayeke ga ndia ndali ti azo ti Israel alingbi na yanga so KOTA GBIA amu na Moïse.”

¹²*KOTA GBIA atene na Moïse: “Ma na li ti hoto ti Abarim so; kâ, mo yeke baa kodro so mbi yeke mu na azo ti Israel.

¹³Tongana mo baa ni awe, na pekoni mo nga, mo yeke kui tongana ti so ita ti mo Aaron akui.

¹⁴Biani, na ya ti benyama ti Zin, ala ke yanga ti mbi na ndembe so bongbi ti azo ti Israel ayeke gi yanga ti mbi. Na ngoi so azo ti Israel ahunda ngu ti nyongo ni, ala ke ti fa na azo ni so mbi yeke nde si mbi yeke nzoni kue.” KOTA GBIA atene tongaso ndali ti ye so asi na ngu ti Meriba, na Kades, na ya ti benyama ti Zin.

¹⁵Tongaso Moïse atene na KOTA GBIA:

¹⁶“KOTA GBIA Nzapa, mo so mo yeke mu fini na azo na anyama kue, mo soro mbeni zo ti duti na li ti bongbi ti azo ni.

¹⁷Ayeke nzoni zo ni ayeke zo so alingbi ti tambula na li ti aturugu ti gue na ala na bira, ti kiri na ala si bongbi ti azo ti KOTA GBIA aduti pepe tongana ataba so zo ti batango ala ayeke daa pepe.”

¹⁸KOTA GBIA akiri tënë na Moïse, atene: “Mo mu Josué, molenge ti Nune. Lo yeke zo so yingo ti mbi ayeke na lo; mo zia maboko na li ti lo.

¹⁹Na pekoni, mo gue na lo na dawa ti wayango-sandaga Elazar nga na dawa ti bongbi ti azo ti Israel kue si mo yeke zia lo na yanga ti kua ni na le ti ala kue.

²⁰Mo yeke mu na lo mbeni mbage ti nengo so mo yeke na ni, tongaso si azo ti Israel kue ama yanga ti lo.

²¹Josué, lo wani, lo yeke luti na dawa ti wayango-sandaga Elazar; Elazar ayeke ga ti hunda mbi KOTA GBIA na lege ti Urim. Na pekoni, lo yeke tene peko ti tënë ti mbi na Josué. Fade Josué na bongbi ti azo ti Israel ayeke gue ti tiri bira, ala yeke kiri na kodro alingbi gi na yanga so mbi, KOTA GBIA, mbi mu.”

²²Moïse asara ye ni alingbi na yanga so KOTA GBIA amu na lo. Lo mu Josué, lo ga na lo na dawa ti wayango-sandaga Elazar nga na dawa ti bongbi ti azo ti Israel kue.

²³Lo zia maboko na li ti Josué ti zia lo na yanga ti kua ni alingbi na yanga so KOTA GBIA amu na Moïse.