Read sango Wungo ti azo 28 Bible Online

Wungo ti azo 28 - sango bible

Wungo ti azo 28

¹*KOTA GBIA atene na Moïse:

²“Mu yanga so na azo ti Israel, mo tene: Ala sara hange ti mu na mbi *asandaga so ayeke ti mbi alingbi na ngoi ni; so ti tene asandaga ti kobe so ala yeke gbi ni kue na wâ si fion ni anzere na mbi.

³“Mo yeke tene na ala: Baa, aye so ala lingbi ti mu na KOTA GBIA laa: akete taba use ti ngu oko so mbeni mbage ti tere ti ala abuba pepe; ala yeke mu ataba ni na ya ti lango oko oko. So ayeke sandaga so a yeke gbi ni kue na wâ ndali ti KOTA GBIA lakue lakue.

⁴Fade a yeke mu kete taba oko na ndaperere si a yeke mu use ni na lakui;

⁵ala bongbi ni na kilo ota ti farini, ala tuku litere oko na ndambo ti mafuta ti nzoni ni daa, ala gbu ya ni.

⁶So ayeke sandaga so a yeke gbi ni kue na wâ ndali ti KOTA GBIA lakue lakue. Mara ti sandaga so a yeke mu ni lani na hoto ti Sinai laa. So ayeke sandaga so a yeke gbi ni kue na wâ si fion ni anzere na KOTA GBIA laa.

⁷Na ndembe so ala yeke mu kozo kete taba ni na sandaga na KOTA GBIA na ndaperere, ala yeke ga nga na sandaga ti samba, litere ni oko na ndambo. Ala yeke ga na ni na ndo so ayeke nde si ayeke nzoni kue.

⁸Ti use kete taba ni, ala yeke mu lo na sandaga na KOTA GBIA na lakui. Ala yeke mu gi oko ye so ala mu ndali ti sandaga ti ndaperere so. So ayeke sandaga so fion ni anzere na KOTA GBIA.”

⁹“Na *lango ti wungo tere, ala yeke ga na akete taba use ti ngu oko so mbeni mbage ti tere ti ala abuba pepe. Ala yeke bongbi ni na kilo omene ti farini so ala gbu ya ni na mafuta. Ala bongbi ni na sandaga ti samba.

¹⁰So ayeke sandaga so a yeke gbi ni kue na wâ na lango ti wungo tere. Ala yeke zia ni na ndö ti sandaga ti lango oko oko nga na ndö ti sandaga ti samba so ala bongbi na ni.”

¹¹“Lakue na kozo lango ti fini nze, ala yeke mu akoli-bagara use, koli-taba oko, akete taba mbarambara ti ngu oko so mbage ti tere ti ala abuba pepe ti ya na sandaga so a yeke gbi ni kue na wâ na *KOTA GBIA.

¹²Ala yeke bongbi nyama oko oko na farini so ala gbu ya ni na mafuta: ala yeke mu kilo gumbaya ti farini ndali ti koli-bagara oko oko, kilo omene ti farini ndali ti koli-taba,

¹³kilo ota ti farini ndali ti kete taba oko oko. So ayeke sandaga so a yeke gbi ni kue na wâ si fion ni anzere na KOTA GBIA.

¹⁴Ala yeke mu ndali ti asandaga ti samba: litere ota ndali ti koli-bagara oko oko, litere use ndali ti koli-taba oko, litere oko na ndambo ndali ti kete taba oko oko. So ayeke asandaga so a yeke gbi ni kue na wâ, nze na nze na ya ti ngu oko laa.

¹⁵Ala yeke mu nga koli-ngasa na sandaga na KOTA GBIA ndali ti siokpari ti ala. Ala yeke zia ni na ndö ti sandaga so a yeke gbi ni kue na wâ ndali ti lango oko oko nga na ndö ti sandaga ti samba so ala bongbi na ni.”

¹⁶“Na lango baleoko na osio ti kozo nze ni, fade ala yeke sara *matanga ti Pake ndali ti *KOTA GBIA.

¹⁷Na lango baleoko na oku ti oko nze ni so, ala yeke to nda ti matanga ni. Na ya ti lango mbarambara, ala yeke te mapa so a sara na mama ni pepe.

¹⁸Na kozo lango ti matanga ni, ala yeke bongbi tere ti ala ti voro KOTA GBIA; kua so ala yeke sara ka lakue, ala sara ni pepe.

¹⁹Ala yeke mu akoli-bagara use, koli-taba oko na akete taba mbarambara so mbeni mbage ti tere ti ala abuba pepe ti ya na *sandaga so a yeke gbi ni kue na wâ na KOTA GBIA.

²⁰Ala yeke mu ndali ti nyama oko oko, farini so a gbu ya ni na mafuta; ala yeke mu kilo gumbaya ti farini ndali ti koli-bagara oko oko; kilo omene ti farini ndali ti koli-taba,

²¹kilo ota ti farini ndali ti kete taba mbarambara oko oko kue.

²²Ala yeke mu nga koli-ngasa oko na sandaga ndali ti siokpari ti ala. Fade a yeke sara ye so afa atene, a zi siokpari na li ti ala awe.

²³Na ndö ti asandaga so kue, ala yeke mu asandaga so a yeke gbi ni kue na wâ na ya ti lango oko oko na ndaperere.

²⁴Na ya ti lango mbarambara ti matanga ni, fade ala yeke mu asandaga ti akobe ni so lakue lakue. So ayeke sandaga so a yeke gbi ni kue na wâ si fion ni anzere na KOTA GBIA; ala yeke bongbi ni na sandaga ti samba.

²⁵Na lango mbarambara ni, ala yeke bongbi tere ti ala ti voro KOTA GBIA; kua so ala yeke sara ka lakue, ala sara ni pepe.”

²⁶“Na lango ti *Pantekote, fade ala yeke mu akozo le ti kobe ti yaka ti ala ti ya na *sandaga na *KOTA GBIA; ala yeke bongbi tere ti ala ti voro KOTA GBIA; kua so ala yeke sara ka lakue, ala sara ni pepe.

²⁷Ala yeke mu akoli-bagara use, koli-taba oko na akete taba mbarambara ti ngu oko na sandaga so a yeke gbi ni kue na wâ si fion ni anzere na KOTA GBIA.

²⁸Ala yeke mu ndali ti nyama oko oko, farini so a gbu ya ni na mafuta; ala yeke mu kilo gumbaya ti farini ndali ti koli-bagara oko oko, kilo omene ti farini ndali ti koli-taba,

²⁹kilo ota ti farini ndali ti kete taba mbarambara oko oko kue.

³⁰Ala yeke mu nga koli-ngasa oko na sandaga ndali ti siokpari ti ala. Fade a yeke sara ye so afa atene, a zi siokpari na li ti ala awe.

³¹Na ndö ti asandaga so kue, ala yeke mu asandaga so a yeke gbi ni kue na wâ na ya ti lango oko oko. Ala yeke mu gi anyama so mbage ti tere ti ala abuba pepe, ala yeke bongbi ni na sandaga ti samba.”