Read sango Wungo ti azo 29 Bible Online

Wungo ti azo 29 - sango bible

Wungo ti azo 29

¹“Na kozo lango ti nze mbarambara ni, ala yeke bongbi tere ti ala ti voro *KOTA GBIA; kua so ala yeke sara ka lakue, ala sara ni pepe. So ayeke lango ti dekongo na ngia.

²Ala yeke mu koli-bagara oko, koli-taba oko na akete taba mbarambara ti ngu oko so mbeni mbage ti tere ti ala abuba pepe na *sandaga so a yeke gbi ni kue na wâ si fion ni anzere na KOTA GBIA.

³Ala yeke mu ndali ti nyama oko oko, farini so a gbu ya ni na mafuta; ala yeke mu kilo gumbaya ti farini ndali ti koli-bagara oko oko, kilo omene ti farini ndali ti koli-taba,

⁴kilo ota ti farini ndali ti akete taba mbarambara oko oko kue.

⁵Ala yeke mu nga koli-ngasa oko na sandaga ndali ti siokpari ti ala. Fade a yeke sara ye so afa atene, a zi siokpari na li ti ala awe.

⁶Na ndö ti asandaga so kue, ala yeke mu asandaga so a yeke gbi ni kue na wâ na ya ti lango oko oko nga na sandaga so a yeke mu na kozo lango ti nze. Ala yeke bongbi ni na sandaga ti farini nga na ti samba, tongana ti so ala yeke sara ka lakue. So ayeke sandaga so fion ni anzere na KOTA GBIA.”

⁷“Na lango baleoko ti nze mbarambara ni, ala yeke bongbi tere ti ala ti voro KOTA GBIA; ala yeke ke kobe, ala yeke sara nga mbeni kua oko pepe.

⁸Ala yeke mu akoli-bagara use, koli-taba oko na akete taba mbarambara ti ngu oko so mbeni mbage ti tere ti ala abuba pepe ti ya na *sandaga so a yeke gbi ni kue na wâ si fion ni anzere na KOTA GBIA.

⁹Ala yeke mu ndali ti nyama oko oko, farini so a gbu ya ni na mafuta; ala yeke mu kilo gumbaya ti farini ndali ti koli-bagara oko oko, kilo omene ti farini ndali ti koli-taba,

¹⁰kilo ota ti farini ndali ti akete taba mbarambara oko oko kue.

¹¹Ala yeke mu nga koli-ngasa oko na sandaga ndali ti siokpari ti ala nga ndali ti kota lango ti zingo siokpari na li ti azo. Ala yeke zia ni na ndö ti sandaga so a yeke gbi ni kue na wâ na ya ti lango oko oko nga na ndö ti sandaga ti farini na ti sandaga ti samba so ala bongbi na ni.”

¹²“Na lango baleoko na oku ti nze mbarambara ni, fade ala yeke bongbi tere ti ala ti voro *KOTA GBIA; kua so ala yeke sara ka lakue, ala sara ni pepe. Na ya ti lango mbarambara kue, ala yeke sara matanga na iri ti mbi, KOTA GBIA.

¹³Na kozo lango ti matanga ni, ala yeke mu akoli-bagara baleoko na ota, akoli-taba use, akete taba baleoko na osio ti ngu oko so mbeni mbage ti tere ti ala abuba pepe ti ya na *sandaga so a yeke gbi ni kue na wâ si fion ni anzere na KOTA GBIA.

¹⁴Ala yeke mu ndali ti nyama oko oko, farini so a gbu ya ni na mafuta; ala yeke mu kilo gumbaya ti farini ndali ti koli-bagara oko oko, kilo omene ti farini ndali ti koli-taba oko oko,

¹⁵kilo ota ti farini ndali ti akete taba baleoko na osio oko oko kue.

¹⁶Ala yeke mu nga koli-ngasa oko na sandaga ndali ti siokpari ti ala. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

¹⁷“Na use lango ti matanga ni, ala yeke mu akoli-bagara baleoko na use, akoli-taba use, akete taba baleoko na osio ti ngu oko so mbeni mbage ti tere ti ala abuba pepe ti ya na sandaga so a yeke gbi ni kue na wâ na KOTA GBIA.

¹⁸Ala yeke mu ndali ti asandaga ti akoli-bagara, akoli-taba na akete taba ni, sandaga ti farini na sandaga ti samba, alingbi na wungo ti anyama ni tongana ti so ndia afa.

¹⁹Ala yeke mu nga koli-ngasa oko ndali ti sandaga ti zingo siokpari na li ti zo. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

²⁰“Na ota lango ni, ala yeke mu akoli-bagara baleoko na oko, akoli-taba use, akete taba baleoko na osio ti ngu oko so mbeni mbage ti tere ti ala abuba pepe ti ya na sandaga so a yeke gbi ni kue na wâ na KOTA GBIA.

²¹Ala yeke mu ndali ti asandaga ti akoli-bagara, akoli-taba na akete taba ni, sandaga ti farini na sandaga ti samba, alingbi na wungo ti anyama ni tongana ti so ndia afa.

²²Ala yeke mu nga koli-ngasa oko ndali ti sandaga ti zingo siokpari na li ti zo. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

²³“Na osio lango ni, ala yeke mu akoli-bagara baleoko, akoli-taba use, akete taba baleoko na osio ti ngu oko so mbeni mbage ti tere ti ala abuba pepe ti ya na sandaga so a yeke gbi ni kue na wâ na KOTA GBIA.

²⁴Ala yeke mu ndali ti asandaga ti akoli-bagara, akoli-taba na akete taba ni, sandaga ti farini na sandaga ti samba, alingbi na wungo ti anyama ni tongana ti so ndia afa.

²⁵Ala yeke mu nga koli-ngasa oko ndali ti sandaga ti zingo siokpari na li ti zo. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

²⁶“Na oku lango ni, ala yeke mu akoli-bagara gumbaya, akoli-taba use, akete taba baleoko na osio ti ngu oko so mbeni mbage ti tere ti ala abuba pepe ti ya na sandaga so a yeke gbi ni kue na wâ na KOTA GBIA.

²⁷Ala yeke mu ndali ti asandaga ti akoli-bagara, akoli-taba na akete taba ni, sandaga ti farini na sandaga ti samba, alingbi na wungo ti anyama ni tongana ti so ndia afa.

²⁸Ala yeke mu nga koli-ngasa oko ndali ti sandaga ti zingo siokpari na li ti zo. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

²⁹“Na omene lango ni, ala yeke mu akoli-bagara miombe, akoli-taba use, akete taba baleoko na osio ti ngu oko so mbeni mbage ti tere ti ala abuba pepe ti ya na sandaga so a yeke gbi ni kue na wâ na KOTA GBIA.

³⁰Ala yeke mu ndali ti asandaga ti akoli-bagara, akoli-taba na akete taba ni, sandaga ti farini na sandaga ti samba, alingbi na wungo ti anyama ni tongana ti so ndia afa.

³¹Ala yeke mu nga koli-ngasa oko ndali ti sandaga ti zingo siokpari na li ti zo. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

³²“Na mbarambara lango ni, ala yeke mu akoli-bagara mbarambara, akoli-taba use, akete taba baleoko na osio ti ngu oko so mbeni mbage ti tere ti ala abuba pepe ti ya na sandaga so a yeke gbi ni kue na wâ na KOTA GBIA.

³³Ala yeke mu ndali ti asandaga ti akoli-bagara, akoli-taba na akete taba ni, sandaga ti farini na sandaga ti samba, alingbi na wungo ti anyama ni tongana ti so ndia afa.

³⁴Ala yeke mu nga koli-ngasa oko ndali ti sandaga ti zingo siokpari na li ti zo. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

³⁵“Na lango miombe ni, ala yeke sara mbeni kota bongbi ti ko nda ti matanga ni; kua so ala yeke sara ka lakue, ala sara ni pepe.

³⁶Ala yeke mu koli-bagara oko, koli-taba oko, akete taba mbarambara ti ngu oko so mbeni mbage ti tere ti ala abuba pepe ti ya na sandaga so a yeke gbi ni kue na wâ na KOTA GBIA; sandaga so fion ni anzere na lo.

³⁷Ala yeke mu ndali ti asandaga ti koli-bagara, koli-taba na akete taba ni, sandaga ti farini na sandaga ti samba, alingbi na wungo ti anyama ni tongana ti so ndia afa.

³⁸Ala yeke mu nga koli-ngasa oko ndali ti sandaga ti zingo siokpari na li ti zo. Ala yeke zia na ndö ni sandaga so a yeke gbi ni kue na wâ na ya ti lango oko oko nga na sandaga ti farini na sandaga ti samba so ala bongbi na ni.

³⁹“So ayeke asandaga so alingbi ala mu na KOTA GBIA na lango ti amatanga laa. Na tere ti asandaga so, ala lingbi ti mu nga sandaga so ala mu na be ti ala wani, sandaga so a yeke gbi ni kue na wâ, sandaga ti farini, sandaga ti samba nga na sandaga ti beoko; so kue ndali ti dengo ba ti yanga so ala de.”