Read sango Wungo ti azo 30 Bible Online

Wungo ti azo 30 - sango bible

Wungo ti azo 30

¹Moïse atene na azo ti Israel atënë so kue *KOTA GBIA amu yanga na lo daa.

²Moïse atene tënë na amakonzi ti amara ti azo ti Israel, atene: Yanga so *KOTA GBIA amu ayeke so:

³“Tongana mbeni koli amu zendo ti sara mbeni ye na KOTA GBIA, wala lo deba yanga ti lo ti ke ti sara mbeni ye, alingbi lo sara ye alingbi na dengo ba ti yanga ti lo; alingbi lo sara ye alingbi gi na zendo so lo mu.

⁴“Tongana mbeni maseka-wali so angba na da ti babâ ti lo, amu zendo ti sara mbeni ye na KOTA GBIA, wala lo deba yanga ti lo ti ke ti sara mbeni ye,

⁵tongana babâ ti lo ama tënë ni si lo zi yanga daa pepe, alingbi maseka-wali ni asara ye alingbi na zendo so lo mu.

⁶Me tongana babâ ti lo ake tënë ti zendo ti lo ni na lango so lo ma na tënë ni, fade zendo ti maseka-wali ni aga senge senge. Fade KOTA GBIA ayeke zi tënë ni na li ti lo, ngbanga ti so babâ ti lo akanga lege na lo awe.

⁷“Tongana mbeni maseka-wali amu zendo ti sara mbeni ye, wala lo deba yanga ti lo na ndö ti mbeni tënë so lo gbu li ti lo daa pepe, na pekoni, lo mu koli;

⁸tongana koli ti lo ama tënë ni, me lo zi yanga daa pepe na lango ni so, alingbi maseka-wali ni asara ye kue alingbi na zendo so lo mu.

⁹Me tongana koli ti lo ake tënë ni gi na lango so lo ma tënë ni, lo sara si zendo ni aga senge senge. Fade KOTA GBIA ayeke zi tënë ni na li ti maseka-wali ni.

¹⁰“Tongana mbeni wali-mua, wala mbeni wali so koli ti lo atumba lo amu zendo, alingbi wali ni asara ye alingbi na zendo so lo mu.

¹¹“Tongana mbeni wali so amu koli awe amu zendo, wala lo deba yanga ti lo ti ke ti sara mbeni ye,

¹²tongana koli ti lo ama tënë ni si lo zi yanga daa pepe, lo ke ni pepe, alingbi wali ni asara ye alingbi na dengo ba ti yanga ti lo, lo sara ye alingbi na zendo so lo mu.

¹³Me tongana koli ti lo ake tënë ni gi na lango so lo ma na tënë ni, fade dengo ba na zendo ti wali ni ayeke ga senge senge. KOTA GBIA ayeke zi tënë ni na li ti lo, ngbanga ti so koli ti lo ake awe.

¹⁴Tongana mbeni wali ti koli amu zendo ti sara mbeni ye, wala lo deba yanga ti lo ti ke ti sara mbeni ye, koli ti lo alingbi ti ye peko ti tënë ni wala ti sara si zendo ti wali ni aga senge senge.

¹⁵Tongana koli ni ama tënë ni si lango oko na pekoni, lo de ti zi yanga daa na wali ni pepe, andaa lo ye gbe ti tënë ni awe; lo ye gbe ti tënë ni, ngbanga ti so lo zi yanga daa pepe na lango so lo ma tënë ni.

¹⁶Me tongana lango mingi na pekoni si koli ni ake, tënë ni ayeke ga na li ti koli ni wani, ngbanga ti so wali ni abata tënë ti zendo ti lo pepe.”

¹⁷So ayeke andia so KOTA GBIA amu yanga daa na Moïse na ndö ti tënë ti mungo zendo, wala dengo ba ti yanga laa. Andia ni abaa awali ti koli, wala maseka-wali so angba na da ti babâ ti lo.