Read sango Wungo ti azo 31 Bible Online

Wungo ti azo 31 - sango bible

Wungo ti azo 31

²“Sioni so azo ti mara ti Madian asara lani na azo ti Israel so, kiri peko ni na azo ti Madian ni. Na pekoni, mo yeke kui ti gue na peko ti akotara ti mo.”

³Tongaso Moïse atene na azo ti Israel: “Ayeke nzoni ambeni koli na popo ti ala amu aye ti bira ti ala ti gue ti tiri bira na azo ti Madian. Bira ni ayeke titene KOTA GBIA akiri peko ti sioni na azo ti Madian.

⁴Fade ala yeke soro azo saki oko na ya ti amara ti Israel oko oko kue.”

⁵A soro azo saki oko na ya ti mara ti Israel oko oko. Tongaso wungo ti aturugu ni kue ayeke saki baleoko na use.

⁶Moïse atokua azo saki oko na ya ti mara oko oko na bira, ala na wayango-sandaga Pinas, molenge ti Elazar. Pinas amu aye ti sarango na kua ti da ti KOTA GBIA nga na atatalita titene ahuru si aturugu adekongo ti bira.

⁷Tongaso, ala gue, atiri bira na azo ti Madian alingbi na yanga so KOTA GBIA amu na Moïse. Ala tiri bira ni si ala fâ akoli ti sese ti Madian kue.

⁸Ala fâ nga agbia oku ti sese ti Madian: Evi, Rekem, Sur, Hur na Reba. Ala fâ nga Balaam, molenge ti Beor.

⁹Ala mu awali ti sese ti Madian kue na ngbaa, ala, na amolenge ti ala kue. Ala mu ataba, abagara, na nyama kue nga na aye ti azo ti kodro ni kue.

¹⁰Ala gbi agbata so kue azo ti Madian ayeke lango daa nga na abâbâ ti ala kue.

¹¹Na pekoni, ala hon na aye so kue ala gbu na peko ti bira, azo nga na anyama kue.

¹²Ala mu lege ti gue na aye ni na ya ti bâbâ ti ala so ayeke na lando ti Moab, na tere ti ngu ti Jourdain, na ndo so abaa le na gbata ti Jéricho. Ala gue na ni ti fa na Moïse, na wayango-sandaga Elazar nga na bongbi ti azo ti Israel kue.

¹³Moïse, na wayango-sandaga Elazar nga na amakonzi ti bongbi ti azo ti Israel asigigi na ya ti bâbâ ni ti gue ti wara ala na lege.

¹⁴Moïse asara ngonzo na tere ti amakonzi ti aturugu ti Israel, ala so alondo na bira ti kiri na bâbâ, so ti tene amakonzi so ayeke na li ti aturugu saki oko na ala so ayeke na li ti aturugu ngbangbo oko.

¹⁵Lo tene na ala: “Ala bata awali na fini ngbanga ti nyen?

¹⁶Ala hinga kue, lani na ya ti tënë ti Peor, awali ti mara ti Madian laa ama wango ti Balaam si ala pusu azo ti Israel ti sara siokpari ti ke KOTA GBIA. Ndani laa, kobela ti bubango kodro ati lani na ndö ti bongbi ti azo ti Israel.

¹⁷Fadeso, ala fâ amolenge-koli kue, ala fâ nga awali so kue ahinga koli awe.

¹⁸Me ala bata na fini ndali ti ala wani amaseka-wali so kue ade ti hinga koli pepe.

¹⁹Na popo ti ala, azo so afâ zo, wala ala so andu kuâ ti mbeni zo, ala ngba na gigi ti bâbâ ni na ya ti lango mbarambara. Fade ala yeke *sukula sioni ti ala na ota lango ni nga na mbarambara lango ni si. Tënë so abaa nga awali so ala gbu ala na ngbaa so.

²⁰Ala *sukula nga *sioni na tere ti abongo kue, ti aye so kue a sara na poro ti nyama, ti aye so kue a sara na kua ti tere ti ngasa nga na aye so kue a sara ni na keke.”

²¹Na pekoni, wayango-sandaga Elazar atene na aturugu so ague na bira, atene: “Andia so KOTA GBIA amu yanga daa na Moïse ayeke so:

²²‘Aye ti lôro, ti wen ti nginza, ti bengba wen, ti wen, ti eten, ti plon,

²³so ti tene aye so wâ alingbi ti gbi ni pepe, ala yeke yoro ni na ya ti wâ si aga *nzoni; me gi tongana ala kiri ayoro ni na ya ti ngu so a yeke zi ka sioni na li ti zo na ni si aye ni aga *nzoni. Âdu ti aye so kue wâ alingbi ti gbi ni, ala yoro ni na ya ti ngu ni si aga *nzoni.

²⁴Fade ala yeke sukula abongo ti ala na mbarambara lango ni si ala yeke ga *nzoni. Na pekoni, ala lingbi ti kiri na ya ti bâbâ.’ ”

²⁵*KOTA GBIA atene na Moïse:

²⁶“Mo na wayango-sandaga Elazar nga na akota zo ti asewa ti bongbi ti azo ti Israel, ala diko aye so kue a gbu na peko ti bira si aga na ni so, so ti tene azo na anyama.

²⁷Mo kangbi ya ti aye ni use: mbage ni oko ayeke ti aturugu so ague na bira, mbeni mbage ni ayeke ti bongbi ti azo ti Israel kue.

²⁸Aye so a mu na aturugu so ague na bira, mo zi mbeni ndali ti KOTA GBIA; mo zi zo oko na popo ti azo ngbangbo oku, nyama oko na popo ti anyama ngbangbo oku, bagara oko na popo ti abagara ngbangbo oku, lele oko na popo ti alele ngbangbo oku, taba oko wala ngasa oko na popo ti ataba wala angasa ngbangbo oku.

²⁹Aye so ala zi ni ti mu na mbi, KOTA GBIA so, mo mu ni na wayango-sandaga Elazar.

³⁰Na ndö ti aye so a mu na tanga ti azo ti Israel so, mo zi zo oko na popo ti azo baleoku, bagara oko na popo ti abagara baleoku, lele oko na popo ti alele baleoku, taba oko wala ngasa oko na popo ti ataba wala angasa baleoku. Aye so kue mo zi so, mo mu ni na azo ti mara ti Lévi so ala yeke sara kua na ya ti da ti mbi KOTA GBIA.”

³¹Moïse na wayango-sandaga Elazar asara ye ni alingbi na yanga so KOTA GBIA amu na Moïse.

³²Aye so aturugu agbu na peko ti bira si angba ayeke so: ataba na angasa 675 000;

³³abagara 72 000;

³⁴alele 61 000;

³⁵amaseka-wali so ade ti hinga koli pepe 32 000.

³⁶Mbage ti aye so a mu na aturugu so ague na bira ayeke so: ataba na angasa 337 500,

³⁷ti KOTA GBIA ayeke 675;

³⁸abagara: ti aturugu ayeke 36 000, ti KOTA GBIA ayeke 72;

³⁹alele: ti aturugu ayeke 30 500, ti KOTA GBIA ayeke 61;

⁴⁰azo: ti aturugu ayeke 16 000, ti KOTA GBIA ayeke 32.

⁴¹Aye so ayeke ti KOTA GBIA, Moïse amu na wayango-sandaga Elazar alingbi na yanga so KOTA GBIA amu na Moïse.

⁴²Aye so Moïse amu na bongbi ti azo ti Israel alingbi tere na ti so lo mu na azo so ague na bira.

⁴³Wungo ti anyama na ti azo ayeke so: ataba na angasa 337 500;

⁴⁴abagara 36 000;

⁴⁵alele 30 500;

⁴⁶azo 16 000.

⁴⁷Na ndö ti azo na anyama so a mu na azo ti Israel, Moïse azi zo oko na popo ti azo baleoku, nyama oko na popo ti anyama baleoku si lo mu azo ni na anyama ni na azo ti mara ti Lévi, ala so ayeke sara kua na ya ti da ti KOTA GBIA. Lo sara ye ni alingbi na yanga so KOTA GBIA amu na lo.

⁴⁸Amakonzi ti aturugu, ala so ayeke na li ti aturugu saki oko, na ala so ayeke na li ti aturugu ngbangbo oko aga nduru na Moïse

⁴⁹si ala tene na lo: “E, azo ti gbe ti mo, e diko aturugu so ayeke na gbe ti komandema ti e: turugu oko agirisa pepe.

⁵⁰E oko oko kue, e wara aye ti pendere ti lôro tongana: aye ti go, aye ti maboko, aye ti mê, abage na akete palata. Nilaa e ga na ni ti mu na *KOTA GBIA titene lo zi siokpari na li ti e.”

⁵¹Moïse na wayango-sandaga Elazar amu aye ti lôro so na maboko ti ala; aye so a leke ni pendere pendere awe.

⁵²Aye ti lôro so kue amakonzi so ayeke na li ti aturugu saki oko na ala so ayeke na li ti aturugu ngbangbo oko aga na ni na KOTA GBIA, nengo ni ayeke nduru na kilo 170.

⁵³Aye so asenge turugu awara, zo oko oko abata ni ndali ti lo wani.

⁵⁴Moïse na Elazar amu na maboko ti amakonzi so ayeke na li ti aturugu saki oko nga na ala so ayeke na li ti aturugu ngbangbo oko aye ti lôro ni kue, ala zia ni na ya ti da ti bongo so KOTA GBIA na azo ti lo ayeke wara tere daa, titene KOTA GBIA adabe ti lo na azo ti Israel.