Read sango Wungo ti azo 32 Bible Online

Wungo ti azo 32 - sango bible

Wungo ti azo 32

¹Azo ti mara ti Ruben na ti Gad ayeke na gba ti anyama, anyama ni awu ahon ndoni. Nilaa ala baa so sese ti Yazer na ti Galaad ayeke anzoni sese ndali ti batango anyama.

²Tongaso, ala gue, awara Moïse, lo na wayango-sandaga Elazar nga na amakonzi ti bongbi ti azo ti Israel si ala tene na ala:

³“Agbata ti Atarot, Dibon, Yazer, Nimra, Heshebon, Elale, Sebam, Nebo na Beon,

⁴so kue ayeke sese so *KOTA GBIA amu lani maboko na azo ti Israel si ala mu ni na lege ti bira awe. Sese ni ayeke nzoni sese ndali ti batango anyama; baa, e yeke na gba ti anyama.”

⁵Ala kiri atene: “Moïse, tongana mo baa e na nzoni le, mu na e sese so titene aga ti e. Mo gue na e na mbage ti ngu ti Jourdain pepe.”

⁶Moïse akiri tënë na ala, atene: “Nyen! A-ita ti ala ayeke gue ti tiri bira si ala ngba ti ala ge senge senge?

⁷Ngbanga ti nyen laa ala yeke sara titene be ti azo ti Israel awoko ti gue na sese so KOTA GBIA amu na ala so?

⁸Gi ye so ababâ ti ala asara ando na Kades-Barnea, na ndembe so mbi tokua ala ti *bembe ndo na kodro ti Kanaan so laa.

⁹Ala gue ngbii asi na popo-hoto ti Eshekol, ala bembe ndo na ya ti kodro ni. Na kiringo ti ala, ala sara si be ti tanga ti azo ti Israel awoko titene ala gue pepe na kodro so KOTA GBIA amu na ala.

¹⁰Na lango ni so, ngonzo ti KOTA GBIA alondo tongana wâ si lo deba yanga ti lo, lo tene:

¹¹‘Azo so alondo na kodro ti Ezipte si asigigi, ala so ngu ti ala ayeke baleuse wala ahon baleuse, sese so mbi mu zendo ti mu na Abraham, Isaac na Jacob, fade ala yeke baa ni pepe. Biani, ala ke ti sara ye alingbi na tënë ti yanga ti mbi.

¹²Gi Kaleb, molenge ti Yefune, zo ti kete mara ti Kenaz, lo na Josué, molenge ti Nune, ala laa ayeke li kâ, ngbanga ti so ala sara ye alingbi na tënë ti yanga ti mbi KOTA GBIA.’

¹³Tongaso, ngonzo ti KOTA GBIA alondo tongana wâ na tere ti azo ti Israel, lo sara si ala tambula na ya ti benyama, ala si kâ, ala si ge, na ya ti ngu baleosio, ngbii azo ti Israel so kue asara ye ti ke yanga ti KOTA GBIA so, ala kui kue ahunzi.

¹⁴Ala, mara ti azo ti sarango siokpari so, ala ye ti mu peko ti sarango ye ti ababâ ti ala titene ngonzo ti KOTA GBIA alondo na tere ti azo ti Israel?

¹⁵Ala, azo ti mara ti Ruben, na azo ti mara ti Gad, tongana ala ke ti ma yanga ti KOTA GBIA, fade lo yeke kiri ti sara si azo ti Israel aninga na ya ti benyama. Tongaso, fade ala yeke sara si azo ti Israel akui kue.”

¹⁶Azo ni aga nduru na tere ti Moïse si ala tene na lo: “Ên-en! E yeke sara agbagba ndali ti ataba na angasa ti e ge, e yeke sara nga agbata ndali ti asewa ti e.

¹⁷Na pekoni, fade e wani, e yeke mu aye ti bira ti e kozoni ti hon na li ni, ti gue na tanga ti azo ti Israel na ndo so KOTA GBIA amu na ala. Agbata so e sara angangu gbagba na tere ni, fade asewa ti e ayeke duti daa si azo ti kodro ni asara sioni na ala pepe.

¹⁸E yeke kiri na ndo ti e pepe ngbii zo ti Israel oko oko kue awara ndo so a mu na lo titene aga ti lo si.

¹⁹Me ti e, e ye ti wara ti e sese ni na mbage ti ala kâ pepe. E ye ti wara sese gi na To ti ngu ti Jourdain.”

²⁰Moïse atene na ala: “Ala sara ye ni tongana ti so ala tene so. Na dawa ti KOTA GBIA, ala mu aye ti bira ti ala, ala gue na bira.

²¹Ayeke nzoni azo ti bira ti ala kue afâ ngu ti Jourdain si na dawa ti KOTA GBIA; ala ngba ngbii lo mu sese ni na maboko ti awato ti lo si.

²²Ayeke nzoni ala kiri na ndo ti ala gi na ndembe so ala mu kodro ni titene aga ti KOTA GBIA. Tongaso si KOTA GBIA, lo na azo ti Israel alingbi ti bi tënë pepe na li ti ala si kodro so ge so aga ti ala.

²³Me tongana ala sara tongaso pepe, andaa ala sara siokpari ti ke KOTA GBIA; ala yeke wara ye ti peko ti siokpari ti ala ni.

²⁴Ala lingbi ti leke agbata ndali ti amolenge ti ala senge, ala lingbi ti leke agbagba ndali ti ataba na angasa ti ala senge; me ala sara ye alingbi na zendo so ala mu.”

²⁵Azo ti mara ti Ruben na ti Gad akiri tënë na Moïse: “E azo ti gbe ti mo, e yeke sara ande ye alingbi na tënë ti yanga ti mo.

²⁶Awali ti e, amolenge ti e na anyama ti e kue ayeke ngba ge na ya ti agbata ti Galaad.

²⁷E kue, e yeke mu aye ti bira ti e ti hon na bira na dawa ti KOTA GBIA tongana ti so mo tene.”

²⁸Na pekoni, Moïse amu yanga na wayango-sandaga Elazar na Josué, molenge ti Nune nga na akota zo ti asewa oko oko ti azo ti mara ti Israel; lo mu yanga ni ndali ti azo ti mara ti Ruben na ti Gad.

²⁹Lo tene na ala: “Tongana azo ti mara ti Gad na ti Ruben afâ ngu ti Jourdain legeoko na ala, azo ti Israel, tongana azo ti Gad na ti Ruben amu aye ti bira ti gue na bira na dawa ti KOTA GBIA, tongana ala mu tanga ti kodro ni awe, ayeke nzoni a mu na ala sese ti Galaad titene aga ti ala, na ti amolenge ti ala.

³⁰Me tongana ala sara tongaso pepe, ala yeke wara sese titene aga ti ala gi na popo ti azo ti Israel, na sese ti Kanaan.”

³¹Azo ti mara ti Gad na ti Ruben akiri tënë: “Tënë so KOTA GBIA atene na e so, e yeke sara ye alingbi na ni!

³²E yeke mu aye ti bira ti hon na sese ti Kanaan na dawa ti KOTA GBIA; me e yeke wara sese titene aga ti e na mbage ti ngu ti Jourdain ge.”

³³Tongaso Moïse amu na azo ti mara ti Gad na ti Ruben, nga na ndambo ti mara ti Manase, molenge ti Joseph kodro-gbia ti Sihon, gbia ti azo ti Amori; lo mu nga na ala kodro-gbia ti Og, gbia ti Bashan, na akodro nga na agbata so angoro ni.

³⁴Azo ti mara ti Gad akiri aleke agbata ti Dibon, ti Atarot, ti Aroer,

³⁵ti Atrot-Shofan, ti Yazer, ti Yogboha,

³⁶ti Bet-Nimra na ti Bet-Haran. Ala sara angangu gbagba na tere ti agbata ni; ala sara nga agbagba ti batango anyama ti ala.

³⁷Azo ti mara ti Ruben akiri aleke agbata ti Heshebon, ti Elale, ti Kiriataim,

³⁸ti Nebo, ti Baal-Meon na ti Sibma. Ala kiri amu mbeni fini iri na ambeni gbata so ala leke so.

³⁹Azo ti kete mara ti Makir, molenge ti Manase, amu ti ala sese ti Galaad. Ala tumba azo ti mara ti Amori so ayeke lango lani kâ.

⁴⁰Tongaso Moïse amu sese ni na ala titene ala sara kodro daa.

⁴¹Azo ti kete mara ti Yair, molenge ti Manase, ague, amu ti ala akete kodro ti azo ti Amori si ala di iri ti akete kodro ni “Akete kodro ti Yair”.

⁴²Noba ague, amu ti lo gbata ti Kenat na akete kodro so ayeke na tere ni. Lo mu iri ti lo wani, lo zia na ndö ti gbata ni.