Read sango Wungo ti azo 34 Bible Online

Wungo ti azo 34 - sango bible

Wungo ti azo 34

¹*KOTA GBIA atene na Moïse:

²Mu yanga so na azo ti Israel, mo tene: “Ala ga nduru ti li na sese ti Kanaan awe. Kanaan ayeke sese so a yeke mu na ala titene aga ti ala; akatikati ni ayeke so:

³“Na mbage ti Mbongo, katikati ti sese ti ala ayeke londo na benyama ti Zin, ayeke hon na tere ti sese ti Edom. Na mbage ti To, katikati ni ayeke gue, asi na yanga ti kota ngu ti Gba-ti-ingo.

⁴Katikati ni ayeke ngoro ahon na mbage ti Mbongo ti hoto ti Akparakongo si ague na mbage ti Zin; ayeke londo na Zin, ahon na mbage ti Mbongo ti Kades-Barnea. Na pekoni, ayeke hon na Hasar-Adar nga na Asmon.

⁵Ayeke londo na Asmon, akiri angoro ti si na ngu ti Ezipte ahon, asi na kota ngu-ingo ti Mediterane.

⁶“Na mbage ti Do, katikati ti sese ni ayeke kota ngu-ingo ti Mediterane.

⁷“Na mbage ti Banga, ala yeke suru katikati ni, ti londo na kota ngu-ingo ti Mediterane asi na hoto ti Hor.

⁸Ti londo na hoto ti Hor, ala yeke hon na ni na mbage ti Lebo-Hamat nga na Sedad.

⁹Katikati ni ayeke hon na mbage ti Zifron ti si na Hasar-Enan. So katikati ti sese ti ala na mbage ti Banga laa.

¹⁰“Na mbage ti To, ala yeke suru katikati ni, ti londo na Hasar-Enan ti si na Shefam.

¹¹Katikati ni ayeke londo na Shefam ti zu ti gue na mbage ti Ribla, na To ti Ain. Na pekoni, katikati ni ayeke zu ngbii andu tere ti kota ngu ti Genezaret, na mbage ti To.

¹²Katikati ni ayeke gue, asi na ngu ti Jourdain si asi na kota ngu ti Gba-ti-ingo. “So ayeke akatikati ti sese ti ala laa.”

¹³Moïse afa atënë so kue na azo ti Israel. Na pekoni, lo tene na ala: “So ayeke sese so KOTA GBIA amu yanga titene a bi mbeni ye si a kangbi ni na popo ti amara gumbaya nga na ndambo ti mara ni laa.

¹⁴Biani, azo ti mara ti Ruben, azo ti mara ti Gad na lege ti asewa ti ala nga na ndambo ti mara ti Manase awara sese titene aga ti ala awe.

¹⁵Amara use so na ndambo ti mara so, awara ti ala sese ni na mbage ti ngu ti Jourdain so abaa le na gbata ti Jéricho, na mbage ti To.”

¹⁶*KOTA GBIA atene na Moïse:

¹⁷“Wayango-sandaga Elazar, lo na Josué, molenge ti Nune laa ayeke kangbi sese ni na ala.

¹⁸Fade ala yeke soro zo oko na ya ti mara oko ti mu maboko na Elazar na Josué.

¹⁹Iri ti azo ni ayeke so: ti mara ti Juda: Kaleb, molenge ti Yefune;

²⁰ti mara ti Siméon: Shemuel, molenge ti Amihud;

²¹ti mara ti Benjamin: Elidad, molenge ti Kislon;

²²ti mara ti Dan: Buki, molenge ti Yogli;

²³ti mara ti Manase, molenge ti Joseph: Haniel, molenge ti Efod;

²⁴ti mara ti Efraim, molenge ti Joseph: Kemuel, molenge ti Shiftan;

²⁵ti mara ti Zabulon: Elisafan, molenge ti Parnak;

²⁶ti mara ti Isakar: Paltiel, molenge ti Azan;

²⁷ti mara ti Aser: Ahihud, molenge ti Shelomi;

²⁸ti mara ti Neftali: Pedahel, molenge ti Amihud.”

²⁹So ayeke iri ti azo so KOTA GBIA azia ala ti baa ndo na ndö ti kangbingo sese ti Kanaan na popo ti amara ti Israel laa.