Read sango Wungo ti azo 35 Bible Online

Wungo ti azo 35 - sango bible

Wungo ti azo 35

¹Na lando ti Moab, na tere ti ngu ti Jourdain so abaa le na gbata ti Jéricho, *KOTA GBIA atene na Moïse:

²“Mo mu yanga na azo ti Israel titene, na ya ti asese ti ala wani, ala mu ambeni gbata na azo ti mara ti Lévi titene azo ti mara ti Lévi ni alango daa. Ala mu nga na ala ambeni sese so ayeke na tere ti agbata ni so.

³Fade azo ti mara ti Lévi ayeke lango na ya ti agbata ni si asese ti tere ti agbata ni ayeke ga ndo ti batango na abagara ti ala nga na anyama so kue ayeke ti ala.

⁴Sese ti agbata so ala yeke mu na azo ti mara ti Lévi ayeke londo na tere ti agbagba ti agbata ni mbage na mbage kue, ayo metere ngbangbo oku.

⁵Tongaso, sese so angoro gbata ni, yongo ni ayeke metere saki oko, konongo ni ayeke metere saki oko si alingbi tere mbage na mbage kue. Gbata ni ayeke duti na be ti sese ni. So ayeke konongo ti asese ti tere ti agbata ti azo ti mara ti Lévi laa.

⁶Na popo ti agbata so ala yeke mu na azo ti mara ti Lévi, fade ala yeke mu agbata omene so zo so afâ mba ti lo na mbana pepe alingbi ti kpe daa ti bata tere ti lo. Ala yeke zia na ndö ni ambeni gbata baleosio na use.

⁷Agbata so ala yeke mu na azo ti mara ti Lévi, wungo ni kue ayeke baleosio na miombe, so ti tene agbata na sese so ayeke na tere ni.

⁸Azo ti mara ti Israel so ayeke wara agbata mingi, fade ala yeke mu nga agbata mingi na azo ti mara ti Lévi. Azo ti mara ti Israel so ayeke wara agbata mingi pepe, fade ala yeke mu nga agbata mingi pepe. Mara oko oko ayeke mu agbata alingbi na wungo ti agbata so lo yeke wara ni.”

⁹*KOTA GBIA akiri atene na Moïse:

¹⁰“Tene na azo ti Israel, mo tene: Tongana ala fâ ngu ti Jourdain si ala si na kodro ti Kanaan,

¹¹fade ala yeke soro ambeni gbata so azo alingbi ti kpe daa ti bata tere ti ala. Zo so afâ mba ti lo na mbana pepe, lo lingbi ti kpe daa ti bata tere ti lo.

¹²Agbata so ayeke ga ndo so zo ni ayeke kpe daa ti bata tere ti lo, tongaso si zo so alingbi ti kiri peko ti fango zo ni na lo alingbi ti fâ lo pepe. Tongana ade ti fâ ngbanga na li ti lo na dawa ti bongbi ti azo ti Israel pepe, fade a yeke fâ lo pepe.

¹³Agbata so zo ayeke kpe daa ti bata tere ti lo ayeke duti omene.

¹⁴Agbata ota ayeke duti na mbage ti ngu ti Jourdain, agbata ota na kodro ti Kanaan.

¹⁵Agbata omene so ayeke duti ndo so azo ti Israel, awande nga na agene so aga gango ayeke kpe daa ti bata tere ti ala. Mbeni zo so afâ mba ti lo na mbana pepe, lo lingbi ti kpe daa ti bata tere ti lo.

¹⁶“Tongana mbeni zo amu wen apika na mba ti lo si mba ti lo ni akui, zo ni ayeke zo ti fango zo; alingbi a fâ lo.

¹⁷Tongana zo ni apika mba ti lo na têne so alingbi ti fâ zo si mba ti lo ni akui, zo ni ayeke zo ti fango zo; alingbi a fâ lo.

¹⁸Tongana zo ni apika mba ti lo na keke so alingbi ti fâ zo si mba ti lo ni akui, zo ni ayeke zo ti fango zo; alingbi a fâ lo.

¹⁹Zo so alingbi ti kiri peko ni na zo ni laa ayeke fâ lo. Tongana lo wara lo, lo yeke fâ lo.

²⁰Tongana mbeni zo apusu mba ti lo na sioni be, wala lo bo mba ti lo ni na mbeni ye, ngbanga ti so be ti lo ake mba ti lo ni kozoni si mba ti lo ni akui,

²¹tongana lo kpo mba ti lo na gobo, lo sara na sioni be si mba ti lo ni akui, zo so ayeke zo ti fango zo; alingbi a fâ lo. Zo so alingbi ti kiri peko ni na lo laa ayeke fâ lo tongana lo wara lo.

²²“Mbeni ye tongaso alingbi ti si: mbeni zo apusu mba ti lo na mbana pepe, lo sara na sioni be pepe si mba ti lo ni akui, wala mbeni zo abi mbeni ye si ague, afâ mba ti lo, me zo ni aleke na be ti lo ti sara sioni pepe;

²³wala mbeni zo abi mbeni têne so alingbi ti fâ zo si têne ni ati na ndö ti mba ti lo si afâ lo, me lo baa zo ni pepe, lo ke lo kozoni pepe.

²⁴Tongana ye ni ayeke tongaso, fade bongbi ti azo ti Israel ayeke fâ ngbanga na popo ti zo so afâ mba ti lo nga na zo so alingbi ti kiri peko ni na lo.

²⁵Bongbi ti azo ti Israel ayeke zi zo ti fango mba ti lo na maboko ti zo so alingbi fade ti kiri peko ni na lo. Na pekoni, ala yeke kiri na zo ti fango zo ni na ya ti gbata so lo kpe fade daa ti bata tere ti lo so. “Zo so afâ mba ti lo na mbana pepe so ayeke ngba kâ ngbii kota wayango-sandaga akui, lo so a tuku mafuta so ayeke nde si ayeke nzoni kue na li ti lo ti zia lo nde ndali ti Nzapa.

²⁶Me tongana lo sigigi na ya ti gbata so lo kpe daa ti bata tere ti lo

²⁷si zo ti kiringo peko ti fango zo ni awara lo si afâ lo, tënë ayeke na li ti zo ti kiringo peko ni so pepe.

²⁸Zo so afâ mba ti lo so ayeke ngba na ya ti gbata so zo ayeke kpe daa ti bata tere ti lo, ngbii kota wayango-sandaga akui si. Na peko ti kuâ ti kota wayango-sandaga ni, lo lingbi ti kiri na sese ti lo senge.

²⁹“Andia so ayeke ndali ti ala, ndali ti *ahale ti ala kue, na ndo so kue ala yeke duti ande daa.

³⁰“Tongana mbeni zo afâ mba ti lo, alingbi ti fâ zo ni na lege ti tënë ti yanga ti azo mingi so abaa ye ni na le ti ala. Tënë ti yanga ti zo oko alingbi pepe.

³¹Zo so afâ mba ti lo si lo lingbi na kuâ, ala yeda pepe titene lo mu na ala nginza si ala zia lo, lo ngba na fini. Alingbi ala fâ lo.

³²Ala yeda pepe titene lo mu na ala nginza si ala zia lege na lo ti kpe ti gue ti bata tere ti lo na ya ti mbeni gbata ti batango tere. Ala zia lege na lo pepe ti kiri na ndo ti lo kozoni si kota wayango-sandaga akui.

³³“Kodro so ala yeke duti ande daa, ala sara titene aga *sioni pepe. Tukungo mene laa ayeke sara titene kodro aga *sioni. Zo so atuku mene ti zo, alingbi ala tuku nga mene ti lo si kodro ni akiri aga *nzoni.

³⁴Ayeke nzoni ala sara titene kodro so ala yeke duti daa so aga *sioni pepe, kodro so mbi yeke duti daa na popo ti ala. Biani, mbi yeke KOTA GBIA, mbi yeke duti na popo ti azo ti Israel.”