Read sango Wungo ti azo 6 Bible Online

Wungo ti azo 6 - sango bible

Wungo ti azo 6

¹*KOTA GBIA atene na Moïse:

²“Tene na azo ti Israel, mo tene: Tongana mbeni koli wala mbeni wali ayeda ti deba yanga ti lo ti ga nazir ti sara gi kua ti KOTA GBIA,

³alingbi lo nyon vin wala samba pepe, lo nyon kpingo vin pepe, lo nyon nga kpingo vin pepe so a sara na ngangu samba, lo nyon ngu ti le ti *vinye pepe; lo te ale ti vinye pepe, ataa ala so angba fini ni wala ala so ahole holengo.

⁴Na ngoi so kue lo ngba nazir, akobe so kue a sara na le ti vinye, lo lingbi ti te ni pepe, ataa kobe so a sara na akete kete le ti vinye wala na poro ni.

⁵Na ngoi so kue lo deba yanga ti lo ti ga nazir, alingbi lo kio kua ti li ti lo pepe; lo yeke zia tere ti lo nde ndali ti Nzapa, lo yeke zia kua ti li ti lo ayo yongo, ngbii ngoi so lo mu tere ti lo kue ti sara na kua ti KOTA GBIA ahunzi si.

⁶Na ngoi so kue lo mu tere ti lo na kua ti KOTA GBIA, lo lingbi ti ga nduru na kuâ ti zo pepe.

⁷Ataa kuâ ti babâ ti lo, ti mama ti lo, ti ita ti lo ti koli wala ti ita ti lo ti wali, lo yeke ga nduru na ni pepe. Tongana lo ga nduru na tere ti kuâ ni, fade lo yeke ga *sioni. Andaa yongoro kua ti li ti lo so afa atene, lo yeke zo so a zia lo nde ndali ti Nzapa.

⁸“Na ngoi so kue lo ngba nazir, lo yeke duti nde ndali ti KOTA GBIA.

⁹Tongana mbeni zo akui nduru na tere ti lo gi hio tongaso, fade li ti lo aga *sioni. Lango mbarambara na pekoni, so ti tene na lango ti *sukulango sioni ti lo, lo yeke kio kua ti li ti lo.

¹⁰Na lango miombe ni, lo yeke mu *akolokoto use wala *ambipa use, lo ga na ni na wayango-sandaga na yanga ti da ti bongo so KOTA GBIA na azo ti lo ayeke wara tere daa.

¹¹Wayango-sandaga ayeke mu mbeni ndeke ni oko na *sandaga ti zingo siokpari na li ti zo, lo yeke mu mbeni ndeke ni na sandaga so a yeke gbi ni kue na wâ. Na pekoni, lo yeke sara ye ti fa so KOTA GBIA azi siokpari awe na li ti nazir ni ndali ti zo so akui so. Gi na lango ni so, a yeke kiri ti zia li ti nazir ni nde ndali ti Nzapa.

¹²Fade nazir ni ayeke kiri ti zia tere ti lo nde ndali ti KOTA GBIA. Lo yeke ga na molenge ti taba ti ngu oko ti mu na sandaga titene Nzapa azi siokpari na li ti lo. Akozo lango so lani lo mu tere ti lo na KOTA GBIA so aga senge senge, ngbanga ti so lege ti lo ti nazir ni abuba awe.

¹³“So ayeke ndia ndali ti zo so aga nazir laa: na lango so ngoi ti lo ti nazir ahunzi awe, a yeke ga na lo na yanga ti da ti bongo so KOTA GBIA na azo ti lo ayeke wara tere daa.

¹⁴Lo yeke ga na anyama ti mu na sandaga na KOTA GBIA: kete koli-taba ti ngu oko so mbeni mbage ti tere ti lo abuba pepe ndali ti sandaga so a yeke gbi ni kue na wâ, kete wali-taba ti ngu oko ti mu na sandaga titene Nzapa azi siokpari na li ti lo, lo yeke ga nga na koli-taba oko ti mu na sandaga ti beoko.

¹⁵Lo yeke kiri ti mu sakpa oko ti mapa so a sara na mama ni pepe, agatoo so a mu nzoni farini, a tuku mafuta daa si a sara na ni, nga na makara so a sara na mama ni pepe si a kpaka mafuta na tere ni. Lo yeke mu nga sandaga ti farini na sandaga ti samba na tere ti asandaga ti anyama ni so.

¹⁶Wayango-sandaga ayeke ga na aye ni so, lo yeke zia na dawa ti KOTA GBIA. Na pekoni, lo yeke mu na KOTA GBIA sandaga ndali ti siokpari nga na sandaga so a yeke gbi ni kue na wâ.

¹⁷Ti koli-taba ni, lo yeke mu na sandaga ti beoko na KOTA GBIA; lo yeke bongbi ni na sakpa ti mapa so a sara na mama ni pepe. Na ndoni, lo yeke mu sandaga ti farini nga na sandaga ti samba.

¹⁸Na pekoni, nazir ni ayeke kio kua ti li ti lo na yanga ti da ti bongo so KOTA GBIA na azo ti lo ayeke wara tere daa. Lo yeke mu kua ti li ti lo ni si lo yeke bi ni na ya ti wâ so ayeke za na gbe ti sandaga ti beoko.

¹⁹Tongana nazir ni akio kua ti li ti lo awe, fade wayango-sandaga ayeke mu mbeni ngbongboro maboko ti koli-taba so a to ni awe, lo yeke mu na ya ti sakpa mbeni gatoo oko so a sara na mama ni pepe, na mbeni makara oko so a sara na mama ni pepe, lo yeke zia ni kue na ya ti maboko ti nazir ni.

²⁰Wayango-sandaga ayeke mu aye so kue, lo yeke ya na nduzu ti fa atene, a zia ni nde ndali ti KOTA GBIA. Asandaga ni so ayeke ga ti wayango-sandaga. Kate ni na ngbongboro gere ti nyama ni kue ayeke ye ti lo lakue. Na pekoni, nazir ni alingbi ti kiri ti nyon vin senge.

²¹“So ayeke ndia ndali ti zo so adeba yanga ti lo ti ga nazir laa. Aye so lo lingbi ti mu na sandaga na KOTA GBIA na lango so ngoi ti lo ti nazir ahunzi laa. Tongana lo yeke na mbeni ye ti zia na ndö ni, lo lingbi ti sara senge; me ayeke nzoni lo sara ye alingbi na ndia ti zendo ti nazir so lo deba lani yanga ti lo ti sara.”

²²*KOTA GBIA atene na Moïse:

²³“Tene na Aaron na amolenge ti lo, mo tene: Lege titene ala sara tufa na ndö ti azo ti Israel ayeke so:

²⁴‘Ayeke nzoni KOTA GBIA asara tufa na ndö ti mo, lo bata mo!

²⁵Ayeke nzoni KOTA GBIA abaa mo na nzoni le, lo sara nzoni be na mo!

²⁶Ayeke nzoni KOTA GBIA abi le ti lo na ndö ti mo, lo mu na mo siriri!’

²⁷Tongana awayango-sandaga adi iri ti mbi tongaso ti sara na tufa na ndö ti azo ti Israel, fade mbi yeke sara tufa na ndö ti ala.”