Read sango Wungo ti azo 8 Bible Online

Wungo ti azo 8 - sango bible

Wungo ti azo 8

¹*KOTA GBIA atene na Moïse:

²“Tene na Aaron, mo tene: Tongana mo zia wâ na ya ti alamba, ayeke nzoni alamba mbarambara ni aza gi na mbage ti dawa ti gere ti alamba ni.”

³Aaron asara ye ni alingbi na yanga so KOTA GBIA amu na Moïse. Lo zia alamba ni si ayeke za na mbage ti dawa ti gere ti alamba ni.

⁴Lege so a sara na gere ti alamba ni ayeke tongaso: a sara gere ti alamba ni kue na lôro so a pika tere ni pikango, ti londo na gere ni ngbii asi na akongo ti li ni. A sara gere ti alamba ni alingbi na kode so KOTA GBIA afa na Moïse.

⁵*KOTA GBIA atene na Moïse:

⁶“Mo mu azo ti mara ti Lévi na popo ti azo ti Israel, mo sara si ala ga *nzoni.

⁷Lege so mo yeke sara titene ala ga *nzoni ayeke so: mo fi na ndö ti ala ngu ti zingo siokpari na li ti zo. Ayeke nzoni ala kio kua ti tere ti ala kue, ala sukula abongo ti ala, ala sara si ala ga *nzoni.

⁸Fade azo ti mara ti Lévi aga na koli-bagara oko nga na farini so a gbu ya ni na mafuta. Ti mo, mo yeke mu mbeni use koli-bagara na *sandaga ndali ti zingo siokpari na li ti zo.

⁹Mo yeke iri azo ti mara ti Lévi ti ga na dawa ti da ti bongo so KOTA GBIA na azo ti lo ayeke wara tere daa si mo yeke bongbi nga azo ti Israel kue.

¹⁰Mo yeke iri azo ti mara ti Lévi ti ga na dawa ti KOTA GBIA si azo ti Israel kue ayeke zia maboko na ndö ti ala.

¹¹Na iri ti azo ti Israel, Aaron ayeke fa azo ti mara ti Lévi na dawa ti KOTA GBIA titene ala sara kua ti lo.

¹²Na pekoni, azo ti mara ti Lévi ayeke zia maboko na li ti akoli-bagara use so. Fade Aaron ayeke mu koli-bagara oko ndali ti sandaga ti zingo siokpari na li ti zo si mbeni koli-bagara ni ndali ti sandaga so a yeke gbi ni kue na wâ. Fade lo yeke sara ye so afa atene, KOTA GBIA azi siokpari na li ti azo ti mara ti Lévi awe.

¹³Moïse, fade mo yeke zia azo ti mara ti Lévi ti luti na dawa ti Aaron nga na dawa ti amolenge ti lo si mo yeke fa ala na dawa ti KOTA GBIA.

¹⁴Na popo ti azo ti Israel, mo yeke zia azo ti mara ti Lévi nde titene ala ga azo ti mbi.

¹⁵Na pekoni, azo ti mara ti Lévi ayeke ga ti sara kua ti ala na ya ti da ti bongo so KOTA GBIA na azo ti lo ayeke wara tere daa. “Tongaso laa mo yeke sara si azo ti mara ti Lévi aga *nzoni si mo yeke fa ala na dawa ti mbi.

¹⁶Na popo ti azo ti Israel, a mu ala na mbi; biani a mu ala na mbi awe: mbi mu ala na plase ti akozo molenge-koli ti Israel so kue azi lege ti dungo ni na mama ti ala.

¹⁷Biani, akozo molenge ti azo ti Israel kue ayeke ti mbi, ataa akozo molenge ti zo wala ti nyama. Na ndembe so lani mbi sara si akozo molenge-koli ti azo ti Ezipte akui, na ndembe so laa mbi zia akozo molenge-koli ti azo ti Israel nde ndali ti mbi.

¹⁸Me mbi mu azo ti mara ti Lévi na plase ti akozo molenge ti azo ti Israel.

¹⁹Na popo ti azo ti Israel, mbi mu azo ti mara ti Lévi ti mu ala na Aaron nga na amolenge ti lo. Mbi mu ala titene ala sara kua ndali ti azo ti Israel na ya ti da ti bongo so KOTA GBIA na azo ti lo ayeke wara tere daa. Kua ti ala ayeke nga ti sara ye so afa atene, KOTA GBIA azi siokpari na li ti azo ti Israel awe. Tongaso si azo ti Israel ayeke ga nduru pepe na ndo so ayeke nde si ayeke nzoni kue, tongaso si mbi sara nga sioni na ala pepe.”

²⁰Moïse, Aaron nga na bongbi ti azo ti Israel kue asara aye ni ndali ti azo ti mara ti Lévi alingbi gi na yanga so KOTA GBIA amu na Moïse.

²¹Azo ti mara ti Lévi asara si ala ga *nzoni, ala sukula abongo ti ala. Aaron afa ala na dawa ti KOTA GBIA si lo sara ye so afa atene, KOTA GBIA azi siokpari na li ti ala awe titene ala ga *nzoni.

²²Na pekoni, azo ti mara ti Lévi ato nda ti sarango kua ti ala, na gbe ti le ti Aaron na amolenge ti lo, na ya ti da ti bongo so KOTA GBIA na azo ti lo ayeke wara tere daa. Tongaso ala sara ye alingbi na yanga so KOTA GBIA amu na Moïse ndali ti azo ti mara ti Lévi.

²³KOTA GBIA akiri atene na Moïse:

²⁴“Tënë ndali ti azo ti mara ti Lévi ayeke so: ti to ndani na ngu baleuse na oku ti gue na ni, azo ti mara ti Lévi kue alingbi ti sara kua na ya ti da ti bongo so KOTA GBIA na azo ti lo ayeke wara tere daa.

²⁵Me na ngu baleoku, ala yeke zia kua ni, ala yeke sara kua mbeni pepe.

²⁶Ala lingbi ti mu maboko na a-ita ti ala na ngoi so a-ita ti ala ni ayeke sara kua na ya ti da ti bongo so KOTA GBIA na azo ti lo ayeke wara tere daa; me a yeke hunda na ala ti sara kua mbeni pepe. So ayeke lege so mo yeke mu kua na azo ti mara ti Lévi laa.”