Read sango Wungo ti azo 9 Bible Online

Wungo ti azo 9 - sango bible

Wungo ti azo 9

¹Na kozo nze ti use ngu ni, na peko ti so azo ti Israel asigigi na kodro ti Ezipte si ala yeke na ya ti benyama ti Sinai, *KOTA GBIA atene tënë na Moïse, lo tene:

²“Ayeke nzoni azo ti Israel asara *matanga ti Pake na lango ni so a fa na ala.

³Na lango baleoko na osio ti nze so, ala sara matanga ti Pake ni na lakui. Ayeke nzoni ala sara ni alingbi na andia ni nga na ambela ni kue.”

⁴Moïse atene na azo ti Israel titene ala sara matanga ti Pake.

⁵Tongaso, ala sara matanga ni na lango baleoko na osio ti kozo nze ni na lakui; ala sara ni na ya ti benyama ti Sinai. Azo ti Israel asara aye ni alingbi gi na yanga so KOTA GBIA amu na Moïse.

⁶Andaa ambeni koli ayeke daa so ala ga *sioni, ngbanga ti so ala ndu mbeni kuâ; nilaa ala lingbi ti sara matanga ti Pake na lango ni so pepe. Ala gue, abaa Moïse na Aaron

⁷si ala tene na Moïse: “E ga *sioni ndali ti so e ndu mbeni kuâ; ngbanga ti nyen laa a yeke kanga lege na e ti ya *sandaga na KOTA GBIA na lango so a fa tongana ti tanga ti azo ti Israel kue so?”

⁸Moïse akiri tënë na ala, atene: “Ala ku, mbi yeke ma ye so KOTA GBIA ayeke mu yanga daa ndali ti ala.”

⁹KOTA GBIA atene na Moïse:

¹⁰“Mo tene na azo ti Israel, mo tene: Tongana mbeni zo na popo ti ala wala mbeni *hale ti ala aga *sioni, ngbanga ti so lo ndu kuâ, wala tongana lo gue na mbeni tambula, lo lingbi ti sara matanga ti Pake ti mu nengo na KOTA GBIA.

¹¹Me azo ni so ayeke sara matanga ni na lango baleoko na osio ti use nze ni gi na lakui. A yeke te kete taba na mapa so asara na mama ni pepe nga na asengo pere.

¹²A yeke bata mbeni ye oko asi na ndaperere pepe; a yeke kungbi abio ti nyama ni pepe. A yeke sara matanga ni alingbi na ndia ti sarango Pake.

¹³Me tongana mbeni zo aga *sioni pepe si lo ke ti sara matanga ti Pake, ataa so lo gue na mbeni tambula pepe, fade a yeke tumba lo na ya ti bongbi ti azo ti Israel, ngbanga ti so lo ya sandaga na KOTA GBIA pepe na lango ni so a fa. Fade ngbanga ti sioni ti zo ni ayeke kiri na li ti lo wani.

¹⁴Tongana mbeni wande so aduti na ndo ti ala aye ti sara matanga ti Pake ti ne KOTA GBIA, ayeke nzoni lo sara matanga ni alingbi na ndia ti Pake nga na yanga so a mu ndali ti Pake ni. Ndia ndali ti matanga ti Pake ayeke gi oko ndali ti azo kue, ndali ti zo ti Israel nga ndali ti wande.”

¹⁵Na lango so a leke da ni na nduzu awe, ngbongboro mbinda aga amu ndö ni kue, da so a zia atêne na ya ni, atêne so a su atënë ti *mbuki na le ni. Ti londo na lakui ngbii asi na ndaperere, mbinda ni angba na ndö ti da ni si ayeke za zango tongana wâ.

¹⁶Ye ni ayeke sara gi tongaso lakue; so ti tene, mbinda ni amu ndö ti da ni kue si na bi, ayeke za zango tongana wâ.

¹⁷Lakue tongana mbinda ni alondo na ndö ti da ni ti hon, azo ti Israel ayeke londo nga ti hon. Ndo so mbinda ni ague, aluti daa, na ndo so laa azo ti Israel ayeke sara bâbâ ti ala daa.

¹⁸Tongana *KOTA GBIA amu yanga, azo ti Israel ayeke londo ti hon; tongana lo mu yanga, ala yeke sara bâbâ. Tongana mbinda ni angba na ndö ti da ni, azo ti Israel ayeke londo na ndo ni so ti hon pepe.

¹⁹Tongana mbinda ni angba na ndö ti da ni aninga, azo ti Israel ayeke sara kua na KOTA GBIA, ala yeke londo ti hon pepe.

²⁰Mbeni lâ, mbinda ni ayeke ngba na ndö ti da ni aninga pepe. Tongana KOTA GBIA amu yanga, azo ti Israel ayeke sara bâbâ; tongana lo mu yanga, ala yeke londo ti hon.

²¹Mbeni lâ, mbinda ni ayeke ngba na ndo oko, na lakui ngbii asi na ndaperere. Tongana mbinda ni alondo na ndaperere ti hon, azo ti Israel nga ayeke londo ti hon. Mbeni lâ, mbinda ni ayeke sara lango oko na bi oko si alondo ti hon. Tongana lo londo ti hon, azo ti Israel nga ayeke londo ti hon.

²²Ataa mbinda ni asara lango use, wala nze oko wala ngu oko na ndö ti da ni, azo ti Israel ayeke ngba na ya ti bâbâ ni, ala yeke londo ti hon pepe. Tongana mbinda ni alondo ti hon, ala nga ayeke londo ti hon.

²³Tongana KOTA GBIA amu yanga, azo ti Israel asara bâbâ; tongana lo mu yanga, ala yeke londo ti hon. Ala yeke sara kua na KOTA GBIA alingbi gi na yanga so lo mu na lege ti Moïse.