Read sango Mishe 1 Bible Online

Mishe 1 - sango bible

Mishe 1

¹So ayeke tënë ti *KOTA GBIA so asi na Mishe, zo ti kodro ti Moreshet, na ngoi ti agbia Yotam, Ahaz nga na Ezekias, agbia ti Juda. Mishe abaa ye ni na ya ti mbeni ye tongana bango-li na ndö ti agbata ti Samarii na ti Jérusalem.

²Ala amara kue, ala ma si! Mo, sese na aye so kue ayeke na ndö ti mo, ala dingi mê ti ala, ala ma si! Ti londo na da ti lo so ayeke nde si ayeke nzoni kue, Kota Gbia NZAPA ayeke ga ti bi tënë na li ti ala.

³Baa, *KOTA GBIA alondo na ndo so lo yeke duti daa si lo yeke sigigi. Lo yeke zu si lo yeke tambula na ndo so ayeke na nduzu ti sese.

⁴Ahoto aga tongana potopoto na gbe ti gere ti lo, apopo-hoto ayeke suru si aga tongana puru ti wotoro na le ti wâ, wala tongana ngu so atuku na ndö ti hoto si ayeke zu na gbeni.

⁵Aye so kue asi ndali ti ngangu li ti *ahale ti Jacob, ndali ti asiokpari ti azo ti Israel. Zo wa laa ayeke pusu azo ti Jacob titene ala ga azo ti ngangu li? Ayeke azo ti Samarii pepe? Zo wa laa ayeke pusu azo ti Juda titene ala voro anzapa nde na ndo so ayeke na nduzu so? Ayeke azo ti Jérusalem pepe?

⁶KOTA GBIA atene: “Ndali ti ye so ala sara so, fade mbi yeke sara titene gbata ti Samarii aga ndo so ye kue abuba daa, wala aga sese so azo ayeke lu gi *vinye daa. Mbi yeke sara titene atêne ti gbata ni alondo ti tuku na popo-hoto; mbi yeke sara titene agere ti gbata ni asigigi kue.

⁷Fade a yeke fâ ya ti ayanda ti gbata ni kue; aye so azo ti gbata ni awara, fade a yeke gbi ni kue na wâ, ngbanga ti so ala wara ni na lege ti sarango aye ti ndumba. Fade aye ni ayeke kiri ti hon na lege ti sarango aye ti ndumba.”

⁸Ndani laa, fade mbi, Mishe, mbi yeke toto si mbi yeke dema tere ti mbi. Mbi yeke tambula gere senge, mbi yeke tambula tere ti mbi senge. Mbi yeke toto tongana *anzagua, mbi yeke he bia ti totongo kuâ tongana ti so *anaamo ayeke toto so.

⁹A pika azo ti Samarii na ka, ka ni ayeke kota mingi, zo alingbi ti sara si ka ni amu pepe. Ka ni ague ngbii awara azo ti Juda, ague nga ngbii asi na yanga ti gbata ti Jérusalem, ndo so azo ti mbi ayeke daa.

¹⁰Ala fa tënë ni na Gat pepe, ala toto pepe! Ala rule tere ti ala na ya ti fuku ti sese na Bet-Leafra.

¹¹Ala azo ti gbata ti Shafir, azo ayeke gbu ala ti gue na ala na kodro wande, na kamene na le ti ala, tere ti ala senge. Azo ti gbata ti Saanan ayeke kiri ti sigigi pepe. Azo ti gbata ti Bet-Esel ayeke dema tere ti ala, gbata ni alingbi ti mu maboko na ala pepe.

¹²Azo ti gbata ti Marot ayeke do na mbeto ndali ti anzoni ye ti ala. Biani, ye ti sioni alondo na *KOTA GBIA, ague, asi na yanga ti gbata ti Jérusalem.

¹³Ala azo ti gbata ti Lakish, ala kanga pusu na tere ti ambarata! Ala laa asara si azo ti *Sion asara siokpari, gi ala laa apusu azo ti Israel ti sara ngangu li.

¹⁴Ndani laa, fade ala yeke kangbi na azo ti kodro ti Moreshet-Gat. Agbia ti Israel ayeke ku titene azo ti gbata ti Akzib amu maboko na ala, me ala yeke ku gbaa.

¹⁵Ala azo ti Maresha, fade KOTA GBIA ayeke tokua mbeni zo ti gue ti mu kodro ti ala na ngangu. Fade amakonzi ti Israel, so azo ane ala mingi, ayeke gue ti honde tere ti ala kâ na ya ti kota du ti Adulam.

¹⁶Ala azo ti Jérusalem, ala kio kua ti li ti ala, ala fâ kua ti li ti ala ndali ti amolenge ti ala so ala ye ala mingi so. Ala kio kua ti li ti ala kue titene aga tongana ti *ngoalo so amboko kue so. Biani, fade a yeke gbu amolenge ni ti gue na ala na kodro wande, yongoro na tere ti ala, azo ti Jérusalem.