Read sango Mishe 2 Bible Online

Mishe 2 - sango bible

Mishe 2

¹Mawa na azo so ayeke leke na be ti ala tënë ti sarango sioni ye; na bi, ala yeke leke tënë ti sarango sioni ye! Gi so ndo ahan awe, ala yeke sara ni, tongana ala wara lege ni.

²Tongana ala sara nzara ti ayaka ti azo, ala yeke mu ni; tongana ala sara nzara ti ada ti azo, ala yeke mu ni na maboko ti azo ni. Ala yeke sara ngangu na wa ti da nga na azo ti da ti lo, ala yeke gbu na ngangu aye ti azo ti da ni.

³Ndani laa, tënë so *KOTA GBIA atene ayeke so: “Baa, mbi yeke leke mbeni kota kpale ti tokua na ndö ti mara ti azo tongana ala so. Fade ala lingbi ti sigigi na ya ni pepe, ala lingbi ti tambula, li ti ala na nduzu pepe, ngbanga ti so ngoi ni ayeke duti ngoi ti kota kpale.”

⁴Na lango ni so, fade azo ayeke he bia na iri ti ala, azo ayeke he bia ti totongo kuâ so, atene: “A mu aye ti e kue kue kue awe! A gbanzi sese ti azo ti e awe! A kangbi ya ti sese ni na popo ti awato ti e. Ngbanga ti nyen si a mu aye ni na maboko ti e so?”

⁵Ndani laa, na ndembe so azo ti KOTA GBIA ayeke kangbi sese na popo ti ala, mbeni zo oko ti mu mbeni sese ni na ala, azo ti sarango sioni so, ayeke daa pepe.

⁶Ambeni zo ni ayeke diko gba ti atënë na tere ti mbi, atene: “Zia ti diko gba ti atënë so! Zia ti diko gba ti atënë so, mo tene: nyen na nyen kue, Nzapa ayeke zia kamene na le ti e so.

⁷Mo baa ti mo, mo tene, a deba azo ti Israel awe? *KOTA GBIA azia ti kanga be ti lo awe? Lo yeke sara ka ye tongaso?” Ti mbi, tënë ti mbi ayeke sara nzoni na zo so ayeke sara ye mbirimbiri.

⁸Me KOTA GBIA atene na ala: “Biri, ala sara ye tongana awato ti azo ti mbi. Azo so alondo na bira si ayeke kiri na siriri, ala mu kota bongo so azo ni ayu na ndö ti abongo ti ala.

⁹Ala tumba awali ti azo ti mbi na ya ti ada so awali ni aye mingi. Nengo so mbi mu na amolenge ti awali ni, ala zi ni ahon na ni biani biani.

¹⁰Ala londo, ala hon kâ! Ndo ti wungo tere ti ala ayeke ge mbeni pepe! Ndali ti siokpari ti ala, sese ti ala aga *sioni awe, ala yeke baa ande pasi, pasi ni ayeke duti ngangu mingi.”

¹¹Tongana mbeni zo ti handango ndo aga si lo yeke diko gba ti atënë ti mvene, atene: “Fade ala yeke wara gba ti vin na ngangu samba ti nyon!” Mara ti zo tongaso laa ayeke ga wayanga-Nzapa ti azo ni si zo ni ayeke diko abuba tënë, lo tene:

¹²“*KOTA GBIA atene: ala *ahale ti Jacob, fade mbi yeke bongbi ala kue na ndo oko, mbi yeke bongbi nga tanga ti azo ti Israel so angba na fini so. Mbi yeke zia ala na ndo oko tongana ti so a yeke bongbi ataba na ya ti gbagba ti ala, tongana gba ti anyama so ayeke na ndo ti tengo pere ti ala. Fade go ti ala ayeke wu tongana go ti gba ti azo.

¹³Lo so lo yeke zi lege, lo yeke tambula na dawa ti ala; a zi ala awe, ala hon yanga ti gbagba ni awe si ala sigigi awe. KOTA GBIA so ayeke Gbia ti ala laa amu li ti tambula ti ala ni.”