Read sango Mishe 4 Bible Online

Mishe 4 - sango bible

Mishe 4

¹“Mbeni lâ, gbanda, hoto so kota da ti *KOTA GBIA ayeke na ndö ni ayeke luti ngangu na ndö ti akota hoto kue; hoto ni ayeke yo na nduzu ahon akete hoto kue si amara ayeke gue kâ tongana ngu so ayeke sua.

²Fade amara nde gbani gbani ayeke gue kâ si ala yeke tene: ‘Ala ga, e gue na li ti hoto ti KOTA GBIA, na kota da ti Nzapa ti Jacob. Lo yeke fa na e lege so lo ye titene e mu, e yeke tambula na alege ti lo.’ Biani, ndia ti KOTA GBIA alondo na *Sion, tënë ti lo alondo na Jérusalem.

³Lo yeke fâ ngbanga na popo ti amara gbani gbani, lo yeke leke tënë na popo ti angangu mara, ngbii asi na ala so ayeke na yongoro ndo. Amara ni ayeke mu ayongoro zeme ti ala ti sara na akpoka; ala yeke mu alikongo ti ala ti sara na azeme ti fango na ale ti kobe. Mbeni mara ayeke kiri ti mu yongoro zeme na tere ti mbeni mara pepe; azo ayeke kiri ti manda lege ti tiringo bira pepe.

⁴Ala oko oko ayeke duti na siriri na gbe ti akeke ti *vinye ti ala nga na gbe ti akeke ti fige ti ala. Zo oko ti zia mbeto na be ti ala ayeke daa pepe.” Tënë so asigigi na yanga ti KOTA GBIA so ayeke na ndö ti dunia kue laa!

⁵Amara oko oko ayeke sara ye gi na iri ti anzapa ti ala; me ti e, e yeke sara ye gi na iri ti KOTA GBIA, Nzapa ti e kpu na kpu.

⁶So tënë ti yanga ti *KOTA GBIA laa: “Na lango ni so, fade mbi yeke bongbi azo so gere ti ala abuba, mbi yeke bongbi ala so a gbu ala si ague na ala na kodro wande, ala so mbi sara ngangu na ala.

⁷Ala so gere ti ala abuba, mbi yeke sara titene ala ga tanga ti azo so angba na fini; ala so a gue na ala na yongoro ndo, mbi yeke sara titene ala ga mbeni ngangu mara. Na ndö ti hoto ti Sion, fade KOTA GBIA ayeke duti gbia ti ala fadeso kpu na kpu.

⁸Mo, hoto ti Sion, mo so mo yeke baa ndo na ndö ti azo tongana mbeni wabatango-taba so aluti na nduzu, fade mo yeke kiri ti wara komandema ti mo ti kozo. Jérusalem ayeke kiri ti ga kota gbata ti kodro ni.”

⁹Ala azo ti Jérusalem, ngbanga ti nyen si ala yeke dekongo fadeso ngangu tongaso? Ngbanga ti nyen si ala yeke baa pasi tongana wali so aye ti du? Gbia ayeke na kodro ti ala pepe? Awamungo-wango ti ala akui awe?

¹⁰Ala azo ti Jérusalem, ala gbu ya ti ala, ala toto tongana wali so aye ti du, ngbanga ti so ala yeke sigigi fadeso na ya ti gbata ni ti gue ti duti na ya ti ngonda. Ala yeke gue na kodro ti Babilone; kâ, *KOTA GBIA ayeke zi ala, lo yeke gboto ala na maboko ti awato ti ala.

¹¹Fadeso, amara gbani gbani abongbi ti tiri bira na mo, ala tene: “Ayeke nzoni Jérusalem aga buba si e baa na le ti e buba ti lo ni.”

¹²Tënë so ayeke na be ti KOTA GBIA, azo ni ahinga ni oko pepe; ye so lo leke na be ti lo ti sarango ni, ala hinga ni oko pepe: lo ye ti bongbi ala tongana ti so a yeke bongbi ale ti kobe na le ti lakere titene a pika ni so.

¹³“Ala azo ti Jérusalem, ala londo, ala gue, apika ale ti kobe ni! Fade mbi yeke sara titene ala ga ngangu tongana bagara so adidi ti lo ayeke na wen si asokoto ti gere ti lo ayeke na bengba wen. Fade ala yeke nika amara gbani gbani; aye so ala gbu na peko ti bira, ala zia ni nde ndali ti mbi, KOTA GBIA; amosoro ti azo ni, ala zia ni nde ndali ti mbi, Kota Gbia ti sese kue.”

¹⁴Me ti fadeso, ala azo ti Jérusalem, ala bongbi azo ti bira ti ala; awato angoro kodro ti ala ti mu ni awe. Azo ni ayeke pika ngbangba ti makonzi ti azo ti Israel.