Read sango Mishe 5 Bible Online

Mishe 5 - sango bible

Mishe 5

¹*KOTA GBIA atene: “Mo, Betlehem Efrata, mo yeke kete kodro mingi na popo ti akodro ti mara ti Juda. Me zo so ayeke ga gbia ti azo ti Israel, lo yeke sigigi ande na ya ti mo. Nda ti lo ato nda ni ando giriri, yongoro kâ.”

²Ndani laa, fade Nzapa ayeke zia azo ti lo, ngbii asi na ngoi so wali so alingbi ti du molenge, lo du si. Tongaso, tanga ti a-ita ti molenge ni, ala so angba na fini na peko ti so a gbu ala si a gue na ala na kodro wande, ala yeke kiri na tere ti azo ti Israel.

³Lo yeke londo ti bata azo ti lo na ngangu ti KOTA GBIA, lo yeke bata ala na nengo ti iri ti KOTA GBIA, Nzapa ti lo. Fade azo ti mara ti lo ayeke duti na siriri. Biani, lo yeke ga kota zo na ndö ti azo kue ngbii asi na nda ti sese kue.

⁴Lo wani laa lo yeke mu siriri na azo. “Tongana azo ti Asirii aga ti mu kodro ti e si ala li na ya ti ayangbo ti agbia ti e, fade e yeke tokua azo ti li ni mbarambara na amakonzi miombe ti tiri bira na ala.

⁵Fade azo ti li ni so ayeke sara komandema na ndö ti sese ti Asirii na yongoro zeme, ala yeke sara komandema na ndö ti kodro ti Nemrod na zeme so yanga ni aza.” “Ti makonzi ni, fade lo yeke zi e na maboko ti azo ti Asirii tongana ala hon katikati ti kodro ti e titene ala li na sese ti e.”

⁶Fade azo ti Israel so ayeke ngba na fini na popo ti amara gbani gbani, ayeke ga tongana ngu ti pere so alondo na *KOTA GBIA; ala yeke ga tongana ngu-Nzapa so apika na ndö ti pere: ngu ni aku zo pepe, wala aku mbeni ye na maboko ti zo pepe.

⁷Azo ti Israel so ayeke ngba na fini na popo ti amara gbani gbani, ayeke ga tongana bamara na popo ti anyama ti ngonda, tongana kete bamara na popo ti ataba. Na hongo ti lo na popo ti ala, lo yeke do ala na gere ti lo si lo yeke suru ya ti ala; zo oko alingbi ti zi ala na maboko ti lo pepe.

⁸“Sara bira na awato ti mo, mo fâ ala kue!”

⁹So tënë ti yanga ti *KOTA GBIA laa: “Na lango ni so, fade mbi yeke zi ambarata so ayeke na kodro ti mo so kue; mbi yeke buba apusu ti mbarata ti mo kue.

¹⁰Mbi yeke buba agbata ti kodro ti mo kue; mbi yeke kungbi agbagba ti bira ti mo kue.

¹¹Mbi yeke zi aye ti mazi so ayeke na ya ti kodro ti mo kue; mbeni zo ti bango nda ti aye na lege ti aye ti le ti nduzu ayeke duti daa mbeni pepe.

¹²Ayanda ti mo na angbongboro têne so mo leke ni aluti na nduzu si mo yeke voro ni so, mbi yeke zi ni kue. Aye so mo wani, mo leke na maboko ti mo so, mo yeke kiri ti voro ni pepe.

¹³Mbi yeke de na sese akeke so mo leke ni aluti na nduzu si mo yeke voro ni so; mbi yeke buba agbata ti mo kue.

¹⁴Fade ngonzo ti mbi ayeke londo tongana wâ na tere ti amara so ake ti ma yanga ti mbi; mbi yeke kiri na ala peko ti sioni so ala sara na mbi.”