Read sango Sofonii 2 Bible Online

Sofonii 2 - sango bible

Sofonii 2

¹Ala azo ti mara so kamene ayeke sara ala pepe so, ala bongbi tere ti ala, ala gbu li ti ala

²kozoni si mbela ni asi, ngbanga ti so lango ni ayeke hon tongana holengo pere so pupu amu ahon na ni. Ala gbu li ti ala kozoni si sioni ngonzo ti *KOTA GBIA aga na ndö ti ala, kozoni si lango ti ngonzo ti KOTA GBIA aga na ndö ti ala.

³Ala asenge zo kue ti sese so, ala gi KOTA GBIA; ala so ayeke sara ye na lege ti ndia ti lo, ala gi lege ti sara ye ti mbirimbiri, ala gi lege ti sara tere ti ala kete na dawa ti Nzapa. E hinga pepe, fade ala yeke soo fini ti ala na lango so KOTA GBIA ayeke sara ngonzo.

⁴Zo ayeke kiri ti ngba na ya ti gbata ti Gaza pepe, gbata ti Askalon ayeke ga ngonda; a yeke tumba azo ti Asdod gi na bekombite, a yeke gboto azo ti Ekron tongana ti so a yeke gboto pere na gunda ni kue.

⁵Mawa na ala, azo so alango na yanga ti kota ngu-ingo, mara ti azo ti Kereti; tënë ti *KOTA GBIA so ayeke na tere ti ala: “Mo Kanaan, sese ti azo ti Filistii, fade mbi yeke buba mo kue, mbeni zo oko ti ngba kâ ayeke daa pepe.

⁶Sese ti mo so ayeke na yanga ti kota ngu-ingo ayeke ga ndo so anyama ayeke te pere daa, ayeke ga ndo so azo ti batango nyama ayeke tambula daa, ayeke ga gbagba ti ataba.”

⁷Tanga ti azo ti Juda so angba na fini, fade sese ni ayeke ga ti ala; ala yeke gue na anyama ti ala ti te pere na ando ni so; na bi, ala yeke lango na ya ti ada ti Askalon. Biani, KOTA GBIA, Nzapa ti ala ayeke ga ti sara nzoni na ala, lo yeke sara si gigi ti ala akiri aga nzoni.

⁸“Mbi ma zongango ndo ti azo ti Moab, mbi ma sioni zongango ndo ti azo ti Amon so ala zonga na azo ti mbi. Ala mu sese ti azo ti mbi ti kono na sese ti ala.

⁹Mbi yeke na fini! So tënë ti yanga ti *KOTA GBIA so ngangu ti lo ahon angangu kue, Nzapa ti Israel laa: Ndani laa, fade Moab ayeke ga tongana Sodome, azo ti Amon ayeke ga tongana Gomore. Kodro ti ala ayeke ga mbeni ndo so akeke ti ki amu ya ni kue, mbeni ndo so gi ingo laa ayeke daa, kodro ni ayeke buba biani biani. Tanga ti azo ti mbi so angba na fini, ala yeke ro aye ti kodro ni kue, ala yeke mu kodro ni ti ga ti ala.”

¹⁰Ye so ayeke si na ala ndali ti baba ti ala laa. Biani, ala zonga azo ti KOTA GBIA so ngangu ti lo ahon angangu kue, ala mu sese ti azo ti lo ti kono na sese ti ala.

¹¹Fade KOTA GBIA ayeke zia kota mbeto na be ti ala, lo yeke hunzi anzapa ti sese kue. Tongaso, ataa amara so kue ayeke na yongoro ndo, ala yeke kuku akpo li ti ala na sese na dawa ti lo, zo oko oko na kodro ti lo.

¹²“Ala azo ti Etiopii nga, fade mbi yeke sara si ala kui na ya ti bira.”

¹³Fade *Kota Gbia ayeke yoro maboko ti lo ti tiri bira na azo ti Banga; lo yeke buba kodro ti Asirii, lo yeke sara si gbata ti Ninive aga ngonda so ahole kasakasa.

¹⁴Gi anyama ti kodro na mara ti anyama nde nde laa ayeke lango na ya ni; andeke ti bi na abelu ayeke lango na go ti ada, toto ti andeke ayeke sigigi na le ti afenetere. Taa gi na yanga ti ada ni, gi aye so abuba awe, akeke ti sedre so a leke na ada ni angba senge.

¹⁵Baa, ye so ayeke si na gbata so, gbata so aduti ando na ngia so laa! Gbata so abaa ti lo atene, mbeni sioni ye alingbi ti si na lo pepe so; lo tene: “Gi mbi oko awe!” Asara tongana nyen laa gbata ni akiri aga ngonda so? Akiri aga ndo ti lango ti anyama so? Zo so kue ayeke hon nduru na ni ayeke huru yanga ti lo si lo yeke sara maboko ti he na gbata ni.