Read sango Aggée 2 Bible Online

Aggée 2 - sango bible

Aggée 2

¹Na use ngu ni so Darius ayeke gbia, na lango baleoko na oko ti nze mbarambara ni, tënë ti *KOTA GBIA asi na wayanga-Nzapa Aggée titene lo tene peko ni:

²Tene na Zorobabel, govoronere ti sese ti Juda, molenge ti Shealtiel, lo na kota wayango-sandaga Yeshua, molenge ti Yosadak nga na tanga ti azo ti kodro ni kue, mo tene:

³“Na popo ti ala, zo wa laa abaa ando mara ti pendere ti kota da ti KOTA GBIA ti kozoni so? Ti fadeso, ala yeke baa ni tongana nyen? Da ni ayeke fadeso ye oko na le ti ala pepe?

⁴Ti fadeso, Zorobabel, gbu ngangu! So tënë ti yanga ti KOTA GBIA laa. Yeshua, kota wayango-sandaga, molenge ti Yosadak, gbu ngangu! Ala azo ti kodro ni kue, ala gbu ngangu! So tënë ti yanga ti KOTA GBIA laa. Ala kue alondo, asara kua! Biani, mbi yeke na ala! So tënë ti yanga ti KOTA GBIA so ayeke na ndö ti dunia kue laa.

⁵Na ndembe so ala londo ando na Ezipte ti sigigi, mbi deba yanga ti mbi na ala. Tongaso, Yingo ti mbi ayeke duti na popo ti ala, ala sara mbeto oko pepe!

⁶Biani, tënë so KOTA GBIA so ayeke na ndö ti dunia kue atene ayeke so: Gi na ya ti kete ngoi, angba mingi pepe, fade mbi yeke yingi nduzu na sese, kota ngu-ingo na kuru sese.

⁷Fade mbi yeke yingi amara kue si apendere ye ti ala ayeke ga ge gbani gbani. Fade mbi yeke sara titene gonda asi singo na ya ti kota da so; tënë so KOTA GBIA atene laa.

⁸Nginza ayeke ti mbi, lôro ayeke ti mbi; so tënë ti yanga ti KOTA GBIA so ayeke na ndö ti dunia kue laa.

⁹Tongaso, fade gonda ti kota da so ayeke hon gonda ti kozo da ni. Na ndo so, mbi yeke sara titene siriri aduti daa; so tënë ti yanga ti KOTA GBIA so ayeke na ndö ti dunia kue laa.”

¹⁰Na lango baleuse na osio ti nze gumbaya ti use ngu ni so Darius ayeke gbia, tënë ti *KOTA GBIA akiri asi na wayanga-Nzapa Aggée, atene:

¹¹“Tënë so KOTA GBIA so ayeke na ndö ti dunia kue atene ayeke so: Hunda na awayango-sandaga ti fâ ya ti tënë so:

¹²Mbeni zo akanga na yanga ti bongo ti lo mbeni kasa ti nyama so a mu ni na *sandaga na Nzapa. Na pekoni, yanga ti bongo ni so andu mapa, wala akugbe ti kasa, wala vin, wala mafuta, wala mbeni mara ti kobe nde, a zia akobe ni so nde ndali ti Nzapa awe?” Awayango-sandaga akiri tënë, atene: “Ên-en!”

¹³Aggée akiri ahunda ala, atene: “Tongana mbeni zo andu kuâ ti zo, andaa lo ga *sioni awe. Na pekoni, tongana lo kiri lo ndu mbeni kobe ni so, kobe ni aga nga *sioni awe?” Awayango-sandaga akiri tënë: “Een, aga *sioni awe!”

¹⁴Aggée akiri tënë: “So tënë ti yanga ti KOTA GBIA laa: ‘Azo ti kodro so ayeke gi tongaso. Mara so ayeke gi tongaso na le ti mbi. Aye ti maboko ti ala kue ayeke gi tongaso; aye so ala yeke mu na mbi na sandaga aga *sioni awe.’ ”

¹⁵*KOTA GBIA akiri atene: “Fadeso, ala gbu li ti ala nzoni na aye so ayeke si, ti londo laso ti gue na ni. Kozo titene ala do atêne na ndoni na ndoni ti sara na kota da ti KOTA GBIA,

¹⁶nyen laa asi na ala, nyen? Mbeni zo abaa ti lo atene, ni yeke gue ti mu sakpa ti kobe baleuse na ya ti gogoro, me lo wara gi sakpa baleoko. Mbeni zo apete vin ti lo na ya ti du, lo baa ti lo, lo tene, ni yeke wara litere baleoku, me lo wara gi litere baleuse.

¹⁷Mbi pika ala si akua ti maboko ti ala kue abuba; mbi sara si akobe ti yaka ti ala ahole si afun, *pembe ti bekpa ati na ndö ti akobe ni si abuba ni. Me ala kiri na mbage ti mbi pepe; so tënë ti yanga ti KOTA GBIA laa.

¹⁸Ala gbu li ti ala nzoni na aye so ayeke si, ti londo laso ti gue na ni. Laso, na lango baleuse na osio ti nze gumbaya ni si a zia gere ti kota da ti KOTA GBIA; be ti ala agirisa na ni pepe.

¹⁹Ale ti kobe angba na ya ti agogoro ti ala? Ataa keke ti vinye, keke ti fige, keke ti grenade nga na keke ti olive ale oko pepe. Ti londo laso ti gue na ni, mbi yeke sara tufa na ndö ti ala.”

²⁰Tënë ti *KOTA GBIA akiri asi na Aggée ti fani use ni, na lango baleuse na osio ti nze ni, atene:

²¹“Tene na Zorobabel, govoronere ti sese ti Juda, mo tene: ‘Fade mbi yeke yingi nduzu na sese.

²²Mbi yeke kinda mbata ti agbia si mbi yeke zi ngangu ti akodro-gbia ti amara; mbi yeke kinda apusu ti mbarata na azo ti kpengo na ni; ambarata na azo ti kpengo na ambarata ni ayeke ti. Zo oko oko ayeke fâ mba ti lo na yongoro zeme.

²³So tënë ti yanga ti KOTA GBIA so ayeke na ndö ti dunia kue laa: Na lango ni so, fade mbi yeke mu mo, Zorobabel, molenge ti Shealtiel, mo so mo yeke zo ti kua ti mbi, so tënë ti yanga ti KOTA GBIA laa, mbi yeke zia mo tongana *ye ti kpongo na nzoroko ti mbi, ngbanga ti so, mo laa mbi soro mo; so tënë ti yanga ti KOTA GBIA so ayeke na ndö ti dunia kue laa.’ ”