Read sango Zakarii 1 Bible Online

Zakarii 1 - sango bible

Zakarii 1

¹Na ngu use ni so Darius ayeke gbia, na nze miombe ni, tënë ti *KOTA GBIA asi na wayanga-Nzapa Zakarii, molenge ti Berekia, molenge ti Ido. Tënë ni atene:

²“Be ti mbi KOTA GBIA aso mingi na akotara ti ala, azo ti Israel,

³nilaa fade mo yeke tene na ala: Tënë so KOTA GBIA so ayeke na ndö ti dunia kue atene ayeke so: Ala kiri na mbage ti mbi — so tënë ti yanga ti KOTA GBIA so ayeke na ndö ti dunia kue laa — si fade mbi yeke kiri na mbage ti ala; tënë so KOTA GBIA so ayeke na ndö ti dunia kue atene laa.

⁴Ala sara ye tongana ti akotara ti ala pepe. Ando, akozo wayanga-Nzapa afa tënë ti mbi na akotara ti ala ni, atene: Tënë so KOTA GBIA so ayeke na ndö ti dunia kue atene ayeke so: ‘Ala zia ngbene lege ti sarango ye ti ala, ala zia asioni sarango ye ti ala.’ Me ala ma pepe, ala ma yanga ti mbi pepe; so tënë ti yanga ti KOTA GBIA laa.

⁵Fadeso, akotara ti ala ni ayeke na ndo wa? Awayanga-Nzapa ni angba lakue na fini?

⁶Me atënë ti mbi na ambela ti mbi so mbi zia na yanga ti awayanga-Nzapa, azo ti kua ti mbi, ti tene na ala so, atënë ni andu akotara ti ala. Nilaa, akotara ti ala akiri na mbage ti mbi si ala yeda, atene: ‘KOTA GBIA so ayeke na ndö ti dunia kue aleke lani na be ti lo ti sara ye na e alingbi na lege ti dutingo ti e nga na asarango ye ti e. Ye so lo sara na e laa.’ ”

⁷Na use ngu so Darius ayeke gbia, na lango baleuse na osio ti nze baleoko na oko ni, so ti tene na nze ti Shebat, tënë ti *KOTA GBIA asi na wayanga-Nzapa Zakarii, molenge ti Berekia, molenge ti Ido. Tënë so Zakarii atene ayeke so:

⁸Na bi so, na ya ti mbeni ye tongana bango-li, mbi baa mbeni koli so aduti na ndö ti mbeni mbarata so tere ti lo abe bengo. Mbarata ni ayeke luti na popo ti akeke ti mirte, na popo-hoto, na gbeni kâ. Na peko ti lo, ambeni mbarata ni ayeke daa so tere ti ala abe bengo, tere ti ala avuru tuuu si tere ti ala avuru vurungo.

⁹Mbi hunda koli ni, mbi tene: “Kota zo, ambarata so aye ti fa nyen?” *Ange so ayeke tene tënë na mbi so akiri tënë na mbi, atene: “Mbi yeke fa nda ni na mo.”

¹⁰Lo so lo yeke luti na popo ti akeke ti mirte so amu tënë si atene: “KOTA GBIA atokua ala ti tambula na ndö ti sese.”

¹¹Tongaso, azo ti kpengo na ambarata atene na ange ti KOTA GBIA so ayeke luti na popo ti akeke ti mirte so, atene: “E tambula na ndö ti sese kue, sese ni ayeke kpoo si wusuwusu ayeke daa oko pepe.”

¹²Na pekoni, ange ti KOTA GBIA akiri amu tënë si atene: “KOTA GBIA, mo so mo yeke na ndö ti dunia kue so, asara fadeso ngu balembarambara awe so mo sara ngonzo na tere ti gbata ti Jérusalem na agbata ti Juda. Mo yeke ku ngbii asi lawa si mo yeke baa mawa ti ala?”

¹³Tongaso, KOTA GBIA akiri atënë ti mungo ngangu na be nga na atënë ti dengo be na ange so ayeke tene tënë na mbi so.

¹⁴*Ange so ayeke tene tënë na mbi so ahunda na mbi ti tene tënë ti *KOTA GBIA so ayeke na ndö ti dunia kue so na azo, atene: “Mbi yeke sara mbanda ti Jérusalem na ti hoto ti *Sion mingi.

¹⁵Me be ti mbi aso mingi na amara so abaa tere ti ala tongana amara so alingbi awe so. Na ndembe so lani mbi sara ngonzo gi kete na tere ti azo ti Israel, ti ala, ala sara si mawa ti Israel akiri ahon ndoni.

¹⁶Ndani laa, tënë so KOTA GBIA atene ayeke so: mbi yeke kiri na mbage ti Jérusalem ti baa mawa ti lo; fade a yeke kiri ti leke da ti mbi kâ, a yeke kiri ti leke gbata ni; so tënë ti yanga ti KOTA GBIA so ayeke na ndö ti dunia kue laa.”

¹⁷Ange ni akiri ahunda na mbi ti tene tënë so: Tënë so KOTA GBIA so ayeke na ndö ti dunia kue atene ayeke so: “Fade agbata ti mbi ayeke kiri ti wara anzoni ye ti ala. Mbi yeke kiri ti baa mawa ti Sion si mbi yeke kiri ti soro Jérusalem.”