Read sango Zakarii 11 Bible Online

Zakarii 11 - sango bible

Zakarii 11

¹Hoto ti Liban, mo zi ayanga da ti mo si wâ agbi akeke ti sedre ti mo kue.

²Ala akeke ti sipre, ala toto na vundu, ngbanga ti so akeke ti sedre ati awe, ngbanga ti so a kinda angangu keke ni awe. Ala akeke ti shene ti Bashan, ala toto na vundu, ngbanga ti so a de kota gbako ti ala ni kue awe, gbako so zo alingbi ti li daa pepe so.

³Ala azo, ala ma toto ti awabatango-taba, ngbanga ti so gonda ti ala ahon awe. Ala ma toto ti akete bamara, ngbanga ti so pendere gbako ti tere ti ngu ti Jourdain abuba awe.

⁴Mbeni lâ, tënë so *KOTA GBIA, Nzapa ti mbi atene ayeke so: “Ga wabatango-taba ti ataba so a soro ala ti gue na ala na ndo ti fango ala.

⁵Azo so ayeke vo ataba ni, ala yeke fâ go ti ala, me ala baa ti ala atene, tënë ayeke na li ti ala pepe. Ala so ayeke ka ataba ni ayeke tene: ‘E mu singila na KOTA GBIA. Baa, e ga azo ti mosoro awe!’ Me taa awabatango-taba ni ayeke baa mawa ti ataba ni oko pepe.

⁶Biani, mbi nga, fade mbi yeke baa mawa ti azo ti sese so pepe; so tënë ti yanga ti KOTA GBIA laa. Fade mbi yeke zia zo oko oko na maboko ti mba ti lo so ayeke nduru na lo, nga na maboko ti gbia ti kodro ti lo. Agbia ni ayeke buba sese biani biani, me mbi yeke zi zo oko na maboko ti agbia ni pepe.”

⁷Tongaso mbi ga wabatango-taba ti ataba so azo ti kango ala asoro ala ti gue na ala na ndo ti fango ala. Mbi mu anduru keke use ti awabatango-taba. Mbi di iri ti mbeni keke ni “Nzoni be”, mbi di iri ti mbeni “Beoko”. Na pekoni, mbi gue ti bata ataba ni.

⁸Gi na ya ti nze oko, mbi tumba awabatango-taba ti ala ota kue. Na pekoni, nzara ti batango ataba ni ahunzi na be ti mbi si ala nga, be ti ala akiri ake mbi.

⁹Tongaso, mbi tene na ala: “Mbi yeke kiri ti gue na ala na ndo ti tengo pere pepe. Ala so aye ti kui, ala kui! Ala so aye ti fâ ala, a fâ ala! Atanga ni so angba na fini si ala ye ti te tere na popo ti ala, ala te tere!”

¹⁰Na pekoni, mbi mu keke ti mbi so iri ni Nzoni be si mbi fâ ya ni titene mbi buba ya ti *mbuki so mbi na azo kue, e sara.

¹¹Ya ti mbuki ni abuba gi na lango ni so. Azo ti kango ataba ni so ayeke baa mbi gi kpoo ahinga atene, so ayeke fade tënë ti KOTA GBIA laa.

¹²Tongaso mbi tene na ala: “Tongana ala baa nzoni na le ti ala, ala mu na mbi futa ti mbi. Tongana ala ye pepe, ala zia ni!” Nilaa ala diko ale ti nginza baleota si ala mu na mbi.

¹³KOTA GBIA atene na mbi: “Ala baa ti ala atene, ngere ti mbi laa! Tuku nginza ni na matawa!” Tongaso, mbi mu ale ti nginza baleota so si mbi tuku ni na matawa, na ya ti kota da ti KOTA GBIA.

¹⁴Na pekoni, mbi fâ ya ti use keke ti mbi so iri ni Beoko titene mbi kangbi songo so ayeke na popo ti azo ti Juda na azo ti Israel.

¹⁵KOTA GBIA akiri atene na mbi: “Fadeso, mo sara tere ti mo tongana mbeni wabatango-taba so li ti lo ayeke daa pepe.

¹⁶Biani, mbi yeke sara titene mbeni fini wabatango-taba abaa gigi na ya ti kodro ni: ataba so ahon kirikiri, tënë ti ala ayeke so be ti lo oko pepe; ala so agirisa, lo yeke gi ala pepe; ala so awara ka, lo yeke kanga ka ti ala pepe; ala so ayeke na seni, lo yeke mu kobe na ala pepe. Me ti ala so akono nzoni, lo yeke te ala si lo yeke zi *sokoto ti gere ti ala.”

¹⁷Mawa na wabatango-taba so lo hinga ndo pepe, lo so lo do ataba ti lo, lo zia ala so! Ayeke nzoni a de maboko ti lo si a koro le ti lo ti mbage ti koli na ya ti bira! Ayeke nzoni maboko ti lo ahole biani biani, le ti lo ti mbage ti koli amingo biani biani!