Read sango Zakarii 14 Bible Online

Zakarii 14 - sango bible

Zakarii 14

¹Lango ti *KOTA GBIA aga nduru awe. Na lango ni so, fade azo ayeke ro aye ti ala, azo ti Jérusalem ti kangbi ni na le ti ala wani.

²Fade KOTA GBIA ayeke bongbi amara kue ti tiri bira na Jérusalem; azo ayeke mu gbata ni, ala yeke nzi aye ti ya ti ada, ala yeke gbu awali na ngangu ti lango na ala; ala yeke gbu ndambo ti azo ti gbata ni ti gue na ala na kodro wande, me tanga ti azo ayeke ngba na ya ti gbata ni.

³Na pekoni, fade KOTA GBIA ayeke londo ti tiri bira na amara so; lo yeke tiri na ala tongana ti so lo yeke sara lakue na ngoi ti bira.

⁴Na lango ni so, lo yeke zia gere ti lo na ndö ti hoto ti a-olive so abaa ndo le na le na Jérusalem, na mbage ti To ti gbata ni. Fade ya ti hoto ni ayeke suru use, mbeni popo-hoto ayeke sigigi daa, ti londo na To ngbii asi na Do. Mbeni mbage ti hoto ni ayeke hon na mbage ti Banga si mbeni mbage ni ayeke hon na mbage ti Mbongo.

⁵Fade ala yeke mu lege ti popo-hoto ti mbi ti kpe ti hon, ngbanga ti so popo-hoto ni ague ngbii asi na Asal. Ala yeke kpe tongana ti so akotara ti ala akpe ando na lango so sese ayingi, na ngoi so Ozias ayeke gbia ti sese ti Juda. Na pekoni, fade KOTA GBIA, Nzapa ti mbi ayeke si, lo na *a-ange ti lo kue.

⁶Na lango ni so, aye so ayeke su na le ti nduzu ayeke kiri ti su pepe, de ayeke kiri ti sara pepe, *glase ayeke kiri ti duti daa pepe.

⁷Lango ni so ayeke duti mbeni lango so ayeke nde; KOTA GBIA laa ahinga lango ni so. Fade lâ ayeke kiri ti duti daa pepe, vukongo ndo ayeke kiri ti duti daa pepe; ataa na lakui, lumiere ayeke ngba ti za.

⁸Na lango ni so, fade mbeni li ti ngu ayeke sigigi na Jérusalem; ngu ni ayeke kangbi ya ti lo use, mbeni mbage ni ayeke sua ti gue na mbage ti kota ngu ti Gba-ti-ingo si mbeni mbage ni ayeke sua ti gue na mbage ti kota ngu-ingo ti Mediterane. Ataa na ngoi ti buru, ataa na ngoi ti ngu-Nzapa, ngu ni ayeke ngba lakue ti sua suango.

⁹Fade KOTA GBIA ayeke duti gbia ti sese kue. Na lango ni so, lo yeke duti oko Nzapa so azo ayeke voro lo si ala yeke hinga gi iri ti lo oko.

¹⁰Ti londo na Geba ngbii asi na Rimon, na Mbongo ti Jérusalem, fade kodro ni kue ayeke ga lando. Jérusalem ayeke duti na ndo so ayeke na nduzu; gbata ni ayeke londo na yanga ti gbagba ti Benjamin ngbii asi na yanga ti gbagba so iri ni Ti-Ndangoro, ayeke gue ngbii asi na ngbene yanga ti gbagba ni; akiri ague ngbii asi na kota da ti Hananeel so ayo na nduzu, ngbii asi na ndo so a yeke pete vin ti gbia daa.

¹¹Fade azo ayeke lango na ya ti gbata ni; a yeke kiri ti buba ni pepe; azo ayeke duti kâ na siriri.

¹²Amara so atiri lani bira na azo ti Jérusalem so, baa, aye ti sioni so KOTA GBIA ayeke sara titene ati na ndö ti ala laa: so ala ngba na le ti ala gi tongaso, fade kasa ti tere ti ala ayeke fun gi fungo, le ti ala ayeke fun na ya ti da ni, menga ti ala ayeke fun na ya ti yanga ti ala.

¹³Na lango ni so, fade KOTA GBIA ayeke bi kota mbeto na popo ti ala; zo oko oko ayeke londo ti tiri na mba ti lo, ala yeke gbu tere na tiri na popo ti ala.

¹⁴Azo ti Juda ayeke londo ti tiri bira ndali ti gbata ti Jérusalem. Ala yeke mu amosoro kue ti amara so ayeke lango nduru na Jérusalem: lôro, wen ti nginza na abongo gbani gbani.

¹⁵Anyama kue ti awato ni: ambarata, *apâkârâ, azambala na alele, mara ti aye ti sioni so ayeke si nga na ala tongana ti so asi na azo.

¹⁶Ti londo na lango ni so, amara so atiri lani bira na azo ti Jérusalem si azo ni angba na fini so, na ya ti ngu oko oko, ala yeke gue na ya ti gbata ni ti voro KOTA GBIA so ayeke na ndö ti dunia kue si ala yeke sara matanga ti Akpangba.

¹⁷Tongana mbeni mara ti ndö ti sese so ake ti gue na Jérusalem ti voro KOTA GBIA, lo so lo yeke na ndö ti dunia kue so, fade ngu-Nzapa ayeke pika na ndö ti kodro ti lo pepe.

¹⁸Tongana azo ti Ezipte ake ti gue na Jérusalem ti sara matanga ti Akpangba, fade ye ti sioni so ayeke ti nga na ndö ti ala tongana ti so KOTA GBIA asara si ati na ndö ti amara so ake ti gue ti sara matanga ni so.

¹⁹Azo ti Ezipte na amara so kue ayeke ke ti gue ti sara matanga so, aye ti sioni so ayeke si na ala laa.

²⁰Na lango ni so, ye so a kanga na go ti ambarata si ayeke toto so, fade a yeke su mbeti na ndö ni, atene: “Ye so a zia nde ndali ti KOTA GBIA”. Atawa ti ya ti kota da ti KOTA GBIA, fade ayeke ga tongana kopo na dawa ti gbalaka, kopo so a yeke zia mene daa ti fi na tere ti aye.

²¹Atawa so kue ayeke na Jérusalem na atawa so kue ayeke na Juda, fade a yeke zia ni nde ndali ti KOTA GBIA so ayeke na ndö ti dunia kue. Azo so kue ayeke ga ti ya *sandaga, ala yeke mu atawa ni ti to na anyama ti sandaga ni. Tongana lango ni so alingbi, fade a yeke kiri ti baa azo ti dengo buze na ya ti kota da ti KOTA GBIA pepe, lo so lo yeke na ndö ti dunia kue so.