Read sango Malashii 1 Bible Online

Malashii 1 - sango bible

Malashii 1

¹Nengo tënë. So tënë ti *KOTA GBIA so lo zia na yanga ti Malashii ti tene na azo ti Israel.

²KOTA GBIA atene na azo ti lo: “Mbi ye ala.” Me ala tene: “Nyen laa afa atene mo ye e?” KOTA GBIA akiri tënë: “Ezau ayeke ita ti Jacob pepe? — So tënë ti yanga ti KOTA GBIA laa — Andaa mbi ye Jacob,

³me mbi ke Ezau. Mbi sara si ahoto ti lo aga ngonda; mbi mu aye ti lo na *anzagua ti benyama.

⁴Tongana azo ti Edom atene: ‘A buba agbata ti e kue awe, me fade e yeke kiri ti leke ni senge.’ ” Tënë so KOTA GBIA so ayeke na ndö ti dunia kue atene ayeke so: “Ala kiri aleke ni ma! Me ti mbi, mbi yeke kungbi ni kue na sese. Fade a yeke iri ala: ‘Sese ti azo ti sarango sioni’, wala ‘Azo so KOTA GBIA asara ngonzo na tere ti ala kpu na kpu’.

⁵Ala azo ti Israel, fade ala yeke baa ye ni na le ti ala si ala yeke tene: ‘KOTA GBIA ayeke kota, ataa ahon katikati ti sese ti Israel!’ ”

⁶Tënë so KOTA GBIA so ayeke na ndö ti dunia kue atene na ala, awayango-sandaga ayeke so: “Molenge-koli ayeke ne babâ ti lo, zo ti kua ayeke ne makonzi ti lo. Tongana mbi yeke Babâ ti ala, nengo mbi ni ayeke na ndo wa? Tongana mbi yeke Makonzi ti ala, kpengo mbeto ti mbi ni ayeke na ndo wa? Ti ala awayango-sandaga, ala yeke baa mbi tongana mbumbuse zo. Ala hunda mbi, atene: ‘E baa mo tongana mbumbuse zo tongana nyen?’

⁷Ala mu kobe so ayeke *sioni, ala zia na ndö ti gbalaka ti mbi. Ala hunda mbi, atene: ‘Nyen laa e sara si abuba nengo ti mo?’ Na lege so ala tene: ‘Meza ti KOTA GBIA ayeke senge ye.’

⁸So ala mu nyama so le ti lo abuba, aga na lo ti mu na *sandaga so, sioni laa ala sara so pepe? So ala mu nyama so gere ti lo abuba, wala lo yeke na kobela, aga na lo so, sioni laa ala sara so pepe? Tongana ala gue na mara ti anyama tongaso na govoronere ti ala, fade be ti lo ayeke nzere na ala? Lo yeke yamba ala nzoni? Tënë so KOTA GBIA so ayeke na ndö ti dunia kue atene laa.

⁹Fadeso, ala tara ti voro tere ti ala na mbi, Nzapa titene mbi baa mawa ti ala! Na peko ti ye so ala sara so, fade mbi yeke kiri ti yamba ala na nzoni be? Tënë so KOTA GBIA so ayeke na ndö ti dunia kue atene laa.

¹⁰Tongana mbeni zo na popo ti ala alondo fade akanga ayanga ti kota da ti mbi titene ala ngba ti tingo wâ na ndö ti gbalaka ti mbi senge senge pepe, ka ayeke nzoni mingi! Biani, be ti mbi anzere na ala pepe. Tënë so KOTA GBIA so ayeke na ndö ti dunia kue atene laa. Aye ti ala so ala yeke ga na ni na mbi na sandaga so, anzere na be ti mbi pepe.

¹¹Biani, ti londo na To ngbii asi na Do, amara nde ahinga so mbi yeke kota. Na ndo kue, azo ayeke zö dukani na mbi, ala yeke ga na asandaga so ayeke *nzoni. Biani, amara nde ahinga so mbi yeke kota. Tënë so KOTA GBIA so ayeke na ndö ti dunia kue atene laa.

¹²Me ala, awayango-sandaga, ala baa iri ti mbi tongana senge ye si ala tene: ‘Meza ti KOTA GBIA aga *sioni awe. Kobe so ayeke na ndö ni so akpa pepe.’

¹³Ala yeke tene nga, atene: ‘Ae! So pasi ti nyen?’ Ala ne mbi pepe. Tënë so KOTA GBIA so ayeke na ndö ti dunia kue atene laa. Ala mu nyama so ala nzi nzingo, wala nyama so gere ti lo abuba, wala nyama so ayeke na kobela si ala mu na mbi na sandaga. Mara ti anyama tongaso laa alingbi ti nzere na be ti mbi? Tënë so KOTA GBIA atene laa.

¹⁴Deba aga na ndö ti zo ti mayere so lo yeke na nzoni koli-nyama na popo ti anyama ti lo! Lo mu fade yanga ti mu nzoni nyama ni na mbi na sandaga, me na pekoni, lo mu gi nyama so mbeni mbage ti tere ti lo abuba awe. Biani, mbi yeke kota gbia so amara nde ayeke kpe mbeto ti mbi. Tënë so KOTA GBIA so ayeke na ndö ti dunia kue atene laa.”