Read sango Matthieu 1 Bible Online

Matthieu 1 - sango bible

Matthieu 1

¹So ayeke mbeti ti iri ti akotara ti Jésus Christ, lo so lo yeke *hale ti David; David ayeke hale ti Abraham.

²Abraham adu Isaac; Isaac adu Jacob; Jacob adu Juda, lo na a-ita ti lo.

³Juda adu Peres na Zera — mama ti ala ayeke Tamar. Peres adu Hesron; Hesron adu Ram;

⁴Ram adu Aminadab; Aminadab adu Nashon; Nashon adu Salman.

⁵Salman adu Booz — mama ti Booz ayeke Rahab; Booz adu Obed — mama ti Obed ayeke Ruth;

⁶Obed adu Yese, Yese adu gbia David. David na wali ti Urii adu Salomon;

⁷Salomon adu Roboam; Roboam adu Abia; Abia adu Asaf;

⁸Asaf adu Yosafat; Yosafat adu Yoram; Yoram adu Ozias;

⁹Ozias adu Yotam; Yotam adu Akaz; Akaz adu Ezekias;

¹⁰Ezekias adu Manase; Manase adu Amon; Amon adu Yosias;

¹¹Yosias adu Yekonia na a-ita ti lo na ngoi so a gbu azo ti Israel, a gue na ala na sese ti Babilone.

¹²Na peko ti so a gbu azo ti Israel si a gue na ala na sese ti Babilone, Yekonia adu Shealtiel; Shealtiel adu Zorobabel;

¹³Zorobabel adu Abihud; Abihud adu Eliakim; Eliakim adu Azor;

¹⁴Azor adu Sadok; Sadok adu Akim; Akim adu Eliud;

¹⁵Eliud adu Eleazar; Eleazar adu Matan; Matan adu Jacob;

¹⁶Jacob adu Joseph, koli ti Marie, mama ti Jésus, lo so a iri lo *Mesii.

¹⁷Ti londo na Abraham ngbii asi na David, na lege ti molongo ti dungo ni, azo ayeke baleoko na osio. Ti londo na David ngbii asi na ngoi so a gbu amolenge ti Israel si ague na ala na sese ti Babilone, na lege ti molongo ti dungo ni, azo ayeke baleoko na osio. Ti londo na ngoi so a gbu ala ti gue na ala na kodro wande ngbii asi na Mesii, na lege ti molongo ti dungo ni, azo ayeke baleoko na osio.

¹⁸Lege ti dungo Jésus Christ ayeke tongaso. Mama ti lo Marie ayeke wali so Joseph aye ti mu lo; me kozo titene ala mu tere, Marie amu ngo na lege ti Yingo-Vuru.

¹⁹Joseph, koli ti lo ayeke zo ti mbirimbiri, lo ye ti sigigi na tënë ni pepe na le ti azo kue ti zia kamene na le ti wali ti lo. Tongaso, lo gi lege ti kangbi na wali ni na hondengo ni.

²⁰Na ndembe so lo ngba ti gbu li ti lo, mbeni *ange ti *Kota Gbia asi na lo na ya ti bango-li si atene na lo: “Joseph, molenge ti David, mo sara mbeto ti mu wali ti mo Marie pepe, ngbanga ti so molenge so ayeke na ya ti lo aga na lege ti Yingo-Vuru.

²¹Lo yeke du ande molenge-koli so fade mo yeke di iri ti lo Jésus, ngbanga ti so lo laa lo yeke soo azo ti lo na ya ti asiokpari ti ala.”

²²Ye ni kue asi alingbi na tënë so Kota Gbia atene ando na yanga ti wayanga-Nzapa, atene:

²³“Baa, fade maseka-wali so ade ti hinga koli pepe ayeke mu ngo, lo yeke du molenge-koli; fade a yeke di iri ti lo Emmanuel.” — Nda ti iri so atene: “Nzapa ayeke na e”. —

²⁴So Joseph azingo na lango, lo sara ye so ange ti Kota Gbia atene na lo; lo mu wali ti lo Marie na da ti lo.

²⁵Me Joseph na Marie aduti koli na wali pepe ngbii asi na ngoi so Marie adu molenge ti lo. Joseph adi iri ti lo Jésus.