Read sango Matthieu 10 Bible Online

Matthieu 10 - sango bible

Matthieu 10

¹Na pekoni, Jésus airi adisiple ti lo baleoko na use si lo mu na ala ngangu ti tumba asioni yingo, ti kai kobela na tere ti azo, ti sara nga si azo so mbage ti tere ti ala abuba, akiri aga nzoni.

²Iri ti *awatokua baleoko na use so ayeke tongaso: kozo zo ni ayeke Simon, so mbeni iri ti lo ayeke Pierre, lo na ita ti lo André; Jacques na ita ti lo Jean, so ala yeke amolenge ti Zebede;

³Philippe na Barthélemy; Thomas na Matthieu so lo yeke zo ti rongo nginza ti lapo; Jacques, molenge ti Alfe na Tade;

⁴Simon, zo so ayeke tiri ndali ti lipandaa ti kodro na Judas Iskariote so ayeke ka ande Jésus.

⁵Jésus atokua adisiple baleoko na use so, lo mu na ala yanga, lo tene: “Ala gue na sese ti amara nde pepe, ala li nga na ya ti mbeni gbata ti azo ti Samarii pepe.

⁶Me ala gue na mbage ti azo ti Israel so ayeke tongana ataba so agirisa.

⁷Na guengo ni, ala fa Nzoni Tënë na azo, atene: ‘*Kodro-gbia ti yayu aga nduru awe!’

⁸Ala kai kobela na tere ti azo, ala zingo akuâ, ala sara si tere ti azo ti buruma aga nzoni, ala tumba asioni yingo. Nzapa amu ye na ala senge senge, ala mu nga ye na azo senge senge.

⁹Ala mu lôro, wala wen ti nginza wala bengba wen ti zia na ya ti bozo ti ala pepe;

¹⁰ala mu bozo ti lege pepe, ala mu bongo use pepe, ala mu poro ti gere wala keke ti tambulango na ni pepe, ngbanga ti so zo ti kua alingbi ti wara kobe ti yanga ti lo.

¹¹“Tongana ala si na ya ti mbeni gbata wala kete kodro, ala gue, agi mbeni zo so azo ayeke ne lo. Ala ngba na ndo ti lo ngbii asi na ngoi so ala londo ti hon.

¹²Tongana ala li na ya ti mbeni da, ala bara azo ni.

¹³Tongana azo ti da ni ayamba ala, ayeke nzoni siriri so ala ga na ni aduti na azo ni; me tongana azo ni ayamba ala pepe, siriri so ala ga na ni, akiri na ala wani.

¹⁴Tongana ala si na ya ti mbeni da, wala na ya ti mbeni gbata si azo ni ake ti yamba ala, wala azo ni ake ti ma tënë ti ala, ayeke nzoni ala zia ndo ni so ahon. Na hongo ti ala, ala pika sese ti gbe ti gere ti ala.

¹⁵Mbi tene na ala taa-tënë: na lango ti fango ngbanga, fade ngbanga so a yeke fâ na li ti azo ti gbata so ayeke ngangu mingi ahon ti azo ti akodro ti Sodome na Gomore.”

¹⁶“Ala baa, mbi yeke tokua ala tongana ataba na popo ti ambo ti ngonda. Ayeke nzoni le ti ala akpengba tongana ti angbo si ala duti tongana *ambipa so ayeke sara ngangu na zo pepe.

¹⁷Ala sara hange, ngbanga ti so fade azo ayeke gue na ala na gbe ti awafango-ngbanga. Fade azo ni ayeke pika ala na fimbo na ya ti ada ti sambelango Nzapa.

¹⁸Fade azo ni ayeke mu ala ti gue na ala na gbe ti akomanda na agbia ndali ti mbi si ala, adisiple ti mbi, ala yeke tene ye so ala hinga na ndö ti mbi na azo ni nga na azo ti amara nde.

¹⁹Tongana azo ni ague na ala na ngbanga, ala gi be ti ala na ndö ti tënë so ala yeke tene ande, wala na lege ti tenengo tënë ni pepe. Na ndembe ni ande, fade ala yeke hinga tënë ti tenengo ni.

²⁰Ala yeke tene ande tënë ti ala wani pepe; me fade Yingo ti Nzapa Babâ ti ala laa ayeke zia tënë ni na yanga ti ala ti tene.

²¹Fade azo ayeke mu a-ita ti ala titene azo afâ ala; babâ ayeke mu nga molenge ti lo titene azo afâ lo; amolenge ayeke ga wato ti babâ na mama ti ala ti mu ala titene azo afâ ala.

²²Fade azo kue ayeke ke ala ndali ti mbi. Me zo so ayeke gbu ngangu ngbii asi na ndani, fade lo yeke soo kuâ.

²³Tongana azo asara ngangu na ala na ya ti mbeni gbata, ayeke nzoni ala kpe ague na ya ti mbeni gbata nde. Mbi tene na ala taa-tënë: kozo titene *Molenge ti Zo akiri, fade ala yeke hunzi kua ti ala na ya ti agbata ti Israel kue pepe.

²⁴“Disiple ahon zo so ayeke fa ye na lo pepe; zo ti kua ahon nga makonzi ti lo pepe.

²⁵Ayeke nzoni disiple aga tongana wafango-ye na lo si zo ti kua aga nga tongana makonzi ti lo. Tongana azo airi wa ti da Beelzebul, fade ala yeke di sioni iri mingi na li ti azo ti da ti lo.

²⁶“Ala sara mbeto ti zo pepe! Ye so kue angba na hondengo ni, fade nda ni ayeke sigigi; ye so kue angba na gbe mingo, fade azo ayeke hinga tënë ni.

²⁷Tënë so mbi yeke tene na ala na ya ti vukongo ndo, ala tene tënë ni na kota lâ; tënë so a tene gi na ya ti mê ti ala, ala dekongo na ni na ndö ti da.

²⁸Azo so ayeke fâ tere ti zo, ala sara mbeto ti ala pepe; azo ni alingbi ti fâ yingo ti zo pepe. Me ayeke nzoni ala kpe mbeto ti Nzapa so alingbi ti sara si tere ti zo na yingo ti lo kue abuba na ndo so wâ ayeke gbi daa lakue.

²⁹Azo ayeke ka akete ndeke use ndali ti kete le ti nginza oko pepe? Tongana Nzapa Babâ ti ala ayeda pepe, mbeni ndeke oko alingbi ti ti na sese pepe.

³⁰Ti ala, Nzapa adiko kua ti li ti ala kue awe.

³¹Tongaso, ala sara mbeto pepe: ala hon akete ndeke so mingi!”

³²“Zo so kue atene na le ti azo atene, ni yeke zo ti mbi, fade mbi nga, mbi yeke tene na le ti Babâ ti mbi so ayeke na yayu, mbi tene, lo yeke zo ti mbi.

³³Me zo so abere tënë ti mbi na le ti azo, fade mbi nga, mbi yeke bere tënë ti lo na le ti Babâ ti mbi so ayeke na yayu.”

³⁴“Ala baa ti ala pepe atene, mbi ga ti zia siriri na ndö ti sese so: mbi ga ti zia siriri pepe, me mbi ga na bira.

³⁵Mbi ga ti kangbi popo ti molenge-koli na babâ ti lo, popo ti molenge-wali na mama ti lo, popo ti wali na mama ti koli ti lo.

³⁶Fade azo ti da ti zo laa ayeke ga awato ti lo.

³⁷Zo so aye babâ wala mama ti lo ahon mbi, lo lingbi ti duti disiple ti mbi pepe; zo so aye molenge ti lo ti koli wala ti wali ahon mbi, lo lingbi ti duti disiple ti mbi pepe.

³⁸Zo so ayo keke ti kroa ti lo pepe si lo tambula na peko ti mbi pepe, lo lingbi ti duti disiple ti mbi pepe.

³⁹Zo so aye ti bata fini ti lo, fade lo yeke girisa ni; me zo so agirisa fini ti lo ndali ti mbi, fade lo yeke kiri ti wara ni.”

⁴⁰“Zo so ayamba ala, andaa lo yamba mbi; zo so ayamba mbi, andaa lo yamba lo so atokua mbi

⁴¹Zo so ayamba wayanga-Nzapa ndali ti so lo yeke wayanga-Nzapa, fade lo yeke wara nzoni ye so wayanga-Nzapa ayeke wara; zo so ayamba zo ti mbirimbiri ndali ti so lo yeke mbirimbiri, fade lo yeke wara nzoni ye so zo ti mbirimbiri ayeke wara.

⁴²Mbi tene na ala taa-tënë: zo so amu ngu ti nyongo ni na mbeni senge zo oko so ndali ti so lo yeke disiple ti mbi, ataa ayeke kete kopo ti ngu ti de, fade lo yeke wara nzoni ye na peko ni.”