Read sango Matthieu 11 Bible Online

Matthieu 11 - sango bible

Matthieu 11

¹So Jésus ahunzi ti mu yanga na adisiple ti lo baleoko na use awe, lo londo si lo gue ti fa ye na azo, ti fa nga Nzoni Tënë na ya ti agbata ti ala.

²Andaa Jean-Baptiste angba na da ti kanga, lo ma tënë ti aye so Christ asara. Tongaso lo tokua ambeni disiple ti lo

³ti hunda Jésus, atene: “Mo yeke *Mesii so ayeke ga ande so? Wala e ku mbeni zo nde?”

⁴Jésus akiri tënë na ala: “Ala gue, atene na Jean tënë ti aye so ala yeke ma na aye so ala yeke baa:

⁵awaziba akiri abaa ndo, azo so gere ti ala abuba akiri atambula nzoni, tere ti azo ti buruma aga nzoni, azo so mê ti ala akanga akiri ama ndo, azo azingo na kuâ, a fa Nzoni Tënë na azo ti mawa.

⁶Ti lo nzoni, zo so azia lege ti mabe ti lo pepe ndali ti mbi!”

⁷So adisiple ti Jean amu lege ti kiri, Jésus atene tënë ti Jean na gba ti azo so ayeke na tere ti lo so, atene: “Nyen laa ala gue ti bango ni kâ na ya ti benyama so? Mbeni sosongo so pupu ayeke yingi ni?

⁸Nyen laa ala gue ti bango ni kâ? Mbeni zo so ayu pendere bongo? Azo so ayu apendere bongo ayeke duti na ya ti ada ti agbia!

⁹Nyen laa ala gue ti bango ni kâ? Mbeni wayanga-Nzapa? Mbi tene na ala taa-tënë: zo so ala gue ti baa lo so ayeke kota ahon wayanga-Nzapa!

¹⁰Lo laa a su tënë ti lo na Mbeti ti Nzapa, atene: ‘Baa, mbi tokua zo ti kua ti mbi kozo ti mo, fade lo yeke leke lege na dawa ti mo.’

¹¹Mbi tene na ala taa-tënë: na popo ti azo so kue awali adu ala, mbeni oko so ayeke kota ahon Jean-Baptiste ayeke daa pepe. Me ndangba zo ti ya ti *Kodro-gbia ti yayu ayeke kota ahon lo.

¹²Ti londo na ndembe so Jean-Baptiste ato nda ti fango tënë ti Nzapa ngbii asi laso, azo atiri bira ti mu Kodro-gbia ti yayu; azo ti ngangu laa agi lege ti mu ni.

¹³Awayanga-Nzapa kue na *Ndia ti Moïse atene peko ti tënë ti Nzapa na ndö ti Kodro-gbia ti yayu ngbii asi na ngoi ti Jean.

¹⁴Tongana ala ye ti ma tënë ti mbi, mbi tene na ala: Jean laa ayeke biani Élie so a tene ando tënë ti gango ti lo so.

¹⁵Zo so ayeke na mê ti mango ndo, ayeke nzoni lo ma tënë so!

¹⁶“Fade mbi yeke haka azo ti fadeso na azo wa? Ala yeke tongana amolenge so aduti na le ti kodro si ambeni ayeke iri amba ti ala, atene:

¹⁷‘E huru *ngoli titene ala dodo, me ala dodo pepe! E he na ala bia ti totongo kuâ, me ala toto pepe!’

¹⁸Jean aga, lo yeke te kobe pepe, lo yeke nyon nga ye pepe, me azo atene: ‘Sioni yingo ayeke na ya ti lo!’

¹⁹*Molenge ti Zo aga, lo yeke te, lo yeke nyon, me azo atene: ‘Ala baa, koli so ayeke gbongo ti kobe si lo yeke nyon samba mingi! Lo ye tënë ti azo ti rongo nginza ti lapo na ti azo ti siokpari!’ Me ndara so alondo na Nzapa, zo ayeke hinga atene, ayeke mbirimbiri ndara gi na lege ti ye so ndara ni asara.”

²⁰Na pekoni, Jésus ato nda ti suku na azo ti agbata so lo sara aye ti kpene mingi daa so. Biani, azo ti agbata ni azia ngbene lege ti sarango ye ti ala pepe.

²¹Lo tene na ala: “Mawa na mo, gbata ti Korazen! Mawa na mo, gbata ti Betsaida! Biani, tongana aye ti kpene so asi na ndo ti ala so asi ando na sese ti Tir na ti Sidon, ka azo ni ayu bongo ti mua, ala tuku mburu ti wâ na li ti ala aninga awe ti fa atene, ala zia ngbene lege ti sarango ye ti ala awe!

²²Ndani laa, mbi tene na ala: na lango ti fango ngbanga, fade a yeke fâ ngbanga ngangu na li ti ala ahon ti Tir na ti Sidon.

²³Ti mo gbata ti Kapernaum, mo baa ti mo, mo tene, fade mo yeke gue ngbii ti kpo le ti nduzu? Fade mo yeke kiri ngbii ti si na ndo ti akuâ! Tongana aye ti kpene so asi na ndo ti mo so asi ando na Sodome, ka gbata ni angba ngbii asi laso!

²⁴Ndani laa, mbi tene na ala: na lango ti fango ngbanga, fade a yeke fâ ngbanga ngangu na li ti ala ahon ti Sodome.”

²⁵Na ndembe ni so, Jésus akiri atene: “Mbi gonda mo Babâ, mo so mo yeke *Kota Gbia ti yayu na ti sese, ndali ti so mo honde ye so na azo ti ndara nga na azo ti hingango ye si mo sigigi na nda ni na akete molenge.

²⁶Biani Babâ, ye ni ayeke tongaso, ngbanga ti so mo yeda.

²⁷“Babâ ti mbi azia ye kue na maboko ti mbi. Zo oko ahinga Molenge ni pepe, gi Babâ oko; zo oko ahinga Babâ ni pepe, gi Molenge ni oko nga na azo so Molenge ni aye ti fa Babâ ni na ala titene ala hinga lo.

²⁸“Ala ga na mbi, ala so kue awoko na yongo anengo kungba, fade mbi yeke mu na ala lege ti wu tere ti ala.

²⁹Ala yeda ti yo *zuge ti mbi, ala manda ye so mbi fa na ala, ngbanga ti so mbi yeke zo so mbi yeke sara ngangu na zo pepe si mbi yeke gi kota ndo pepe. Fade ala yeke wara lege ti wu tere ti ala.

³⁰Biani, zuge ti mbi ayapu ti yongo ni, kungba ti mbi ane pepe.”