Read sango Matthieu 19 Bible Online

Matthieu 19 - sango bible

Matthieu 19

¹So Jésus ahunzi tënë so awe, lo zia sese ti Galile si lo gue na sese ti Judée, na mbage ti ngu ti Jourdain.

²Gba ti azo amu peko ti lo si lo kai kobela na tere ti ala.

³Ambeni *farizien aga nduru na tere ti lo ti sara si lo ti na ya ti gbanda ti ala. Ala hunda lo, atene: “*Ndia ti e amu lege na koli ti tumba wali ti lo ndali ti atënë nde nde kue?”

⁴Jésus akiri tënë na ala: “Ala diko tënë so Mbeti ti Nzapa atene so pepe? Na tongo nda ni, Nzapa so asara ye kue, lo sara koli na wali;

⁵lo tene: ‘Ndani laa, fade koli ayeke londo na gbe ti babâ na mama ti lo ti bongbi oko na wali ti lo si ala use kue ayeke ga gi tere oko.’

⁶Tongaso, ala yeke azo use mbeni pepe, me ala ga gi tere oko. Ye so Nzapa abongbi awe, alingbi zo akangbi ni pepe.”

⁷Afarizien ahunda lo, atene: “Ngbanga ti nyen si Moïse amu yanga na koli ti mu mbeti ti kangbingo tere na wali ti lo si lo tumba lo?”

⁸Jésus akiri tënë na ala: “Ala yeke azo ti kpengbango be, nilaa Moïse amu lege na ala titene ala tumba awali ti ala. Me na tongo nda ni, ye ni ayeke ando tongaso pepe.

⁹Mbi tene na ala: tongana mbeni zo atumba wali ti lo, ataa so wali ni agi mbeni koli nde pepe si lo mu mbeni wali nde, andaa lo gi wali ti mbeni zo awe.”

¹⁰Adisiple ti lo atene na lo: “Tongana ye ni ayeke tongaso, ayeke nzoni titene koli na wali amu tere pepe.”

¹¹Jésus akiri tënë na ala: “Tënë so mbi fa na ala so, azo kue laa alingbi ti hinga nda ni pepe, me gi azo so Nzapa amu lege na ala ti hinga ni.

¹²Aye so asara si ambeni koli amu wali pepe ayeke nde nde: ambeni amu wali pepe, ngbanga ti so a du ala gi tongaso; ambeni amu wali pepe, ngbanga ti so azo asara si ala ga *ambaiwa; ambeni ake ti mu awali ndali ti *Kodro-gbia ti yayu. Zo so alingbi ti ma ya ti tënë so, ayeke nzoni lo ma ni!”

¹³Azo amu akete molenge aga na ala na Jésus titene lo zia maboko ti lo na ndö ti ala na ti sambela ndali ti ala, me adisiple asuku ngangu na azo ni.

¹⁴Tongaso Jésus atene na ala: “Ala zia akete molenge aga na mbi, ala kanga lege na ala pepe, ngbanga ti so *Kodro-gbia ti yayu ayeke ndali ti azo so ayeke tongana amolenge so.”

¹⁵So lo zia maboko ti lo na ndö ti ala awe, lo londo na ndo so, lo hon.

¹⁶Mbeni koli aga nduru na tere ti Jésus si ahunda lo, atene: “Wafango-ye, nzoni ye ti nyen laa mbi lingbi ti sara titene mbi wara fini so angba lakue lakue?”

¹⁷Jésus atene na lo: “Ngbanga ti nyen si mo hunda mbi na ndö ti ye so ayeke nzoni? Gi Nzapa oko laa ayeke nzoni. Tongana mo ye ti li na ndo so azo ayeke duti na fini daa, ayeke nzoni mo sara ye alingbi na andia ti Nzapa.”

¹⁸Koli ni ahunda Jésus, atene: “Andia wa?” Jésus akiri tënë na lo: “Alingbi mo fâ zo pepe; alingbi mo gi wali wala koli ti zo pepe; alingbi mo nzi pepe; alingbi mo tene mvene na le ti ngbanga pepe;

¹⁹alingbi mo ne babâ ti mo na mama ti mo; alingbi mo ye nga mba ti mo zo tongana ti so mo ye tere ti mo wani.”

²⁰Maseka-koli ni atene na lo: “Mbi sara aye so kue awe. Nyen laa angba titene mbi sara ni?”

²¹Jésus atene na lo: “Tongana mo ye ti ga nzoni kue, mo gue, mo ka ye so kue mo yeke na ni, mo mu nginza ni na awayere si fade mo yeke wara mosoro na yayu. Na pekoni, mo ga, mo mu peko ti mbi.”

²²So maseka-koli ni ama tënë so, lo gue na vundu na be ti lo, ngbanga ti so lo yeke na mosoro mingi.

²³Jésus atene na adisiple ti lo: “Mbi tene na ala taa-tënë: ayeke ngangu na zo ti mosoro ti li na ya ti *Kodro-gbia ti yayu.

²⁴Mbi kiri mbi tene na ala: lingo ti zo ti mosoro na ya ti Kodro-gbia ti Nzapa ayeke ngangu ahon lingo ti *zambala na ya ti du ti sua!”

²⁵So adisiple ama tënë so, li ti ala kue akpe si ala tene: “So ye ni ayeke tongaso so, zo wa laa alingbi ti soo kuâ, zo wa?”

²⁶Jésus abaa ala si lo tene na ala: “Ye ni ahon ngangu ti zo, me Nzapa alingbi ti sara ye kue.”

²⁷Tongaso Pierre amu tënë si lo tene: “Baa, e zia aye ti e kue si e mu peko ti mo! Ti e, ye ni ayeke ga ande tongana nyen?”

²⁸Jésus atene na ala: “Mbi tene na ala taa-tënë: na ndembe so ye kue ayeke kiri ti ga fini ni, fade *Molenge ti Zo ayeke duti na ndö ti mbata ti gonda ti lo ti Gbia. Ala baleoko na use so amu peko ti mbi, ala yeke duti na ndö ti ambata ti gbia baleoko na use titene ala fâ ngbanga ti amara baleoko na use ti Israel.

²⁹Zo so kue azia ada ti lo, a-ita ti lo ti koli, a-ita ti lo ti wali, babâ ti lo, mama ti lo, amolenge ti lo na ayaka ti lo ndali ti mbi, fade lo yeke wara aye so fani ngbangbo oko ahon aye so lo zia si lo yeke wara fini so angba lakue lakue.

³⁰Mingi ti azo ti li ni ayeke ga ande azo ti ndani; mingi ti azo ti ndani ayeke ga azo ti li ni.”