Read sango Matthieu 21 Bible Online

Matthieu 21 - sango bible

Matthieu 21

¹So ala ga nduru na Jérusalem, ala si nduru na kete kodro ti Betfaze, na tere ti hoto ti a-olive, Jésus atokua adisiple use;

²lo tene na ala: “Ala gue na kete kodro so ayeke na dawa ti ala so. Kâ, ala yeke wara hio tongaso mbeni mama ti lele so a kanga lo na tere ti mbeni ye si molenge ti lo ayeke na tere ti lo. Ala zi ala, aga na ala na mbi.

³Tongana mbeni zo atene tënë na ala, fade ala kiri tënë, atene: ‘*Kota Gbia aye alele ni.’ Gi hio tongaso, fade zo ni ayeke zia lege na alele ni ti gue.”

⁴Ye ni asi tongaso titene tënë so wayanga-Nzapa atene, aga taa-tënë; lo tene:

⁵“Ala tene na gbata ti *Sion, atene: Baa, gbia ti mo ayeke ga na mo, lo sara tere ti lo tongana senge zo. Lo duti na ndö ti mama ti lele nga na ndö ti molenge ti lele so ayeke nyama ti sarango na kua.”

⁶Adisiple ague si ala sara ye so lo mu yanga na ala ti sarango ni.

⁷Ala mu mama ti lele ni na molenge ti lo aga na ala. Ala zia bongo ti ala na ndö ti alele ni si Jésus aduti na ndö ni.

⁸Azo so abongbi si ayeke gbani gbani so agbara abongo ti ala na ndö ti lege; ambeni afâ amaboko ti akeke si azia ni na ndö ti lege.

⁹Azo so ayeke tambula na dawa ti Jésus na ala so ayeke tambula na peko ti lo ayeke dekongo, atene: “E gonda Molenge ti David! Ayeke nzoni Nzapa asara tufa na ndö ti lo so aga na iri ti Kota Gbia! E gonda Nzapa so ayeke na yayu kâ na ndö ti aye kue!”

¹⁰So Jésus ali na Jérusalem awe, gbata ni kue ayingi. Azo ahunda ndo, atene: “So zo wa laa?”

¹¹Gba ti azo ni akiri tënë, atene: “So Jésus laa, wayanga-Nzapa so alondo na Nazaret, na sese ti Galile.”

¹²Jésus ali na ya ti kota da ti Nzapa si lo tumba azo ti kango ye na azo ti vongo ye so ayeke na ya ni; lo kinda na sese ameza ti azo ti sanzengo nginza na angende ti azo ti kango *ambipa.

¹³Lo tene na ala: “A su na ya ti Mbeti ti Nzapa, atene: ‘Fade a yeke iri da ti mbi da ti sambelango Nzapa.’ Me ti ala, ala sara si da ni aga du so azo ti nzi ayeke honde tere ti ala daa!”

¹⁴Awaziba na azo so gere ti ala abuba aga nduru na Jésus na ya ti kota da ti Nzapa ni si lo kai kobela ti ala.

¹⁵So akota wayango-sandaga na awafango-ndia abaa aye ti kpene so Jésus asara si ala baa nga amolenge so ayeke dekongo na ya ti kota da ti Nzapa, atene: “E gonda Molenge ti David”, be ti ala aso.

¹⁶Ala tene na Jésus: “Mo ma tënë so ala yeke tene so?” Jésus akiri tënë na ala: “Mbi ma ni. Ala de ti diko tënë so Mbeti ti Nzapa atene so pepe? Mbeti ti Nzapa atene: ‘Mo sara si abia ti gondango mo asigigi na yanga ti akete molenge nga na yanga ti ala so angba ti nyon me.’”

¹⁷Na pekoni, Jésus azia ala na ndo so, lo sigigi na ya ti gbata ni, lo gue na Betanii, lo lango kâ.

¹⁸So Jésus alondo na ndaperere si lo kiri na ya ti gbata ni, nzara asara lo.

¹⁹Lo baa mbeni keke ti fige na tere ti lege si lo gue nduru na ni, me lo wara gi akugbe ni. Lo tene na keke ni: “Mo yeke kiri ti le oko pepe!” Gi hio tongaso, keke ti fige ni ahole.

²⁰So adisiple abaa ye so asi so, li ti ala kue akpe. Ala hunda Jésus, atene: “Asara tongana nyen si keke ti fige so ahole gi hio tongaso?”

²¹Jésus akiri tënë na ala: “Mbi tene na ala taa-tënë: tongana ala yeke na mabe si ala dekite pepe, fade ala yeke sara ye so mbi sara na keke ti fige so. Ala lingbi nga ti tene na hoto so: ‘Londo na ndo so, mo ti na ya ti kota ngu-ingo’, fade ye ni ayeke si alingbi na ni.

²²Ye so kue ala yeke hunda na mabe na lege ti sambela, fade ala yeke wara ni.”

²³Jésus ali na ya ti kota da ti Nzapa si lo yeke fa ye. Tongaso, akota wayango-sandaga na *akangba ti azuife aga nduru na tere ti lo si ala hunda lo, atene: “Na iri ti zo wa laa mo yeke sara aye so? Zo wa laa amu lege na mo ti sara ni, zo wa?”

²⁴Jésus akiri tënë na ala: “Mbi nga, mbi yeke hunda ala na mbeni tënë, gi tënë oko. Tongana ala kiri peko ni na mbi, fade mbi yeke di na ala iri ti zo so amu lege na mbi ti sara aye so.

²⁵Zo wa laa atokua Jean ti batize azo? Nzapa wala azo?” Azo ni atene na popo ti ala: “Tongana e tene: ‘Nzapa laa atokua Jean’, fade lo hunda e, lo tene: ‘Ngbanga ti nyen si ala yeda na tënë ti lo pepe?’

²⁶Me tongana e tene: ‘Azo laa atokua lo’, e lingbi ti sara mbeto ti gba ti azo ni, ngbanga ti so ala kue ahinga atene, Jean ayeke wayanga-Nzapa.”

²⁷Tongaso ala kiri tënë na Jésus, atene: “E hinga pepe.” Nilaa lo nga, lo tene na ala: “Zo so amu lege na mbi ti sara aye so, mbi nga, mbi yeke di iri ti lo na ala pepe.”

²⁸Jésus akiri atene: “Ala baa tënë so tongana nyen? Mbeni koli ayeke na amolenge-koli use. Lo tene na kozo molenge ni: ‘Molenge ti mbi, laso, mo gue, mo sara kua na yaka ti *vinye ti mbi.’

²⁹Lo kiri tënë na babâ ti lo, lo tene: ‘Mbi ye pepe’; me na pekoni, be ti lo aso ndali ti tënë so lo tene so si lo gue na yaka ni.

³⁰Na pekoni, babâ ni ague na tere ti use molenge ni si atene na lo gi oko tënë so. Use molenge ni atene na lo: ‘Babâ, mbi yeke gue’; me lo gue na yaka ni pepe.”

³¹Jésus ahunda ala: “Zo wa na popo ti amolenge use so si asara ye so babâ ti lo aye?” Ala kiri tënë na lo: “Ayeke kozo molenge ni.” Jésus atene na ala: “Mbi tene na ala taa-tënë: azo ti rongo nginza ti lapo na awali-ndumba ayeke si ande kozo na ala na ya ti *Kodro-gbia ti Nzapa.

³²Biani, Jean aga ando na mbage ti ala, lo fa na ala lege so ayeke lege ti sarango ye ti mbirimbiri, me ala yeda na tënë ti lo pepe. Me azo ti rongo nginza ti lapo na awali-ndumba ayeda na tënë ti lo. Ti ala, na peko ti ye so kue ala baa, ala ke ti zia sioni lege ti ala, ala yeda na tënë ti lo pepe.”

³³Ala kiri ama mbeni toli ni: “Mbeni wa ti sese afâ yaka ti *vinye. Lo sara gbagba na tere ni kue, lo zi du titene a pete le ti vinye ni daa, lo leke mbeni ndo na nduzu titene zo aluti daa ti baa ndo na tere ti yaka ni. Na pekoni, lo zia yaka ni na maboko ti ambeni zo ti fango yaka ti vinye si lo gue na mbeni kodro nde.

³⁴So ngoi ti fango ale ti vinye ni aga nduru, lo tokua azo ti kua ti lo na azo ti fango yaka ni titene ala mu ti lo ale ti vinye ni aga na ni.

³⁵Me azo ti fango yaka ni agbu azo ti kua ti lo ni, ala pika mbeni oko, ala fâ mbeni si ala bo mbeni na têne.

³⁶Wa ti yaka ni akiri atokua ambeni zo ti kua so wungo ti ala ahon ti ala ti kozoni; me azo ti fango yaka ni asara gi mara ti sioni so na ala.

³⁷Na ndani, koli ni atokua molenge ti lo na ala; lo tene na be ti lo, lo tene: ‘Fade ala yeke kpe mbeto ti molenge ti mbi.’

³⁸Me so azo ti fango yaka ni abaa molenge ni, ala tene na popo ti ala: ‘Baa, lo so lo yeke ga wa ti yaka ni na peko ti babâ ti lo laa! Ala ga, e fâ lo si yaka ti lo aga ti e!’

³⁹Ala gbu lo, ala sigigi na lo na ya ti yaka ni si ala fâ lo.”

⁴⁰Jésus ahunda ala, atene: “Tongana wa ti yaka ni aga ande, fade lo yeke sara nyen na azo ti fango yaka so?”

⁴¹Azo ni akiri tënë na lo, atene: “Lo yeke fâ azo ti sioni so sioni sioni. Na pekoni, lo yeke mu yaka ni na ambeni zo ti kua nde si tongana ndembe ni asi, ala yeke mu na lo ti lo ale ti vinye ni.”

⁴²Na pekoni, Jésus ahunda ala, atene: “Tënë so a su na ya ti Mbeti ti Nzapa so, ala diko ni laoko pepe? Tënë ni atene: ‘Têne so azo ti sarango da ake ni, ni laa akiri aga ngangu têne ti gere ti da ni. Ye so alondo na *Kota Gbia, ye ni ayeke ye ti kpene na le ti e!’”

⁴³Ndani laa, Jésus atene: “Mbi tene na ala: fade a yeke zi *Kodro-gbia ti Nzapa na maboko ti ala ti mu na azo so asara ye alingbi na ni. [

⁴⁴Zo so kue ayeke ti na ndö ti têne so, fade tere ti lo ayeke kungbi. Tongana têne ni ati na ndö ti mbeni zo, fade ayeke nika lo nikango!”]

⁴⁵So akota wayango-sandaga na *afarizien ama atoli so, ala hinga atene, lo tene tënë so na ndö ti ala.

⁴⁶Ala gi lege ti gbu lo, me mbeto ti gba ti azo so asara ala, ngbanga ti so azo ni abaa Jésus tongana wayanga-Nzapa.