Read sango Matthieu 22 Bible Online

Matthieu 22 - sango bible

Matthieu 22

¹Jésus akiri atene tënë na ala na lege ti toli, lo tene:

²“Tënë ti *Kodro-gbia ti yayu ayeke tongana tënë ti mbeni gbia so aleke matanga ndali ti mungo wali so molenge ti lo aye ti mu.

³Lo tokua azo ti kua ti lo ti iri azo so lo tisa ala na matanga ni, me azo ni aye ti ga pepe.

⁴Lo kiri lo tokua ambeni zo ti kua ti tene na azo ni, atene: ‘Mbi leke aye ti matanga ni awe, mbi fâ abagara ti mafuta, mbi leke ye kue awe. Ala ga na matanga ni fadeso!’

⁵Me azo ni abaa tënë ti lo ni tongana senge tënë si ala gue na ando ti ala nde nde: mbeni ague na yaka ti lo, mbeni ague ti de buze ti lo.

⁶Ambeni agbu azo ti kua ti gbia ni, apika ala si afâ ala.

⁷Ngonzo agbu gbia ni si lo tokua aturugu ti lo, ala gue, afâ azo ti fango zo so si ala gbi gbata ti ala kue.

⁸Na pekoni, lo tene na azo ti kua ti lo: ‘Ndembe ti matanga ti mungo tere ni alingbi awe, me akozo zo ni alingbi fade na matanga ni pepe.

⁹Fadeso, ala gue na ndö ti akota lege, ala tisa azo so kue ala yeke wara ala ti ga na matanga ni.’

¹⁰Azo ti kua ni ague si ala tisa azo so kue ala wara ala, ataa asioni zo, wala anzoni zo, ala bongbi ala kue. Nilaa ya ti da ti matanga ni asi singo na azo.

¹¹Gbia ni ali ti baa azo so a tisa ala si ala ga so; lo baa mbeni koli so ayu bongo ti matanga ni pepe.

¹²Lo hunda koli ni, lo tene: ‘Ita, mo sara tongana nyen laa mo li na ndo so? Bongo ti matanga ti mo ayeke na ndo wa?’ Me koli ni akiri tënë oko pepe.

¹³Tongaso gbia ni atene na azo ti kua ni: ‘Ala kanga gere ti lo na maboko ti lo, ala bi lo na gigi na ya ti vukongo ndo; kâ, gi toto na tengo pembe.’ ”

¹⁴Ti hunzi na ni, Jésus atene: “A iri azo mingi biani, me a soro gi ambeni kete.”

¹⁵Tongaso *Afarizien ague, abongbi tere ti ala ti gi lege titene gi na lege ti tënë ti yanga ti lo wani, Jésus ati na ya ti gbanda ti ala.

¹⁶Ala tokua ambeni disiple ti ala na ambeni zo ti kama poroso ti Herode ti tene na Jésus: “Wafango-ye, e hinga so mo yeke tene gi taa-tënë, mo yeke fa taa-tënë na ndö ti lege ti sarango ye so Nzapa aye; mo yeke sara kamene ti le ti zo pepe, ataa zo ni ayeke na kota ndo.

¹⁷Tene na e, ti be ti mo: *Ndia amu lege na e ti futa lapo na kota gbia ti Rome, wala e futa ni pepe?”

¹⁸Jésus ahinga sioni be ti ala si lo tene na ala: “Ala azo so tënë ti yanga ti ala ayeke nde na sarango ye ti ala so, ngbanga ti nyen ala ye ti sara si mbi ti na ya ti gbanda ti ala?

¹⁹Ala fa na mbi le ti nginza so ala yeke futa na lapo so!” Azo ni aga na mbeni le ti nginza na lo.

²⁰Jésus ahunda ala, atene: “So li ti zo wa laa? So iri ti zo wa laa na le ti nginza so?”

²¹Ala kiri tënë na lo: “Ti kota gbia ti Rome.” Tongaso Jésus atene na ala: “Ala futa na kota gbia ti Rome ye so ayeke ti lo, ala futa na Nzapa ye so ayeke ti Nzapa.”

²²So ala ma kiringo tënë so, li ti ala kue akpe; ala zia lo si ala hon.

²³Gi na lango ni so, *asadusien aga nduru na tere ti Jésus. — Asadusien ayeke azo so atene, akuâ ayeke zingo pepe. — Ala hunda Jésus,

²⁴atene: “Wafango-ye, Moïse atene ando, atene: ‘Tongana mbeni zo akui si lo yeke na amolenge pepe, alingbi ita ti lo amu wali ti wakuâ ni si lo du amolenge na ita ti lo so akui so.’

²⁵Ando na ndo ti e, ambeni ita mbarambara ayeke daa. Kozo ita ni amu wali, lo du molenge pepe si lo kui; lo zia wali ti lo na ita ti lo ti use ni.

²⁶Gi ye so asi na lo so asi na use ita ti lo ni, na lo ti ota ni, ngbii asi na lo ti mbarambara ni.

²⁷Na peko ti ala kue, wali ni nga akui.

²⁸Na lango ti zingongo ti akuâ, fade wali ni ayeke duti wali ti zo wa na popo ti ala mbarambara so? So ala kue amu lo ti ga wali ti ala so!”

²⁹Jésus akiri tënë na ala: “Ala girisa lege awe, ngbanga ti so ala hinga nda ti Mbeti ti Nzapa wala ngangu ti Nzapa pepe.

³⁰Biani, na lango ti zingongo ti akuâ, fade akoli na awali ayeke mu tere pepe, me azo ayeke duti tongana *a-ange na yayu.

³¹Âdu tënë ti zingongo ti akuâ, ala diko tënë so Nzapa atene na ndö ni pepe? Lo tene:

³²‘Mbi laa mbi yeke Nzapa ti Abraham, Nzapa ti Isaac na Nzapa ti Jacob.’ ” Jésus akiri atene: “Nzapa ayeke Nzapa ti akuâ pepe, me lo yeke Nzapa ti azo so ayeke na fini.”

³³So gba ti azo ni ama tënë so, li ti ala kue akpe ndali ti fango ye ti lo.

³⁴So *Afarizien ama a tene, Jésus akanga yanga ti *asadusien awe, afarizien abongbi tere ti ala.

³⁵Na popo ti ala, mbeni wafango-ndia oko aye ti sara si Jésus ati na ya ti gbanda ti lo; lo hunda Jésus, lo tene:

³⁶“Wafango-ye, ndia so ayeke kota ahon atanga ni kue ayeke so wa?”

³⁷Jésus akiri tënë na lo: “Alingbi mo ye *Kota Gbia Nzapa ti mo na be ti mo kue, na yingo ti mo kue, na tënë ti be ti mo kue.

³⁸Ndia so ayeke kota si ahon atanga ni kue laa.

³⁹Use ndia so ayeke nga kota ayeke so: ‘Mo ye mba ti mo zo tongana ti so mo ye tere ti mo wani.’

⁴⁰*Ndia ti Moïse na ambeti ti awayanga-Nzapa kue aluti na ndö ti andia use so.”

⁴¹So *afarizien abongbi tere ti ala, Jésus ahunda ala na mbeni tënë, atene:

⁴²“Ti be ti ala, ala tene nyen na ndö ti *Mesii? Lo yeke molenge ti zo wa?” Ala kiri tënë na lo: “Lo yeke Molenge ti David.”

⁴³Jésus atene na ala: “Tongana nyen si David, so Yingo amu na lo tënë ti tenengo ni alingbi ti iri lo, atene: ‘*Kota Gbia’ so? Biani, David atene:

⁴⁴‘Kota Gbia atene na Kota Gbia ti mbi, atene: Mo duti na mbage ti maboko ti mbi ti koli ngbii mbi sara titene awato ti mo aduti na gbe ti gere ti mo si.’

⁴⁵“So David airi lo ‘Kota Gbia’ so, lo kiri ti duti Molenge ti David ni tongana nyen?”

⁴⁶Zo oko na popo ti ala awara tënë ti tenengo ni na Jésus pepe. Ti londo na lango ni so, zo oko na popo ti ala azi yanga ti hunda lo na mbeni tënë pepe.