Read sango Matthieu 24 Bible Online

Matthieu 24 - sango bible

Matthieu 24

¹So Jésus asigigi na ya ti kota da ti Nzapa si lo yeke hon, adisiple ti lo aga nduru na tere ti lo si ala hunda na lo ti baa lege so azo asara na kota da ti Nzapa so.

²Me Jésus atene na ala: “Ala baa ye so kue so? Mbi tene na ala taa-tënë: fade têne oko ayeke ngba ndo so pepe na ndö ti mba ti lo; ye so kue ayeke tuku na sese.”

³Jésus aduti na li ti hoto ti a-olive, adisiple aga nduru na tere ti lo; so ala yeke gi ala oko, ala hunda lo, atene: “Tene na e, ye ni ayeke si ande lawa? Nyen laa ayeke fa lango ti gango ti mo nga na lango ti ndani?”

⁴Jésus akiri tënë na ala: “Ala sara hange si mbeni zo ahanda ala pepe!

⁵Biani, fade azo mingi ayeke ga na iri ti mbi si zo oko oko ayeke tene: ‘Mbi laa mbi yeke *Mesii!’ Azo ni ayeke handa gba ti azo.

⁶Ala azo ti mbi, fade ala yeke ma tënë ti abira so aga nduru wala tënë ti abira so angba yongoro, ala sara mbeto pepe! Biani, alingbi aye so asi, me so laa ayeke hunzingo ti aye kue pepe.

⁷Fade mbeni mara ayeke londo ti tiri na mbeni mara, mbeni kodro-gbia ayeke londo ti tiri na mbeni kodro-gbia; kota nzara ayeke ga si sese ayeke yingi na ando nde nde.

⁸Fade aye so kue ayeke duti tongana kozo songo ya ti wali so aga nduru ti du.

⁹Tongaso, fade a yeke zia ala na maboko ti ambeni zo titene a sara ngangu na ala; amara kue ayeke ke ala ndali ti mbi.

¹⁰Na ngoi ni so, azo mingi ayeke zia lege ti mabe ti ala; ala yeke ka amba ti ala na popo ti ala si ala yeke ke tere na popo ti ala.

¹¹Fade awayanga-Nzapa mingi ti mvene ayeke londo si ala yeke handa gba ti azo.

¹²Ndali ti sioni so ayeke wu gi wungo, fade ndoye ti azo mingi ayeke kiri na peko.

¹³Me zo so ayeke gbu ngangu ngbii asi na ndani, fade lo yeke soo kuâ.

¹⁴Fade a yeke fa Nzoni Tënë ti *Kodro-gbia na ndö ti dunia kue, tongaso si azo ti amara kue ama ni. Na pekoni, fade ye kue ayeke hunzi.”

¹⁵“Ndani laa, fade ala yeke baa ye so iri ni ‘Sioni-kpale-ti-bubango-ndo-kue’ so Daniel, wayanga-Nzapa, atene tënë ni ando so. Sioni kpale ni ayeke duti na ndo so ayeke nde si ayeke nzoni kue. — Mo so mo yeke diko mbeti so, mo gi nda ti ye so nzoni! —

¹⁶Tongaso, azo so ayeke na sese ti Judée, alingbi ala kpe ague na li ti ahoto;

¹⁷zo so ayeke duti na li ti da ti lo, alingbi lo zu na sese pepe ti mu ye so ayeke na ya ti da ni;

¹⁸zo so ayeke na yaka, alingbi lo kiri na ndo ti lo pepe ti mu kota bongo ti lo.

¹⁹So ye ti mawa na awali so ayeke na ngo nga na ala so ayeke mu me na amolenge na ya ti alango ni so!

²⁰Ala azo ti mbi, ala sambela si kpengo ti ala aduti na ngoi ti de wala na *lango ti wungo tere pepe,

²¹ngbanga ti so, fade pasi ni ayeke duti kota mingi. Ngbene ye na tongo nda ti dunia ngbii asi fadeso, zo ade ti baa mara ti pasi tongaso laoko pepe. Na pekoni, fade zo ayeke kiri ti baa mara ti pasi so oko pepe.

²²Tongana Nzapa azi fade ambeni lango ti pasi ni pepe, ka zo oko ti soo kuâ ayeke daa pepe. Me lo zi ambeni lango ni ndali ti azo so lo soro ala.

²³Tongana mbeni zo atene na ala: ‘Baa, *Mesii laa ge so!’, wala: ‘Lo laa kâ so!’, ala yeda na lo pepe.

²⁴Biani, fade amesii ti mvene na awayanga-Nzapa ti mvene ayeke ga si ala yeke sara akota ye ti kpene na aye ti dongo be ti handa na azo. Tongana lege ayeke daa, ataa azo so Nzapa asoro ala, ala yeke handa ala.

²⁵Mbi tene tënë ni na ala, ala ma awe!

²⁶“Tongana mbeni zo atene na ala: ‘Baa, lo laa lo yeke na benyama kâ so!’, ala gue kâ pepe. Tongana mbeni zo atene na ala: ‘Baa, lo laa lo gboto tere ti lo si lo gue, lo duti kâ so!’, ala yeda na zo ni pepe.

²⁷Fade gango ti *Molenge ti Zo ayeke duti tongana wâ ti bekpa so alondo na To aza ngbii asi na Do.

²⁸Ndo so akuâ ayeke daa, ndo so laa *angoalo ayeke bongbi tere ti ala daa.”

²⁹“Gi na peko ti apasi so, fade le ti lâ ayeke vuko, nze ayeke kiri ti su pepe, atongoro ayeke londo na le ti nduzu ti ti na sese si angangu so ayeke na le ti nduzu ayeke yingi.

³⁰Tongaso, mbeni ye ayeke sigigi na ya ti mbinda na le ti nduzu si ayeke fa na azo tënë ti gango ti *Molenge ti Zo. Amara ti dunia kue ayeke zia maboko na ndö ti go ti ala si ala yeke dema tere, ala yeke baa Molenge ti Zo so ayeke ga na ya ti ambinda na ngangu ti lo kue, na gonda ti lo kue.

³¹Kota tatalita ayeke toto si Molenge ti Zo ayeke tokua *a-ange ti lo na ndö ti sese kue titene ala gue, abongbi azo so lo soro ala.”

³²“Ayeke nzoni ala manda ye na lege ti keke ti fige: gi so amaboko ti keke ni aga fini ni si akugbe ni ayeke sigigi daa, ala hinga atene, ngoi ti lungo ale ti kobe aga nduru awe.

³³Legeoko nga, tongana ala baa aye so kue, ayeke nzoni ala hinga atene, *Molenge ti Zo aga nduru awe; lo yeke na yanga ti da.

³⁴Mbi tene na ala taa-tënë: fade azo ti fadeso ayeke kui kue pepe kozoni si aye so kue asi.

³⁵Fade yayu na sese ayeke hon, me atënë ti mbi ayeke hon oko pepe.”

³⁶“Ti lango ti singo ti aye ni wala ngbonga ni, zo oko ahinga ni pepe: ataa *a-ange so ayeke na yayu, ataa Molenge ni; gi Babâ oko laa ahinga ni.

³⁷Ye so asi ando na ngoi ti Noe, ayeke duti ande legeoko tongaso na lango ti gango ti *Molenge ti Zo.

³⁸Ando, kozo titene kota ngu apika, asuku si amu ndo kue, azo ayeke te, ala yeke nyon; akoli na awali ayeke mu tere ngbii asi na lango so Noe ali na ya ti kota mangboko.

³⁹Ala hinga tënë ni oko pepe ngbii asi na ngoi so kota ngu apika, asuku si amu ala kue ahon na ala. Ye ni ayeke duti ande nga tongaso na lango ti gango ti Molenge ti Zo.

⁴⁰Tongaso, na popo ti akoli use so ayeke na yaka, fade a yeke mu oko si a zia oko.

⁴¹Na popo ti awali use so ayeke nika ye, fade a yeke mu oko si a zia oko.

⁴²Tongaso, azo ti mbi, ala lango pepe, ngbanga ti so ala hinga lango ti gango ti *Kota Gbia ti ala pepe!

⁴³Ala ma tënë so nzoni: tongana wa ti da ahinga ngbonga so zo ti nzi ayeke ga na ni na bi, ka lo yeke lango pepe. Lo yeke duti ti baa ndo si zo ti nzi ni akungbi yanga ti da ti lo pepe ti li na ya ni.

⁴⁴Ndani laa, ala nga, ala leke tere ti ala ti ku, ngbanga ti so Molenge ti Zo ayeke ga ande na ngbonga so ala hinga pepe.”

⁴⁵“Zo ti kua so ayeke sara ye na legeni si lo yeke nga zo ti hingango ndo ayeke zo wa? Lo yeke zo so makonzi ti lo azia lo na ndö ti amba ti lo titene lo mu na ala kobe tongana ngbonga ni alingbi.

⁴⁶Ti zo ti kua ni so nzoni, tongana makonzi ti lo akiri si awara lo na yanga ti kua ni!

⁴⁷Mbi tene na ala taa-tënë: fade makonzi ti lo ayeke zia lo ti baa ndo na ndö ti aye ti lo kue.

⁴⁸Me tongana zo ti kua ni ayeke sioni zo si lo tene na be ti lo, lo tene: ‘Makonzi ti mbi ayeke ga hio pepe’

⁴⁹si lo to nda ti pikango amba ti lo azo ti kua ni, ti te, ti nyon na azo so aga ngbaa ti samba,

⁵⁰fade makonzi ti zo ti kua so ayeke si na lango so zo ti kua ni ayeke ku lo pepe wala na ngbonga so lo hinga pepe.

⁵¹Fade makonzi ni ayeke tumba lo na kua si ayeke sara na lo ye so a yeke sara na azo so tënë ti yanga ti ala ayeke nde na sarango ye ti ala; kâ, gi toto na tengo pembe.”