Read sango Matthieu 27 Bible Online

Matthieu 27 - sango bible

Matthieu 27

¹Na ndaperere, akota wayango-sandaga kue na *akangba ti azuife abongbi ti fâ ngbanga ti kuâ na li ti Jésus.

²Ala kanga lo, ague na lo si ala zia lo na maboko ti govoronere Pilate.

³So Judas, zo ti kango Jésus, abaa so azo afâ ngbanga na li ti Jésus awe, be ti lo aso mingi si lo kiri na ale ti nginza baleota ti akota wayango-sandaga na *akangba na ala.

⁴Lo tene na ala: “Mbi sara siokpari awe, ngbanga ti so mbi ka na ala mbeni zo so asara sioni oko pepe.” Me ala kiri tënë na lo, atene: “Ti e daa nyen? So abaa gi mo!”

⁵Tongaso Judas atuku nginza ni na ya ti kota da ti Nzapa si lo sigigi, lo gue. Na pekoni, lo kanga kamba na go ti lo si lo fâ tere ti lo.

⁶Akota wayango-sandaga aro nginza ni si ala tene: “*Ndia ti e ake titene e zia nginza so na ya ti sanduku ti nginza ti kota da ti Nzapa, ngbanga ti so nginza ti mene laa.”

⁷Na peko ti so ala bongbi si ala ma tere awe, ala mu nginza ni avo na yaka ti mbeni wasarango-ta si yaka ni aga ndo ti lungo akuâ ti awande.

⁸Ndani laa azo airi yaka ni “yaka ti mene” ngbii asi laso.

⁹Tongaso, tënë so wayanga-Nzapa Jérémie atene so aga taa-tënë; lo tene ando, lo tene: “Ala mu ale ti nginza baleota so ayeke wungo ti nginza so azo ti Israel ayeda ti diko ndali ti lo,

¹⁰ala vo na yaka ti wasarango-ta, tongana ti so lani *Kota Gbia amu yanga na mbi.”

¹¹Jésus aluti na gbe ti govoronere Pilate. Pilate ahunda lo, atene: “Mo yeke gbia ti azuife?” Jésus akiri tënë na lo: “Ni laa mo tene so.”

¹²So akota wayango-sandaga na *akangba abi tënë na li ti lo so, lo zi yanga oko pepe.

¹³Tongaso Pilate atene na lo: “Mo ma atënë so kue ala yeke bi na li ti mo so pepe?”

¹⁴Me Jésus akiri tënë oko na lo pepe, nilaa li ti govoronere ni kue akpe.

¹⁵Lakue na *matanga ti Pake, govoronere ayeke zi mbeni zo ti kanga oko, lo so be ti azo ti kodro ni aye titene a zi lo na kanga.

¹⁶Na ngoi ni so, mbeni zo ti kanga oko so azo ahinga lo mingi ayeke daa, iri ti lo Jésus Barabas.

¹⁷Pilate ahunda azo so abongbi so, atene: “Zo wa laa ala ye mbi zi lo na ala? Jésus Barabas wala Jésus so a iri lo *Mesii?”

¹⁸Biani, Pilate ahinga atene, ala zia Jésus na maboko ti lo, ngbanga ti so kota be asara ala na tere ti lo.

¹⁹So Pilate angba ti duti na ndo so a leke na lo ti fâ ngbanga, wali ti lo atokua na lo, atene: “Mo yoro yanga ti mo na ya ti tënë ti koli so pepe; lo sara sioni oko pepe. Na bi so, mbi baa pasi mingi na ya ti bango-li ndali ti lo.”

²⁰Akota wayango-sandaga na *akangba apusu gba ti azo ni atene, ala hunda titene a zi Barabas si a fâ Jésus.

²¹Govoronere ni akiri amu tënë si lo hunda ala, lo tene: “Na popo ti azo use so, zo wa laa ala ye titene mbi zi lo na ala?” Azo ni akiri tënë, atene: “Barabas!”

²²Pilate ahunda ala, atene: “Fade mbi yeke sara nyen na Jésus so a iri lo Mesii so?” Ala kue akiri tënë, atene: “A fâ lo na ndö ti keke ti kroa!”

²³Pilate akiri ahunda ala, atene: “Sioni ti nyen laa lo sara?” Me ala kiri adekongo ngangu, atene: “A fâ lo na ndö ti keke ti kroa!”

²⁴So Pilate abaa atene, ni ha gbaa si wusuwusu ayeke gue guengo na nduzu, lo mu ngu si lo sukula maboko ti lo na le ti azo kue; lo tene na ala: “Ngbanga ti kuâ ti koli so ayeke na li ti mbi pepe! So abaa gi ala wani!”

²⁵Azo ni kue akiri tënë, atene: “E ye titene ngbanga ti kuâ ti lo ati na li ti e nga na amolenge ti e!”

²⁶Tongaso, Pilate azi Barabas na ala si lo mu yanga titene a pika Jésus na fimbo. Na pekoni, lo mu lo na ala titene a fâ lo na ndö ti keke ti kroa.

²⁷Aturugu ti govoronere amu Jésus, ague na lo na yangbo ti govoronere ni si tanga ti aturugu ni kue abongbi na tere ti lo.

²⁸Ala zi bongo ti lo na tere ti lo si ala yu na lo mbeni kota bengba bongo.

²⁹Na pekoni, ala mu akamba ti ki aleke ni tongana kpoto ti gbia si ala zia na li ti lo, ala zia mbeni sosongo na maboko ti lo ti koli; ala kuku na gbe ti lo si ala to nda ti he lo, atene: “E bara mo, gbia ti azuife!”

³⁰Ala tuku ngu ti yanga ti ala na tere ti lo, ala mu sosongo ni si ala pika na li ti lo.

³¹So ala zia lege ti hengo lo awe, ala zi bengba bongo ni si ala kiri ayu na lo bongo ti lo; ala mu lo, ague na lo ti fâ lo na ndö ti keke ti kroa.

³²So ala yeke sigigi na ya ti gbata ni, ala tengbi na mbeni koli ti Sirene so iri ti lo ayeke Simon. Ala gbu lo na ngangu titene lo yo keke ti kroa ti Jésus.

³³Ala si na ndo so iri ni Golgota; nda ti iri ni atene “Ndo-ti-abio-ti-li”.

³⁴Aturugu ni amu vin, ala zia mbeni sengo ye na ya ni si ala mu na Jésus titene lo nyon. Jésus atara ni kete si lo ke ti nyon ni.

³⁵So ala kanga lo na ndö ti keke ti kroa awe, ala bi *dee si ala kangbi ya ti bongo ti lo na popo ti ala.

³⁶Na pekoni, ala duti na ndo so ti bata lo.

³⁷Na li ti keke ti kroa ti lo, ala zia mbeni mbeti so afa nda ti ngbanga so a fâ na li ti lo, atene: “So Jésus, gbia ti azuife.”

³⁸A kanga nga ambeni zo ti sioni use na ndö ti akeke ti kroa na tere ti lo, oko na mbage ti maboko ti lo ti koli, oko na mbage ti maboko ti lo ti wali.

³⁹Azo so ayeke hon nduru na tere ti lo ayingi li ti ala si ala zonga lo,

⁴⁰atene: “Mo so mo tene, mo yeke kungbi kota da ti Nzapa titene mo kiri mo leke ni na ya ti lango ota so, mo soo tere ti mo wani na kuâ ma! Tongana mo yeke Molenge ti Nzapa, londo na ndö ti keke ti kroa ni fadeso, mo zu na sese e baa!”

⁴¹Akota wayango-sandaga, awafango-ndia nga na *akangba ahe lo na ngia, ala tene:

⁴²“Lo soo ambeni zo na kuâ, me lo lingbi ti soo tere ti lo wani pepe! So gbia ti Israel ni laa? Lo londo fadeso na ndö ti keke ti kroa, lo zu na sese si fade e ma na be na lo.

⁴³Lo zia be ti lo na Nzapa si lo tene: ‘Mbi yeke Molenge ti Nzapa.’ Nzapa ni aga azi lo fadeso, e baa!”

⁴⁴Ataa azo ti sarango sioni so a kanga ala na keke ti kroa na tere ti lo ayeke zonga lo gi tongaso nga.

⁴⁵Ti londo na bekombite ngbii asi na ngbonga ota, ndo avuko na ya ti kodro ni kue.

⁴⁶Nduru na ngbonga ota, Jésus adekongo ngangu, atene: “Eli, Eli, lema sabaktani?” Ndani atene: “Nzapa ti mbi, Nzapa ti mbi, mo zia mbi ngbanga ti nyen?”

⁴⁷Ambeni zo so ayeke na tere ni, ama dekongo ti lo ni si ala tene: “Lo yeke iri Élie!”

⁴⁸Mbeni oko na popo ti ala akpe hio amu ndokoro si lo yoro na ya ti kpingo vin; lo kanga na li ti mbeni sosongo si lo yoro ni na Jésus titene lo nyon.

⁴⁹Me ambeni atene: “Mo ku, e yeke baa wala Élie ayeke ga ti soo lo!”

⁵⁰Jésus akiri adekongo ngangu si lo kui.

⁵¹Gi na ndembe ni so, ya ti ridoo so a kanga na ya ti kota da ti Nzapa asuru use, alondo na nduzu ngbii asi na gbeni. Sese ayingi, ya ti akota têne asuru,

⁵²yanga ti adu ti kuâ azi si azo mingi ti Nzapa so akui azingo na kuâ.

⁵³Ala sigigi na ya ti adu ti kuâ ni. Na peko ti zingongo ti Jésus na kuâ, ala li na Jérusalem, gbata so ayeke nde si ayeke nzoni kue; kâ, azo mingi abaa ala.

⁵⁴So makonzi ti aturugu ni na aturugu so ayeke bata Jésus abaa sese so ayingi nga na aye so kue asi, mbeto agbu ala mingi si ala tene: “Taa-tënë, lo yeke Molenge ti Nzapa!”

⁵⁵Awali mingi ayeke kâ, ala ngba ti ala yongoro si ala yeke baa ye ni: ala yeke tambula lani na peko ti Jésus, ala londo na Galile si aga ti sara kua na lo.

⁵⁶Na popo ti ala, Marie ti kodro ti Magdala, Marie mama ti Jacques na Joseph nga na mama ti amolenge ti Zebede ayeke daa.

⁵⁷Na lakui, mbeni zo ti mosoro ti gbata ti Arimate aga, iri ti lo Joseph; lo nga lo yeke disiple ti Jésus.

⁵⁸Lo gue, lo baa Pilate si lo hunda lo titene lo mu kuâ ti Jésus. Tongaso Pilate amu yanga titene a mu kuâ ni na lo.

⁵⁹Joseph amu kuâ ni, lo kanga ni na fini kota bongo ti *len,

⁶⁰lo zia kuâ ni na ya ti mbeni fini du ti kuâ so lo zi na ya ti kota têne aninga pepe. Andaa ayeke mbeni du ti kuâ so lo zi lani ndali ti lo wani. Na pekoni, lo mu mbeni kota têne, lo kanga na yanga ti du ti kuâ ni si lo gue.

⁶¹Marie ti kodro ti Magdala na mbeni Marie ayeke nga kâ; ala duti si ala yeke baa ndo na yanga ti du ti kuâ ni.

⁶²Lango oko na pekoni, so ti tene lango so aga na peko ti lango so azuife ayeke leke aye ndali ti *lango ti wungo tere, akota wayango-sandaga na *afarizien abongbi ague na ndo ti Pilate;

⁶³ala tene na lo: “Kota zo, na ndembe so zo ti mvene so ade na fini, lo tene lani, lo tene: ‘Na peko ti lango ota, fade mbi yeke zingo na kuâ.’ E dabe ti e na tënë so.

⁶⁴Tongaso, mo mu yanga titene aturugu abata du ti kuâ ni ngbii asi na peko ti lango ota, tongaso pepe, fade adisiple ti lo alingbi ti ga ti nzi kuâ ti lo si ala tene na azo, atene: ‘Lo zingo na kuâ awe!’ Fade tënë ti mvene ti ndani so ayeke duti sioni ahon ti kozoni.”

⁶⁵Pilate atene na ala: “Aturugu laa! Ala gue, abata du ti kuâ ni tongana ti so be ti ala aye!”

⁶⁶Tongaso ala gue, akanga kota têne ti yanga ti du ti kuâ ni ngangu, ala kpo mbeni *nzoroko na yanga ni si ala zia aturugu ti bata ni.