Read sango Matthieu 3 Bible Online

Matthieu 3 - sango bible

Matthieu 3

¹Na ngoi ni so, Jean-Baptiste asi; lo to nda ti fa Nzoni Tënë na ya ti benyama ti Judée,

²lo tene: “Ala zia ngbene lege ti sarango ye ti ala, ngbanga ti so *Kodro-gbia ti yayu aga nduru awe!”

³Jean ayeke zo so wayanga-Nzapa Ésaïe atene tënë ti lo ando, atene: “Mbeni zo ayeke dekongo na benyama kâ, atene: ‘Ala leke lege ti *Kota Gbia! Ala sara si lege ti lo aluti mbirimbiri!’ ”

⁴Jean ayu bongo so a sara ni na kua ti tere ti *zambala, lo kanga kamba ti poro ti nyama na ya ti lo, kobe ti lo ti tengo ni ayeke angadi na mafuta ti awotoro ti ngonda.

⁵Azo alondo na Jérusalem, ambeni alondo na akodro nde nde ti Judée, ambeni alondo nga na akodro so ayeke na tere ti ngu ti Jourdain si ala ga na tere ti lo.

⁶Ala fa asiokpari ti ala na gigi si Jean abatize ala na ya ti ngu ti Jourdain.

⁷So Jean abaa gba ti *afarizien na *asadusien ayeke ga na tere ti lo titene ala wara bateme, lo tene na ala: “Ala, asioni mara ti ngbo! Zo wa laa afa na ala lege ti kpe ngonzo ti Nzapa so ayeke ga so?

⁸Ala sara ye so afa atene, ala zia ngbene lege ti sarango ye ti ala awe!

⁹Ala tene na be ti ala pepe, atene: ‘Abraham ayeke kotara ti e.’ Biani, mbi tene na ala: Nzapa alingbi ti mu atêne so ti sara si aga amolenge ti Abraham!

¹⁰Do ayeke na gunda ti akeke ti de ni: keke so kue ale nzoni lengo pepe, fade ayeke de ni ti bi na wâ.

¹¹Ti mbi, mbi yeke batize ala na ngu ti fa na le ti azo so ala zia ngbene lege ti sarango ye ti ala awe; me lo so ayeke ga na peko ti mbi, fade lo yeke batize ala na Yingo-Vuru nga na wâ. Ngangu ti lo ahon ti mbi: mbi kpa zo ti zi poro ti gere ti lo pepe.

¹²Lo gbu ye ti pengo na ale ti kobe na maboko ti lo, lo yeke leke ndo ti pikango ale ti kobe ti lo daa. Na pekoni, lo yeke zia ni na ya ti gogoro, me fade lo yeke bongbi aporo ni ti gbi na ya ti wâ so ayeke mingo laoko pepe.”

¹³Tongaso Jésus alondo na Galile, lo ga na yanga ti ngu ti Jourdain na tere ti Jean titene Jean abatize lo.

¹⁴Me Jean aye ti ke. Lo tene na Jésus: “Mo laa mo lingbi fade ti batize mbi. Tongana nyen laa mo kiri, mo ga titene mbi batize mo so?”

¹⁵Me Jésus akiri tënë na lo: “Ti fadeso, ayeke nzoni e sara tongaso si e lingbi ti sara ye so kue ayeke mbirimbiri na le ti Nzapa.” Tongaso Jean ayeda.

¹⁶Gi so Jésus awara bateme awe, lo sigigi na ya ti ngu ni. Na ndembe ni so, yanga ti yayu azi, lo baa Yingo ti Nzapa so azu tongana *mbipa si aga na ndö ti lo.

¹⁷Mbeni go alondo na yayu si atene: “So ayeke Molenge ti mbi so mbi ye lo mingi, be ti mbi anzere na lo mingi.”