Read sango Marc 11 Bible Online

Marc 11 - sango bible

Marc 11

¹So ala ga nduru na Jérusalem, nduru na akete kodro ti Betfaze na ti Betanii, na tere ti hoto ti a-olive, Jésus atokua ambeni disiple ti lo use;

²lo tene na ala: “Ala gue na kete kodro so ayeke na dawa ti ala so. Gi so ala yeke li na ya ni, ala yeke wara mbeni molenge ti lele so a kanga lo na tere ti mbeni ye, mbeni zo ade ti duti na ndö ti lo pepe. Ala zi lo, aga na lo.

³Tongana mbeni zo ahunda ala, atene: ‘Ala yeke sara ye tongaso ngbanga ti nyen?’, ala tene na lo: ‘*Kota Gbia aye lele ni; lo yeke kiri na lele ni fafadeso.’ ”

⁴Tongaso, ala gue si ala wara lele ni na gigi, na ndö ti balabala; a kanga lo na yanga ti mbeni da. Ala zi lo.

⁵Ambeni zo so ayeke kâ, ahunda ala, atene: “Nyen laa ala yeke sara so? Ala yeke zi kete lele so ngbanga ti nyen?”

⁶Ala kiri gi na tënë so Jésus atene na ala so si azo ni azia ala ti mu lele ni ti gue na ni.

⁷Ala ga na lele ni na Jésus. Ala zia kota bongo ti ala na ndö ti lele ni si Jésus ako, aduti na ndö ti lo.

⁸Azo mingi agbara akota bongo ti ala na ndö ti lege si ambeni azia ti ala na ndö ti lege amaboko ti keke so ala fâ na ya ti ngonda si akugbe angba na tere ni.

⁹Azo so ayeke tambula na dawa ti Jésus na ala so ayeke tambula na peko ti lo ayeke dekongo, atene: “E gonda Nzapa! Ayeke nzoni Nzapa asara tufa na ndö ti lo so aga na iri ti *Kota Gbia!

¹⁰Ayeke nzoni Nzapa asara tufa na ndö ti *Kodro-gbia ti Nzapa so ayeke ga, kodro so kotara ti e David aduti gbia daa! E gonda Nzapa so ayeke na yayu kâ na ndö ti aye kue!”

¹¹Jésus ali na Jérusalem si lo gue na ya ti kota da ti Nzapa. Lo baa ndo; lo baa aye kue si na pekoni, lo na adisiple ti lo baleoko na use amu lege ti gue na Betanii, ngbanga ti so ndo aga nduru ti vuko awe.

¹²Lango oko na pekoni, so ala londo na Betanii ti gue, nzara agbu Jésus.

¹³Lo baa mbeni keke ti fige yongoro kâ, akugbe ni ayeke daa mingi si lo gue ti baa wala lengo ni ayeke daa; me so lo ga nduru na tere ni, lo wara gi akugbe ni, ngbanga ti so ngoi ti lengo ti fige ni ade.

¹⁴Jésus atene na keke ti fige ni: “Zo ayeke kiri ti te lengo ti mo mbeni pepe!” Adisiple ti lo ama tënë so lo tene so.

¹⁵So ala si na Jérusalem awe, Jésus ali na ya ti kota da ti Nzapa si lo to nda ti tumba azo so ayeke ka ye na ala so ayeke vo ye na ya ti kota da ni. Lo kinda na sese ameza ti azo ti sanzengo nginza na angende ti azo ti kango *ambipa.

¹⁶Lo zia zo oko pepe ti yo mbeni ye ti hon na ni na ya ti kota da ni.

¹⁷Na pekoni, lo fa ye na azo ni, lo tene: “Mbeti ti Nzapa atene: ‘Fade a yeke iri da ti mbi da ti sambelango Nzapa ti amara kue.’ Me ti ala, ala sara si da ni aga du so azo ti nzi ayeke honde tere ti ala daa!”

¹⁸Akota wayango-sandaga na awafango-ndia ama tënë ti ye so Jésus asara so si ala yeke gi lege ti fâ lo. Me ala sara mbeto ti lo mingi, ngbanga ti so li ti gba ti azo akpe ndali ti fango ye ti lo.

¹⁹So lâ akui awe, Jésus na adisiple ti lo asigigi na ya ti gbata ni, ala hon.

²⁰Na ndaperere, so ala yeke hon, ala baa keke ti fige ni; keke ni ahole ngbii asi na gunda ni kue.

²¹Pierre adabe ti lo na ye so asi lani so si lo tene na Jésus: “Wafango-ye, baa keke ti fige so lani mo deba ni so, ahole kue awe.”

²²Tongaso Jésus atene na adisiple ti lo: “Ayeke nzoni ala ma na be na Nzapa.

²³Mbi tene na ala taa-tënë: tongana zo atene na hoto so, atene: ‘Londo na ndo so, mo ti na ya ti kota ngu-ingo’ si lo dekite na be ti lo pepe, me lo ma na be so ye ni ayeke si, fade ye ni ayeke si biani.

²⁴Ndani laa mbi tene na ala: tongana ala yeke sambela ti hunda mbeni ye na Nzapa, ayeke nzoni ala ma na be so ala wara ye ni awe; fade Nzapa ayeke mu na ala ye ni.

²⁵Tongana ala luti na nduzu ti sambela si mbeni tënë ayeke na be ti ala na tere ti mbeni zo, ayeke nzoni ala zi tënë ni na li ti lo. Tongaso si fade Babâ ti ala so ayeke na yayu ayeke zi nga tënë na li ti ala. [

²⁶Me tongana ala zi tënë na li ti mbeni zo pepe, fade Babâ ti ala so ayeke na yayu ayeke zi nga tënë na li ti ala pepe.”]

²⁷Ala kiri ague na Jérusalem. So Jésus ayeke tambula na ya ti kota da ti Nzapa, akota wayango-sandaga na awafango-ndia nga na *akangba aga na tere ti lo.

²⁸Ala hunda lo, atene: “Na iri ti zo wa laa mo yeke sara aye so? Zo wa laa amu lege na mo ti sara ni, zo wa?”

²⁹Jésus akiri tënë na ala: “Fade mbi yeke hunda ala na mbeni tënë oko. Tongana ala kiri na peko ni na mbi, fade mbi yeke di na ala iri ti zo so amu lege na mbi ti sara aye so.

³⁰Zo wa laa atokua Jean ti batize azo? Nzapa wala azo? Ala kiri peko ti tënë ni na mbi.”

³¹Ala tene na popo ti ala: “Tongana e tene: ‘Nzapa laa atokua Jean’, fade lo hunda e, lo tene: ‘Ngbanga ti nyen si ala yeda na tënë ti lo pepe?’

³²Tongana e tene: ‘Azo laa atokua lo’, fade …” — Ala sara mbeto ti gba ti azo ni, ngbanga ti so ala kue ahinga atene, Jean ayeke taa wayanga-Nzapa.

³³Tongaso ala kiri tënë na Jésus: “E hinga pepe.” Nilaa Jésus atene na ala: “Zo so amu lege na mbi ti sara aye so, mbi nga, mbi yeke di iri ti lo na ala pepe.”