Read sango Marc 14 Bible Online

Marc 14 - sango bible

Marc 14

¹*Matanga ti Pake na ti Mapa so a sara na mama ni pepe angba lango use. Akota wayango-sandaga na awafango-ndia ayeke gi lege ti gbu Jésus na lege ti mbeni mayere titene ala fâ lo.

²Ala tene na popo ti ala: “Alingbi e gbu lo na lango ti matanga pepe, ngbanga ti azo atomboka.”

³Jésus ayeke na Betanii, na ya ti da ti Simon, zo ti buruma. So lo duti si lo yeke te kobe, mbeni wali ali na mbeni ngbenda so a sara ni na mbeni têne so iri ni albatre si yombo ti ngangu ngere ayeke na ya ni. A sara yombo ni na ngu ti mbeni kete keke so iri ni nare. Lo fâ ya ti ngbenda ni si lo tuku yombo ni na li ti Jésus.

⁴Ambeni zo so ayeke kâ asara ngonzo si ala tene na popo ti ala: “Ngbanga ti nyen si a buba yombo so tongaso?

⁵A lingbi fade ti ka yombo so na ale ti nginza ngbangbo ota ti mu nginza ni na azo ti mawa!” Tongaso ala kasa wali so mingi.

⁶Me Jésus atene na ala: “Ala zia lo kpoo. Ngbanga ti nyen si ala yeke so li ti lo tongaso? Ye so lo sara na mbi so ayeke nzoni.

⁷Azo ti mawa ayeke duti lakue na popo ti ala. Ala lingbi ti sara nzoni na ala na ya ti alango so kue be ti ala aye. Ti mbi, mbi yeke duti lakue na popo ti ala pepe.

⁸Lo sara ye so lo lingbi ti sara: lo tuku yombo na tere ti mbi kozoni ti ku na lango ti lungo kuâ ti mbi.

⁹Mbi tene na ala taa-tënë: na ndo so kue azo ayeke fa ande Nzoni Tënë daa, na ndö ti dunia kue, azo ayeke fa tënë ti ye so wali so asara si azo adabe ti ala na lo.”

¹⁰Tongaso Judas Iskariote, mbeni disiple oko na popo ti adisiple baleoko na use, ague, abaa akota wayango-sandaga ti ka Jésus na ala.

¹¹Na mango tënë so, tere ti ala anzere mingi si ala mu zendo na lo atene, fade ala yeke mu na lo nginza. Tongaso Judas ayeke gi nzoni lege ti ka Jésus na ala.

¹²Na kozo lango ti matanga ti Mapa so a sara na mama ni pepe, lango so azo ayeke fâ akete taba ndali ti matanga ti *Pake, adisiple ti Jésus ahunda lo, atene: “Mo ye e gue, e leke na mo kobe ti Pake na ndo wa?”

¹³Tongaso Jésus atokua adisiple ti lo use si lo tene na ala: “Ala gue na ya ti gbata ni, fade ala yeke tengbi na mbeni koli so ayo ta ti ngu na li ti lo. Ala mu peko ti lo

¹⁴si da so lo yeke li daa, ala tene na wa ni, atene: ‘Wafango-ye atene: ndo titene mbi na adisiple ti mbi, e te kobe ti Pake daa ayeke na ndo wa?’

¹⁵Fade lo yeke fa na ala mbeni kota kubu na nduzu so a leke ya ni na aye ti ya ni kue awe: na ndo so laa ala yeke leke kobe ni daa.”

¹⁶Adisiple amu lege ague na ya ti gbata ni; ala wara aye ni gi tongana ti so lo fa na ala si ala leke kobe ti Pake ni.

¹⁷Na lakui ni, Jésus na adisiple baleoko na use kue asi.

¹⁸So ala yeke te kobe, Jésus atene na ala: “Mbi tene na ala taa-tënë: mbeni oko na popo ti ala so mbi na lo, e yeke te kobe oko, ayeke ka mbi.”

¹⁹Vundu agbu be ti ala si ala oko oko ahunda lo, atene: “Ayeke mbi?”

²⁰Jésus atene na ala: “Ayeke mbeni oko ti adisiple baleoko na use, lo so mbi na lo, e yeke yoro maboko oko na ya ti sembe.

²¹Fade *Molenge ti Zo ayeke kui gi tongana ti so Mbeti ti Nzapa atene tënë ni na ndö ti lo. Me mawa na zo so ayeke ka Molenge ti Zo! Ti zo ni so, tongana a du lo fade pepe, ka ayeke nzoni mingi!”

²²So ala yeke te kobe, Jésus amu mapa, lo mu singila na Nzapa; na pekoni lo fâ ya ni, lo mu na adisiple si lo tene: “Ala mu ni ate, so ayeke tere ti mbi.”

²³Na pekoni, lo mu kopo ti vin, lo mu singila na Nzapa, lo mu ni na ala si ala kue anyon ni.

²⁴Jésus atene na ala: “So ayeke mene ti mbi, mene so abongbi azo na Nzapa na ya ti *mbuki; mene so atuku ndali ti gba ti azo.

²⁵Mbi tene na ala taa-tënë: mbi yeke kiri ti nyon ngu ti le ti *vinye mbeni pepe ngbii asi na lango so fade mbi yeke nyon fini vin na ya ti *Kodro-gbia ti Nzapa.”

²⁶Na peko ti so ala he bia ti gondango Nzapa awe, ala mu lege ti gue na hoto ti a-olive.

²⁷Jésus atene na adisiple ti lo: “Fade ala kue ayeke zia mbi ti hon, ngbanga ti so Mbeti ti Nzapa atene: ‘Fade mbi yeke fâ wabatango-taba si ataba ni ayeke kangbi kirikiri.’

²⁸Me tongana mbi zingo ande na kuâ, mbi yeke hon kozo ti ala na Galile.”

²⁹Pierre atene na lo: “Tongana azo kue azia mo ahon, fade mbi yeke zia mo pepe.”

³⁰Jésus akiri tënë na lo: “Mbi tene na mo taa-tënë: laso, gi na bi so, kozo titene koli-kondo atoto fani use, fade mo yeke bere tënë ti mbi fani ota.”

³¹Me Pierre angba gi na ndö ti tënë ti lo si lo tene: “Tongana ayeke titene mbi na mo, e kui, mbi yeke bere tënë ti mo oko pepe!” Ala kue atene gi oko tënë so.

³²Na pekoni, ala si na mbeni ndo so iri ni Getsemane; Jésus atene na adisiple ti lo: “Ala duti na ndo so, mbi yeke gue ti sambela.”

³³Lo mu Pierre, Jacques na Jean na tere ti lo si lo na ala ague. Be ti lo ato nda ti do na mbeto si mbeto asara lo ahon ndoni.

³⁴Lo tene na ala: “Be ti mbi ayeke na vundu mingi, mo baa mo tene, mbi ye ti kui kuingo; ala ngba na ndo so, ala lango pepe!”

³⁵Lo gue yongoro kete, lo ti na sese si lo sambela titene tongana lege ayeke daa, ngbonga ti pasi so ahon yongoro na tere ti lo.

³⁶Lo sambela, lo tene: “Babâ ti mbi, mo lingbi ti sara ye kue; mo zi kopo ti pasi so na tere ti mbi. Mbi ye pepe titene mo sara ye so be ti mbi aye, me mo sara gi ye so be ti mo aye.”

³⁷Lo kiri lo ga na mbage ti adisiple ti lo ota si lo wara ala na lango. Lo tene na Pierre: “Simon, mo lango? Mo lingbi ti ngba na le ti mo tongaso na ya ti ngbonga oko pepe?

³⁸Ala lango pepe! Ala sambela si ala ti na ya ti ye ti tarango be pepe. Yingo ti zo ayeke na nzara ti sarango nzoni ye, me zo ni ayeke na ngangu pepe.”

³⁹Lo kiri lo gue yongoro si lo sambela, lo tene gi oko tënë so lo tene kozoni so.

⁴⁰Lo kiri lo ga na mbage ti adisiple ti lo si lo wara ala na lango, ngbanga ti so lango ahon ndö ti ala. Ala hinga tënë so ala lingbi ti tene na lo pepe.

⁴¹So lo kiri lo ga ti fani ota ni, lo tene na ala: “Ala ngba ti lango? Ala ngba ti wu tere ti ala? Alingbi awe! Ngbonga ni alingbi awe; a yeke mu *Molenge ti Zo ti zia lo na maboko ti azo ti siokpari.

⁴²Ala londo, e gue! Baa, zo ti kango mbi asi awe!”

⁴³Gi so Jésus angba ti tene tënë, Judas, mbeni oko ti adisiple baleoko na use asi; lo ga na gba ti azo na tere ti lo. Azo ni amu ayongoro zeme na akeke na maboko ti ala. Akota wayango-sandaga na awafango-ndia na *akangba laa atokua ala.

⁴⁴Judas, zo ti kango Jésus afa na azo ni ye so fade lo yeke sara; lo tene: “Zo so mbi yeke su ande ngbangba ti lo, andaa lo laa. Ala gbu lo, ala bata lo nzoni si ala gue na lo.”

⁴⁵Gi so Judas asi, lo ga nduru na tere ti Jésus; lo iri lo, lo tene: “Wafango-ye!” Na pekoni, lo su ngbangba ti lo.

⁴⁶Tongaso azo ni aga, ala zia maboko na ndö ti Jésus si ala gbu lo.

⁴⁷Me oko ti azo so ayeke kâ agboto yongoro zeme ti lo, lo de mbeni zo ti kua ti kota wayango-sandaga si lo fâ mê ti lo.

⁴⁸Jésus atene na ala: “Ala ga na ayongoro zeme na akeke ti gbu mbi, mo baa mo tene, mbi yeke zo ti nzi!

⁴⁹Lakue mbi yeke na popo ti ala na ya ti kota da ti Nzapa ti fa ye, me ala gbu mbi pepe. Ye so asi tongaso titene tënë ti Mbeti ti Nzapa aga taa-tënë.”

⁵⁰Tongaso azo kue azia lo si ala kpe ahon.

⁵¹Mbeni maseka-koli amu peko ti Jésus, lo kanga gi mapia-bongo na tere ti lo. Ala ye ti gbu lo,

⁵²me lo zi tere ti lo na ya ti bongo ni, lo kpe, lo hon, tere ti lo senge.

⁵³Ala gue na Jésus na ndo ti kota wayango-sandaga. Andaa akota wayango-sandaga, *akangba na awafango-ndia abongbi tere ti ala kâ.

⁵⁴Pierre ague na peko ti Jésus, me lo yeke gue nduru nduru pepe; lo gue ngbii lo li na ya ti gbagba ti kota wayango-sandaga ni. Kâ, lo na azo ti kua ayeke duti na tere ti wâ.

⁵⁵Akota wayango-sandaga na azo kue ti *Kota Bongbi ti Fango Ngbanga ayeke gi mbeni tënë ti bi na li ti Jésus ti fâ ngbanga ti kuâ na li ti lo, me ala wara ni pepe.

⁵⁶Biani, azo mingi atene mvene na li ti Jésus, me atënë ti ala ague nde nde.

⁵⁷Ambeni zo alondo si ala tene tënë ti mvene na li ti lo, atene:

⁵⁸“E ma lo lani, lo tene: ‘Fade mbi yeke kungbi kota da ti Nzapa so azo laa asara si na ya ti lango ota, mbi yeke sara mbeni nde so zo laa asara ni pepe.’ ”

⁵⁹Me na ndö ti tënë so, atënë ti ala akiri ague nde nde.

⁶⁰Tongaso kota wayango-sandaga alondo na le ti azo kue si lo hunda Jésus, atene: “Mo yeke na tënë ti kiri na ni pepe? Tënë so azo so ayeke tene na tere ti mo so, mo tene ti mo daa nyen?”

⁶¹Me Jésus azi yanga pepe, lo kiri tënë oko pepe. Kota wayango-sandaga ni akiri ahunda lo, atene: “Mo laa mo yeke *Mesii, Molenge ti Nzapa, lo so azo ayeke gonda lo so?”

⁶²Jésus akiri tënë, atene: “Biani, mbi yeke lo. Fade ala yeke baa *Molenge ti Zo aduti na tere ti Nzapa so ngangu ti lo ahon angangu kue; lo yeke duti na mbage ti maboko ti lo ti koli. Lo yeke londo na yayu ti ga na ya ti ambinda.”

⁶³Tongaso kota wayango-sandaga asuru ya ti bongo ti lo si lo tene: “E ye ti kiri ti hunda mbeni zo na tënë ngbanga ti nyen!

⁶⁴Ala ma zonga so lo zonga na Nzapa so awe! Ti be ti ala, ala tene nyen?” Ala kue atene: “Lo lingbi na kuâ.”

⁶⁵Ambeni zo ato nda ti tuku ngu ti yanga ti ala na tere ti lo, ala kanga le ti lo, ala kpo lo na gobo si ala tene na lo: “Sara tongana wayanga-Nzapa: fa na e zo so asara ye so na mo.” Azo ti kua ni amu Jésus si ala pika ngbangba ti lo fani mingi.

⁶⁶So Pierre ayeke duti ti lo kâ na gbeni na ya ti gbagba ni, mbeni wali so ayeke sara kua na kota wayango-sandaga asi.

⁶⁷Lo baa Pierre so ayeke duti na tere ti wâ, lo baa le ti Pierre si lo tene na lo: “Mo nga, mo yeke lani na tere ti Jésus, zo ti kodro ti Nazaret!”

⁶⁸Me lo bere si lo tene: “Mbi hinga tënë so mo ye ti tene so pepe, mbi gi li ti mbi na ni gbaa!” Na pekoni, lo sigigi na ya ti gbagba ni ti gue na mbage ti yanga ti gbagba ni. Tongaso koli-kondo atoto.

⁶⁹Wali so abaa Pierre si akiri atene na azo so ayeke kâ, atene: “Taa-tënë, koli so ayeke mbeni zo ti ala!”

⁷⁰Pierre akiri abere. Kete na pekoni, azo so ayeke kâ, akiri atene na Pierre: “Biani, mo yeke mbeni zo ti ala, ngbanga ti so, mo nga, mo yeke zo ti Galile.”

⁷¹Tongaso Pierre ato nda ti deba yanga ti lo, atene: “Ayeke nzoni Nzapa afâ ngbanga na li ti mbi tongana mbi tene mvene! Mbi hinga koli so ala yeke tene tënë ti lo so pepe!”

⁷²Gi na ndembe ni, koli-kondo atoto ti fani use. Tongaso Pierre adabe ti lo na tënë so lani Jésus atene na lo, atene: “Kozo titene koli-kondo atoto fani use, fade mo yeke bere tënë ti mbi fani ota.” Tongaso Pierre ati na toto.